ඉතිහාසයේ මෙහෙම හෙණයක් පාත් වී තිබුණේ නැත.
“මේ මොහොතේ තිබෙන වායු තත්ත්ව දර්ශකය අනුව මිනිස්සුන්ට හුස්ම ගන්න සුදුසු තත්ත්වයක් නෙමෙයි තිබෙන්නේ. ඒ නිසා මේ වෙලාවේ ප්රවේසම් වෙන්න ඕනේ.“
“හෘදයාබාධ, අංශභාග, ශ්වසන රෝගවලට ගොදුරු වෙන්න පුළුවන්. ගැබිනි කාන්තාවන්, ළඳරුවන් සහ වැඩිහිටියන්ට දැඩි බලපෑම් ඇතිවෙන්න පුළුවන්. පුළුවන් තරම් ගෙදරම ඉන්න පුළුවන් නම් හොඳයි. ඇදුම රෝගීන්ට මේ තත්ත්වය ඉතාමත්ම ප්රබල ලෙස බලපානවා. මෙවැනි තත්ත්වයකදී මරණයට පවා ලක්විය හැකියි.”
සෞඛ්ය අමාත්යාංශයේ නියෝජ්ය සෞඛ්ය අධ්යක්ෂ ජනරාල් වෛද්ය තිලක් සිරිවර්ධන කීවේ එසේය.
කොළඹ ඇත්තේ හුස්ම ගන්නට හිතකර තත්ත්වයක් නොවේ. ඉතිහාසයේ මුල්ම වතාවට හුස්ම ගැනීම මරණීය අවදානමක් නිර්මාණය කර තිබුණේ එසේය. ,
.“වායුගෝලයේ තත්ත්වය යහපත් නෑ… කොළඹ පාසල් දරුවො පන්ති කාමරවලම ඉන්නවා නම් හොඳයි. එළිමනේ ක්රීඩා පිට්ටනිවල ක්රියාකාරකම් පුලුවන් තරම් අවම කරන්න. “
තවත් කුමක් කිව යුතුදැයි වැටහෙන්නේ නැත. දරුවෙකුට එළියට බැස හුස්ම ගැනීමේ අවදානම මුල්ම වරට අපට දැනුනේය. අධ්යාපන අමාත්යාංශය හෙට පාසල් නිවාඩු දුන්නේය.
මේ ලියන මොහොත වනවිට අපට සැතපුම් 1500ක් දුරින් ඇති දිල්ලි නගරයේ දූෂිත වායු ගෝලයේ තත්ත්වයට කොළඹ පත් වී ඇත. බෙංගාල බොක්කේ පවතින අඩුපීඩන තත්ත්වයත් සමග සුළං හැමීමේ වෙනසක් සිදුවී එම විස වායු ධාරා දකුණු දෙසට හමා විත් තිබිණි.
අද දහවල් වනවිට කොළම ඇතුළු ප්රධාන නගර කීපයක පැවතියේ මරණීය අඳුරකය. මිහිදුමෙන් වැසී ගියාක් මෙන් පෙනුණත් ගලාවිත් තිබුණේ මීදුම නොවේ. කාබන් ඩයොක්සයිඩ්, නයිට්රිජන් ඩයොක්සයිඩ්, සල්ෆර් ඩයොක්සයිඩ්, වැනි මාරක විෂ සහිත වායූන්ගෙන් අධි සාන්ද්රිත දූෂිත වායු ධාරාය. එම නගරවල වායුගෝලයේ දූෂණය සීඝ්රයෙන් ඉහළ ගියේය.
නවදිල්ලිය ආසන්නයේ ඉහළ අගයකින් වායු දූෂණය වී තිබුණේ යාබද ප්රනාත්වල ගොවීන් අස්වනු නෙලීමෙන් අනතුරුව අවශේෂ පිලිස්සීම, දීපාවලී ආගමික උත්සවය වෙනුවෙන් ගිනිකෙළි දැල්වීමෙන් පිටවූ කාබන් ඩයොක්සයිඩ්, නයිට්රජන් ඩයොක්සයිඩ් සහ සල්ෆර් ඩයොක්සයිඩ් වැනි අහිතකර වායුන් අධි ඝනත්වයෙන් වායුගෝලයට එක් වීම, වැනි හේතූන්ය. සාමාන්යයෙන් වායු ඝණ මීටරයක අහිතකර වායු අංශු තිබිය යුත්තේ 50කට අඩුවෙනි. නමුත් දිල්ලියේ ඒ තත්ත්වය සිවු අට ගුණයකින් වැඩිය. ඝණ මීටරයක අහිතකර වායු අංශු 400ක් හමුවේ. අද කොළඹ පැවතියේ දිල්ලියට සමාන තත්ත්වයකි.
