දේශබන්දු තෙන්නකෝන්ට පොලිස්පති ධූරයේ කටයුතු කිරීම වළක්වාලමින් නිකුත් කළ නියෝගයට පාදක වූ පෙත්සම්වලට අතරමැදි පාර්ශවකරුවන් ලෙස මැදිහත් වී කරුණු දැක්වීමට අවසර දෙන ලෙස මෙන්ම ඔහුට එරෙහිව නිකුත් කර ඇති අතුරු තහනම් නියෝගය ඉවත දමන ලෙස ඉල්ලා ආචාර්ය බෙල්ලන්විල ධම්මරතන, කොල්ලුපිටියේ රාහුල, මහාචාර්ය අගලකඩ සිරිසුමන යන හිමිවරුන් ගොනුකර තිබූ පෙත්සම් යසන්ත කෝඳාගොඩ, අචල වෙන්ගප්පුලි හා මහින්ද සමයවර්ධන යන ත්රි පුද්ගල විනිසුරු මඩුල්ල විසින් අද (18) පස්වරුවේ ප්රතික්ෂේප කළේය.
එමෙන්ම පෙත්සම් විභාගය පෙර නියම කර තිබුණු පරිදිම නොවැම්බර් 11 වැනිදා විභාගයට ගැනීමට විනිසුරු මණ්ඩලය නියෝග කළේය.
තරුණ ජනමාධ්ය වේදීන්ගේ සංගමයේ සභාපති තරිඳු ජයවර්ධන ඇතුළු පාර්ශවකරුවන් 09 දෙනෙක් ගොනු කළ මූලික අයිතිවාසිකම් පෙත්සම් කීපයක් සලකා බැලූ යසන්ත කෝඳාගොඩ, අචල වෙන්ගප්පුලි හා මහින්ද සමයවර්ධන යන ත්රිපුද්ගල විනිශ්ඡය මණ්ඩලය එම පෙත්සම් විභාගය අවසන්වන තුරු දේශබන්දු තෙන්නකෝන්ට පොලිස්පති ධූරයේ කටයුතු කිරීම වළක්වමින් පසුගිය ජූලි 24 වැනිදා අතුරු තහනම් නියෝගයක් නිකුත් කර තිබිණි.
අද අතරමැදි පෙත්සම් විභාගය කැඳවූ අවස්ථාවේ දී නිතිපතිවරයා වෙනුවෙන් අතිරෙක් සොලිසිටර් ජෙනරාල් හෙන්රි පුල්ලේ සහ රජයේ අධිනීතිඥ සජිත් බණ්ඩාර පෙනී සිටියහ. අතරමැදි පෙත්සම්කාර හිමිවරුන් වෙනුවෙන් මනෝහර ද සිල්වා පෙනී සිටියේය.
