දිනසේන රතුගමගේ –
යාපනයේ දූපත් තුනක විදුලි බලාගාර ඉදිකිරීමේ කටයුතු චීනයට බාර දීම නිසා යළිත් උතුරේ අනවශ්ය කලබලයක් ඇතිවිය හැකි බැවින් මේ සම්බන්ධයෙන් බුද්ධිමත් තීරණයක් ගන්නා ලෙස තමන් රජයෙන් ඉතා නිහතමානීව ඉල්ලා සිටින බව ද්රවිඩ එක්සත් විමුක්ති පෙරමුණේ නායක ආනන්ද සංගරී මහතා ඊයේ ( 15 ) දා කිළිනොච්චියේදී පැවසීය.
කිළිනොච්චිය මාධ්ය මධ්යස්ථානයේදී මේ බව සදහන් කළ ඔහු කියා සිටියේ උතුරේ විරෝධතා පැවැත්වීමට මාන බලාගෙන සිටින දෙමළ දේශපාලන පක්ෂ වලට රජය අවස්ථාවක් හිමිකොට දීම නොකළ යුතු බවයි.
රජය ඉන්දියාව අතහැර දෙමළ ප්රදේශයක සංවර්ධන කටයුතු චීනයට බාර දිමෙන් උතුරේ දෙමළ දේශපාලන පක්ෂ වලට පමණක් නොව ඉන්දියාවටද රජය කෙරෙහි අප්රසාදයක් ඇතිවීමට හේතුවන බව ආනන්ද සංගරී මහතා පෙන්වා දුන්නේය.
යාපනයේ ඩෙල්ෆ්ට් අනලතිව් හා නාගදීපය යන දූපත් වල ආරක්ෂක කඳවුරු ගණනාවක්ම පිහිටා ඇති අතර එහි වෙසෙන ජනතාව ඉතා සහයෝගයෙන් ආරක්ෂක අංශ සාමාජිකයින් සමග කටයුතු කරන බවද සංගරී මහතා පෙන්වා දුන්නේය.
යාපනයේ දූපත් ප්රදේශ වල සංවර්ධන කටයුතු ඉන්දියාවට ලබා නොදී චීනයට හෝ වෙනත් රටකට ලබාදීමට කටයුතු කිරීමේදි මේ වන විට විශාල ප්රශ්නයක් හා අර්බූදයක් බවට පත්ව ඇති කච්චතීව් දූපත සම්බන්ධයෙන්ද ඉන්දියාවෙන් ප්රශ්න උද්ගත විය හැකි බව ආනන්ද සංගරී ඉතිහාසයේ සිදුවීම් උදාහරණයට ගනිමින් පැහැදිලි කළේය.
