පසුගිය 14 දා වරකාපොල, ගලපිටමඩ, දුනුමලවත්ත මාරුමුත්තු අම්මාන් කෝවිල ඉදිරිපට මාර්ගයේ දී වෙඩි තබා ඝාතනය කළ දුනුමාලේ සරත්ගේ ඝාතනය සිදුකර ඇත්තේ ඩුබායි රාජ්යයේ වෙසෛන පාතාල අපරාධකරුවන් දෙදෙනෙකුගේ කොන්ත්රාත්තුවක් මත බව විමර්ශන අංශ හෙළි කරගෙන ඇත.
පසුගිය 14 දා අලුයම කැබ් රථයකින් ගමන් කරමින් සිටි දුනුමාලේ සරත්ව අප්රකට ඝාතකයෙක් විසින් වෙඩි තබා ඝාතනය කිරීම සම්බන්ධව ගලපිටමඩ පොලිස් ස්ථානය විසින් විමර්ශන ආරම්භ කර තිබිණි.
‘දුනුමාල සරත්’ යහපත් ඉතිහාසයක් තිබුණු පුද්ගලයෙක් නොවේ. වර්ෂ 2015 වසරේ සිදු කළ මනුෂ්ය ඝාතනයක චූදිතයකු බව ද පැවසිනි. ඒ සියලුම පසුබිම් තොරතුරු සමග විමර්ශන කටයුතු ආරම්භ කළ විමර්ශකයින්ට එම ප්රදේශයේ ගල්ගොඩක් යට සඟවා තිබිය දී ජංගම දුරකථනයක්, ටී56 පතොරමක් සහ ගමන් මළු දෙකක් මුලින්ම සොයාගෙන තිබිණි.
පොලිසිය මුලින්ම මෙම ජංගම දුරකථන සබඳතාවය හිමි පුද්ගලයා කවරෙක්දැයි සොයා ගත්තේය. ඔහු මට්ටක්කුලිය සමිත්පුර ප්රදේශයේ පදිංචි 42 හැවිරිදි පුද්ගලයෙකි. ඝාතනයට අනුබල දීමේ චෝදනාව මත පළමු ඔහුව අත්අඩංගුවට ගනු ලැබුවේය. ඒ පසුගිය 17 වැනිදා ය.
එම සැකකරුගෙන් සිදුකළ ප්රශ්නකිරීම්වල දී සිම් කාර්ඩ් පත් දෙකක්, මට්ටක්කුලිය සමිත්පුර ප්රදේශයේ වෙනත් පුද්ගලයෙකුගේ ඉල්ලීමට ඔහු විසින් සපයා දී තිබුණු බව හෙළි විය. ඒ තොරතුරු ඔස්සේ අදාල පුද්ගලයා එදිනම සවස අත් අඩංගුවට ගත්තේය. ඔහු මට්ටක්කුලියේ පදිංචි 22 හැවිරිදි තරුණයෙකි.
ඔහුගෙන් ප්රශ්න කිරීම ආරම්භ කළේය. තරුණයා කීවේ ඩුබායිහි රැඳී සිටින පුද්ගලයින් පුද්ගලයින් දෙදෙනෙකුගේ දැනුම් දීම මත මෙම තරුණයා විසින් පළමු සැකකරුගෙන් ලබා ගත් සිම් කාර්ඩ් පත් දෙක වෙනත් පුද්ගලයෙකුට ලබා දී ඇති බවය. මෙම තරුණයා ඩුබායි රාජ්යයේ සිටින පුද්ගලයින් දෙදෙනා සමග සමීප සබඳතා පවත්වන්නෙක් බව හෙළි වී තිබේ.
ඩුබායි හි රැඳී සිටින පුද්ගලයින් දෙදෙනා ගැන සොයා බැලීමේ දී ඔවුන් මෙරට සංවිධානාත්මක අපරාධ කල්ලියක් සමග සමීප සම්බන්ධතා පවත්වන පුද්ගලයින් බව හෙළි වී ඇත.
අපරාධ කල්ලියක ප්රධානීන්ගේ උපදෙස් මත ඩුබායි රැඳී සිටින මෙම පුද්ගලයින් දෙදෙනා දුනුමාලේ සරත් ඝාතනය මෙහෙයවා ඇතැයි විමර්ශනවලදී අනාවරණය වූ බව පොලිසිය කියයි.
ගලපිටමඩ පොලිසිය සහ සීතාවක කොට්ඨාස අපරාධ විමර්ශන අංශය වැඩිදුර විමර්ශන සිදුකරයි.