යම් ප්රදේශයක වායු ගුණ තත්ත්ව දර්ශකයේ 0 සිට 50 දක්වා දැක්වෙනවා නම් එය යහපත් වායු තත්ත්වයකි. 51 දැක්වෙන්නේත් දූෂිත වූ වායු තත්ත්වයක් ලෙසය.
වායු ගුණ තත්ත්ව දර්ශකයේ 151 ඉක්මවන්නේ නම් එය ප්රබල අයහපත් වායූ දූෂණ තත්ත්වයකි. අද උදේ 08 වනවිට ජාතික ගොඩනැගිලි පර්යේෂණ ආයතනය නිකුත් කළ වාර්තාවට අනුව කොළඹ නගරයේ වායු ගුණ තත්ත්ව දර්ශකයේ අගය 246කි. තත්ත්වය ඔබ සිතා ගත යුතුය.
වායු ගුණ තත්ත්ව දර්ශකයේ අගය 237ක් ලෙස මුලතිව් දිස්ත්රික්කයෙන් වාර්තාවුණි. වව්නියාව දිස්ත්රික්කයේ අගය 229කි. යාපනය දිස්ත්රක්කයේ 226කි. ත්රිකුණාමල දිස්ත්රික්කයේ 214කි.
කළුතර දිස්ත්රික්කයේ 186ක් ලෙසත්, රත්නපුර 166ක් ලෙසත්, කෑගල්ල 163ක් ලෙසත්, පොළොන්නරුව 160ක් ලෙසත්, බදුල්ල 154ක් සහ මහනුවර 151 ලෙසත් සටහන්වී තිබුණි. අද අප ගත කළේ හුස්ම ගැනීමත් අවදානමක් වූ රටකය.
පරිසර අමාත්යාංශ ලේකම් විශේෂඥ වෛද්ය අමල් ජාසිංහ මේ සංකීර්ණයේ ස්වරූපය පැහැදිලි කළේය.
.”අහිතකර අංශු වැඩි වශයෙන් ඒකරාශී වීමෙන් ශ්රී ලංකාවේ වායුගෝලීය තත්ත්වය තාවකාලිකව නරක අතට හැරිලා. වර්ධනය වී ඇති කුණාටු තත්වය නිසා ඉන්දියාවේ දූෂිත වායුගෝලයේ ඇති දූවිලි අංශු වායු ධාරා සමග පැමිණෙමින් තියෙනවා.
මේ අංශු ඝණත්වය වැඩිවෙලා තියෙන්නෙ අපේ ප්රශ්නයකින් නොවෙයි. මේ තත්ත්වය අපට පාලනය කළ හැකි දෙයක් නෙමෙයි. ජාත්යාන්තරව පාලනය කළ යුතු ප්රශ්නයක්. සිදුවී ඇත්තෙ රටවල් වල දේශසීමා අභිබවා යන දූෂණයක්.
අප හිතනවා දින කීපයකින් මේ තත්ත්වය පාලනය වේවි. වයස්ගත උදවිය, කුඩා දරුවන්. හදවත් රෝගීන්, පෙනහළු රෝගීන්, අසාත්මික තත්ත්වයන් තියනවා නම් අඩුවෙන් නිවෙස්වලින් එළියට බහින්න. මුව ආවරණයක් පළදින්න.
ඉන් එහාට කළ හැකි දෙයක් නෑ.
පරිසර අමාත්යාංශ ලේකම්වරයා කියන්නේ අප ජීවත්වෙමින් ඇත්තේ මොනතරම් අස්ථාවර ලෝකය ද යන්නය.
පරිස්සමින් හුස්ම ගන්න… එය හුස්ම වැටෙන මිනිහෙකුට දිය හැකි බිහිසුණුම අවවාදය බව සිතමු.
