එළඹෙන 19 වැනිදා පැවැත්වීමට නියමිත ශ්රි ලංකා නීතිඥ සංගමයේ නිලවරණය පැවැත්වීම වලක්වාලන වාරණ නියෝගයක් නිකුත් කරන්නැයි ඉල්ලා එම සංගමයේ සාමාජික නීතිඥවරියක්වන එම්ලියා ලිලන්ති ද සිල්වා විසින් අධිකරණය හමුවේ කළ ඉල්ලීම කොළඹ ප්රධාන දිසා විනිසුරු සඳුන් විදාන විසින් ඊයේ (17) ප්රතික්ෂේප කළේය.
සභාපති ධූරයට තරගවදින නීතිඥ රජීව් අමරසූරිය, නීතිඥ ආචාර්ය සුනිල් අබේරත්න නීතිඥ සංගමයේ නිලවරණ තේරීම්භාර නිලධාරී ඇතුළු 12 දෙනෙකුට එරෙහිව ඇය මෙම පැමිණිල්ල ගොනු කර තිබිණි.
පැමිණිලිකාරිය වෙනුවෙන් පෙනී සිටියේ ජනාධිපති නීතිඥ උපුල් ජයසූරිය ය. ඔහු අධිකරණය හමුවේ කරුණු දක්වමින් කියා සිටියේ සභාපති ධූරයට නාමයෝජනා භාර දුන් අනුර මැද්දේගොඩ තරගයෙන් ඉල්ලා අස් වීමෙන් පසුව ඉතිරි වූ අපේක්ෂකයින් දෙදෙනාගෙන් පමණක් නිලවරණය පැවැත්වීම සංගමයේ ව්යවස්ථාවට පටහැනි බවය.
නාමයෝජනා ඉල්ලා අස් කරගැනීම අපේක්ෂකයෙකුගේ මියයෑමට සමාන බවත්, අපේක්ෂකයෙක් මිය ගිය පසුව යළිත් නාමයෝජනා කැඳවීම ව්යවස්ථානුකූල බව ජනාධිපති නීතිඥවරයා පෙන්වා දුන්නේය. ඔහු අධිකරණයෙන් ඉල්ලා සිටියේ නාමයෝජනා නැවත කැඳවන ලෙසය.
වගඋත්තරකරුවන් වෙනුවෙන් ජනාධිපති නීතිඥ අලි සබ්රි, ඉක්රාම් මොහොමඩ්, සාලිය පීරිස්, තිස්ස වේරගොඩ සමග නීතිඥ ගුණරත්න වන්නිනායක පෙනී සිටියේය. ඔවුන් පැවසුවේ නීතිඥ සංගමයේ නිලවරණය පැවැත්වීම නීත්යානුකූළ බවය. සිය කැමැත්තේන් තරග වැදීමෙන් ඉවත්විම මරණයකට සමාන නොවන බව ද නීතිඥවරු අධිකරණයට කියා සිටියහ.
කරුණු සලකා බැලූ දිසා විනිසුරුවරයා ප්රකාශ කළේ පැමිණිල්ල බැලූ බැලුමට ජය ගත හැකි නඩුවක් සේ ඉදිරිපත් කර නොමැති බවය. අනුර මැද්දේගොඩ සිය ඉල්ලා අස්වීම දින 09කට පෙර ප්රකාශ තිබුණ බවය.
පැමිණිල්ලේ ඉල්ලිම ප්රතික්ෂේප කළ විනිසුරුවරයා මාර්තු 09 වැනිදා නඩුව යළි කැඳවීමට දින නියම කළේය.
