-
අධිකරණ නියෝග නොතකා අපරාධ පරීක්ෂණ දෙපාර්තමේන්තුව නීතිපති උපදෙස් පතලා… අධිකරණයට අපහාස කිරීම සම්බන්ධව අපරාධ පරීක්ෂණ දෙපාර්තමේන්තුවට එරෙහිව නීතිය ක්රියාත්මක කරන බව කොටුව මහේස්ත්රාත්වරයා දැඩිව කියයි!
පාස්කු ඉරිදා ත්රස්ත ප්රහාරයේ සැකකරුවකු වූ ඊබ්රහිම් ඉල්හාම් අහමඩ් පදිංචිව සිටි දෙමටගොඩ මහවිල ගාඩ්න්ස් නිවසේ තිබී අපරාධ පරීක්ෂණ දෙපාර්තමේන්තුව භාරයට ගත් රන් භාණ්ඩ හා මැණික් ඇතුළු දේපළ, සතියක් ඇතුළත ඔහුගේ සහෝදරයා වෙත මුදා හරින ලෙස කොටුව මහේස්ත්රාත් ඉසුරු නෙත්තිකුමාර අද (25) නියෝග කළේය.
අධිකරණ නියෝග දිගින් දිගටම පැහැර හැරීම සම්බන්ධයෙන් මෙහිදී අපරාධ පරීක්ෂණ දෙපාර්තමේන්තුවට දැඩි අවවාද කළ මහේස්ත්රාත්වරයා, මෙම නියෝගය ක්රියාත්මක නොකළහොත් අධිකරණයට අපහාස කිරීමේ චෝදනාව යටතේ CIDයට එරෙහිව නීතිමය පියවර ගන්නා බව ද අවධාරණය කළේය.
ෂැංග්රිලා හෝටලයේ මරාගෙන මැරෙන බෝම්බ ප්රහාරයක් එල්ල කළ ඉල්හාම් අහමඩ් සහ දෙමටගොඩ නිවසේ බෝම්බය පිපිරී මියගිය ඉන්ෂාෆ් අහමඩ් යන දෙදෙනාගේ සහෝදරයකු වන ඉෆ්ලාල් අහමඩ් විසින් කරන ලද ඉල්ලීමකට අනුව මෙම නියෝගය නිකුත් විය. අදාළ භාණ්ඩ තමන්ට අයත් බව පවසමින් ඔහු නීතිඥවරයෙකු මාර්ගයෙන් අධිකරණයෙන් සහනයක් ඉල්ලා තිබුණි.
මෙහිදී මහේස්ත්රාත්වරයා පෙන්වා දුන්නේ පූර්වගාමී මහේස්ත්රාත්වරයා විසින් විරෝධතා ගොනු කිරීමට CIDයට සාධාරණ කාලයක් ලබා දී තිබුණද ඔවුන් කිසිදු කරුණක් ඉදිරිපත් කර නොමැති බවය.
තවත් මහේස්ත්රාත්වරියක විසින් මේ පිළිබඳව වාර්තාවක් කැඳවා තිබියදීත් CIDය එම නියෝග ද නොසලකා හැර ඇති බව අධිකරණය මෙහිදී අවධාරණය කරනු ලැබුවේය.
මේ අවස්තාවේ දී අපරාධ පරීක්ෂණ දෙපාර්තමේන්තුව අධිකරණයෙන් ඉල්ලීමක් කරමින් ප්රකාශ කළේ අදාළ භාණ්ඩ මේ වන විට මහ බැංකු සුරක්ෂිතාගාරයේ තැන්පත් කර ඇති බැවින් ඒවා මුදා හැරීමට තවත් කාලය ලබා දෙන ලෙසය.
එහෙත් එම ඉල්ලීම ප්රතික්ෂේප කළ මහේස්ත්රාත්වරයා, අධිකරණ නියෝග ක්රියාත්මක නොකර නීතිපති උපදෙස් පැතීම වැරදි ක්රියාවක් බවත්, මෙය බරපතල අනතුරුදායක තත්ත්වයක් බවත් අවධාරණය කළේය.
“අධිකරණ නියෝග පැහැර හැරීම සහ මග හැරීම මත අධිකරණයට අපහාස කළ බවට අපරාධ පරීක්ෂණ දෙපාර්තමේන්තුවට එරෙහිව පියවර ගන්නවා.” – මහේස්ත්රාත් ඉසුරු නෙත්තිකුමාර දැඩිව දන්වා සිටියේය.
සහරාන් හෂීම් ඇතුළු සැකකරුවන් අට දෙනෙකුට එරෙහිව පවරා ඇති මෙම නඩුවට අදාළව, ඇප මත මුදා හැර සිටින ඒ.එච්.එම්. රිෆාස් සහ මොහොමඩ් නිලාම් යන අය ද එදින අධිකරණයේ පෙනී සිටියහ.
නඩුව නැවත කැඳවීම ලබන ජුනි මස 17 වැනිදාට නියම කෙරිණි.
