දිනසේන රතුගමගේ –
යාපනයේ වැසියන්ට විදේශ රටවලින් මුදල් ගෙන්වා දෙන නීති විරෝධී ” උණ්ඩියල් ” ජාවාරමක නිරත වෙමින් යාපනයේ පුද්ගලයින්ගෙන් රුපියල් දස ලක්ෂ අනූදහසක මුදල වංචා කළ පොදු ජන පෙරමුණේ දිස්ත්රික් සංවිධායකවරයෙක් ඊයේ ( 14 ) පොලීසිය විසින් යාපනයේදී අත් අඩංගුවට ගෙන තිබේ.
යාපනයේ වැසියන් කීප දෙනෙකු විසින් යාපනය පොලීසියට කරන ලද පැමිණිලිවලින් පසුව ක්රියාත්මක වූ යාපනය පොලීසියේ විශේෂ විමර්ශන ඒකකයේ නිලධාරීන් පිරිසක් පැමිණිලි සම්බන්ධයෙන් මූලික පරීක්ෂණ ආරම්භ කොට සැකකරුව අත් අඩංගුවට ගෙන තිබේ.
දේශපාලන බලය මත මෙම සැකකරු විසින් නීති විරෝධී ලෙස මුදල් සම්ප්රේෂණය කෙරන ” උණ්ඩියල් ” නමින් හදුන්වන මුදල් හුවමාරු කිරීමේ ව්යාපාරයක් පවත්වා ගෙන ගොස් තිබේ.
විදෙස් රටවලින් එවනු ලබන මුදල්වලින් විශාල මුදල් ප්රමාණයක් ඔහු විසින් වංචනිකව ලබා ගෙන අති නමුත් දැනට යාපනය පොලිසියට පැමිණිලි ලැබී ඇත්තේ රුපියල් දස ලක්ෂ අනූදහසක මුදලක් වංචා කිරීම සම්බන්ධයෙන් පමණකි.
උණ්ඩියල් ක්රමය නීති විරෝධී මුදල් සම්ප්රේෂණ ක්රමයක් නිසා මුදල් අහිමි වූ විශාල පිරිසක් ඔවුන්ට අනවශ්ය ප්රශ්නවලට හා නීතිමය ගැටලු වලට මුහුණ දීමට සිදු වෙතැයි බියෙන් පොලීසියට පැමිණිලි කිරීමෙන් වැළකී සිට ඇත.
විදේශ රටවල රැකියා කරණ උතුරේ වැසියන් බොහෝ දෙනෙකු බදුවලින් බේරීමට මෙම නීති විරෝධී උණ්ඩියල් ක්රමය හරහා මුදල් එවනු ලබන අතර මහ බැංකුව විසින් එම ක්රියාව නීති විරෝධී ක්රියාවක් ලෙස මේ වන විට නම් කොට එවැනි ජාවාරම් වල නිරත වන්නන් අත් අඩංගුවට ගැනීමටද ක්රියා කරණු ලබයි.
නමුත් උතුරේ වැසියෝ තවමත් මෙම උණ්ඩියල් ක්රමය ඔස්සේ තම ඥාතීන්ට විදෙස් රටවල සිට මුදල් එවති. මේ නිසා රජයට විශාල බදු ආදායමක් අහිමි වෙමින් පවතී.
එමෙන්ම එසේ එවනු ලබන මුදල්වල සුරක්ෂිත භාවයක් වගකීමක් හෝ ආරක්ෂාවක්ද නොමැත.
අත් අඩංගුවට ගත් සැකකරු යාපනය අධිකරණය වෙත ඉදිරිපත් කිරීමට යාපනය පොලීසිය පියවර ගෙන තිබේ.
