භාවනානුයෝගී හිමිවරුන් හත් නමකට ජීවිතය අහිමි කරමින් නා උයන ආරණ්ය සේනාසනයේ සිදුවූ ඛේදවාචකය පිළිබඳව අද (25) පාර්ලිමේන්තුවේ බලවත් ශෝකය පළ වුනේය.
බුද්ධශාසන ආගමික හා සංස්කෘතික කටයුතු අමාත්යා ආචාර්ය හිනිදුම සුනිල් සෙනවි මෙන්ම විපක්ෂ නායක සජිත් ප්රේමදාස ද මේ ඛේදවාචකය සම්බන්ධව පක්ෂ විපක්ෂ මුළු පාර්ලිමේන්තුව වෙනුවෙන්ම සාතිශය සංවේගය පල කර සිටියේය.
මේ සෝචනීය අවස්ථාවේ දී රජයක් විදිහට කළ හැකි සියලුම මැදිහත්වීම් උපරිමයෙන් සිද්ධ කරන බව ඇමතිවරයා ප්රකාශ කළේය. අමාත්යවරයා පැවසුවේ මේ වනවිට නියෝජ්ය අමාත්යවරයා සිද්ධිය වූ ස්ථානයට ගොස් ඇති බවය. එමෙන්ම විදේශ කටයුතු නියෝජ්ය අමාත්යවරයා මෙන්ම නාමල් කරුණාරත්න නියෝජ්ය අමාත්යවරයා ද මේ වනවිට මේ ඛේදනීය අවස්ථාවේ දී අවශ්ය මැදිහත්වීම සඳහා කැපවී සිටින බව බුද්ධශාසන ඇමතිවරයා පාර්ලිමේන්තුවට දැනුම් දුන්නේය.
තමන්ද ප්රායෝගිකවම මැදිහත් වෙමින් නාවිමන ආරණ්ය සේනානයේ පුණ්යකර්ම සඳහා සහභාගී වී ඇති බව පැවසූ විපක්ෂ නායකවරයා මේ සංවේගජනක අවස්ථාවේ දී රජය මේ අවස්ථාවට සිදුකරන මැදිහත්වීම සම්බන්ධව සිය ස්තුතිය ද පල කළේය. එමෙන්ම විපක්ෂයක් ලෙස කළ යුතු සියලුම උපකාර සිදුකරන බවටත් විපක්ෂනායකවරයා පොරොන්දු වුනේය.
