මනම්පිටිය නිමල් ජයරත්න –
දිඹුලාගල හඳපාන්විල විල්ලුවේ ධීවර කටයුතු සඳහා ගොස් ඊයේ (20) සිට අතුරුදහන්ව සිටි ධීවරයන් දෙදෙනාගෙන් එක් ධීවරයෙකුගේ සිරුරක් පොලිසිය සහ ගම්වාසීන් විසින් එක්ව කළ මෙහෙයුමක දී අද (21) දහවල් සොයාගත් බව මනම්පිටිය පොලිසිය කියයි.
20 වෙනිදා උදෑසන දිඹුලාගල මගුල්දමන ගම්මානයේ අංක 109 ලිපිනයේ පදිංචි තිදරු පියෙකු වන ආර්.බී. නිහාල් කුමාර සහ මගුල්දමන ගම්මානයේ අංක 50 ලිපිනයේ පදිංචි දෙදරු පියෙකු වන අයි.ජි. ජයන්ත සූරිය උදය කුමාර මෙසේ අතුරුදහන් වී සිටියහ.
ධීවර කටයුතු සඳහා පිටත්ව ගිය ඔවුන් දෙදෙනා සවස්වනතුරුම යළි නොපැමිණීම නිසා ඥාතීන් ඒ බව පොලිසියට පැමිණිලි කර තිබිණි.
සිදුකළ මෙහෙයුමක දී ධීවරයන් දෙදෙනාගෙන් අයි.ජී. ජයන්ත සූරිය උදය කුමාර ධීවරයාගේ සිරුර ඔරුවකට යටවී තිබෙද්දී අද දහවල් වනවිට සොයාගැනීමට හැකියාව ලැබුණු බව මනම්පිටිය පොලිස් ස්ථානාධිපති පොලිස් පරීක්ෂක අසේල සරත් කුමාර පැවසුවේය.
අතුරුදහන් සිටින අනිත් ධීවරයා සොයා පොලිසිය සහ ධීවරයන් එක්ව මෙහෙයුමක් ආරම්භ ඇත.
මියගිය ධීවරයාගේ පශ්චාත් මරණ පරීක්ෂණ කටයුතු සවස සිදුකිරීමට කටයුතු කර ඇති බව මනම්පිටිය පොලිසිය සඳහන් කරයි.
පොළොන්නරුව ජ්යෙෂ්ඨ පොලිස් අධිකාරී නිශාන් ද සිල්වාගේ උපදෙස් මත මනම්පිටිය පොලිස් ස්ථානාධිපති පොලිස් පරීක්ෂක අසේල සරත් කුමාර ඇතුළු පොලිස් නිලධාරී කණ්ඩායමක් වැඩිදුර පරීක්ෂණ සිදු කරයි.
