නොහික්මුණු සමූහයක් හික්මවා ගැනිම සදහා සමග ජන බලවේගයේ පෙළපාළියට කඳුළු ගෑස් සහ ජල ප්රහාර එල්ල කිරීමට සිදුවූ බව සංචාරක රාජ්ය ඇමතිනී ඩයනා ගමගේ පැවසුවාය.
රාජ්ය ඇමතිවරයි මේ බව කීවේ අද (31) පෙරවරුවේ එම අමාත්යාංශ පරිශ්රයේ පැවති මාධ්ය සාකච්ඡාවකට එක් වෙමිනි.
ඇය කීවේ ජනාධිපතිවරයා මේ වසරේදී ජනාධිපතිවරණයක් මෙන්ම පාර්ලිමේන්තු මැතිවරණයක් දෙන බවට පැහැදිලිවම ප්රකාශ කර තිබිය දී ඡන්දයක් ඉල්ලා විපක්ෂ නායක සජිත් ප්රේමදාස මිනිසුන් මහ පාරට බස්සවන්නේ සැලසුම් සහගතව ආර්ථිකයට හානි කර රට අස්ථාවර කිරීමට බවය.
රාජ්ය බලය අයුතු ලෙස ලබා ගැනීම සඳහා මහජනතාව කොළඹ අග නගරයට එක්රැස් කිරීමෙන් සිදුවන්නේ රටට ආර්ථික වශයෙන් දැඩි හානියක් බව කී ඩයනා ගමගේ ජනතාව උසිගන්වා මෙවැනි නොසන්ඩාල වැඩ කිරීමෙන් සංචාරකයන් මේ රටට පැමිණීම අඩපණ වන බව පැවසුවාය.
සජිත් ප්රේමදාසගේ පියා රාජ්ය ත්රස්තවාදයේ නියමුවා බවත් ඔහුගේ ප්රජාතන්ත්රවාදය 88,89කාලයේදී හොඳින්ම අත් විඳි බවත් පැවසූ රාජ්ය අමාත්යවරිය පියාගේ ගමන් මග ගැන මෙනෙහි කිරීමෙන් පසු ජනාධිපතිවරයාට චෝදනා කිරීම හෝ ඇඟිල්ල දිගු කිරීම කරන ලෙස කඳුළු ගෑස් ප්රහාරයක් ගැන මහ ලොකුවට කතා කරන සජිත් ප්රේමදාසගෙන් ඉල්ලා සිටින බවද ඇය කීවාය.
කඳුළු ගෑස් ප්රහාරයේදී මුජබර් රහුමාන් මන්ත්රීවරයා රෝහල් ගත කිරීම ඇයට සිනහව ගෙන දෙන කාරණයක් බවත් ඇමතිවරිය පැවසුවාය.
