2026 නව වසර උදාවත් සමඟ වාර්තා වූ ප්රථම වෙඩි තැබීම ඊයේ (01) රාත්රියේ කඩුවෙල, නවගමුව ප්රදේශයෙන් වාර්තා විය. මෙම ප්රහාරයෙන් එක් පුද්ගලයෙකු ජීවිතක්ෂයට පත්ව තවත් දෙදෙනෙකු බරපතල තුවාල ලබා තිබේ.
නවගමුව, කොරතොට මැණිකාගාර පාර ප්රදේශයේ කුලී පදනම මත ලබාගත් නිවසක ජීවත් වෙමින් සිටි තරුණයින් තිදෙනෙකු නව වසර උදාව සමරමින් මත්පැන් සාදයක් පවත්වමින් සිට ඇත. ඊයේ (ජනවාරි 01) රාත්රී 9.30 ත් 10.00 ත් අතර කාලයේදී යතුරුපැදියකින් සහ ත්රිරෝද රථයකින් පැමිණි සන්නද්ධ පිරිසක් මෙම නිවසට කඩා වැදී පිස්තෝල අවිවලින් මෙම තිදෙනා ඉලක්ක කරගෙන වෙඩි තබා තිබේ.
වෙඩි ප්රහාරයට ලක්වූවන් අතරින් 20 හැවිරිදි බොරැල්ල ප්රදේශයේ පදිංචිකරුවෙකු එම ස්ථානයේදීම මියගොස් ඇත. අනෙක් පුද්ගලයන් දෙදෙනා අතුරුගිරිය ඔරුවල ප්රාදේශීය රෝහලට ඇතුළත් කිරීමෙන් පසු වැඩිදුර ප්රතිකාර සඳහා හෝමාගම රෝහල වෙත මාරු කර යවා තිබේ. තුවාල ලැබූවන් අම්බලන්ගොඩ සහ දෙමටගොඩ ප්රදේශවල පදිංචිකරුවන් බව හඳුනාගෙන ඇත.
එක් තුවාලකරුවෙකුගේ සිරුරේ වෙඩි උණ්ඩ 4ක් රැඳී තිබෙන අතර අනෙක් පුද්ගලයාගේ සිරුරේ එක් වෙඩි උණ්ඩයක් ඇතැයි රෝහල් ආරංචි මාර්ග පවසයි.
සිද්ධිය වූ ස්ථානයේ තිබී හිස් පතොරම් කොපු 15ක් පොලිසිය විසින් සොයාගෙන ඇත. මූලික විමර්ශන වලදී අනාවරණය වී ඇත්තේ වෙඩි ප්රහාරයට ලක් වූ තරුණයින් තිදෙනා මීට මාස එකහමාරකට පමණ පෙර මෙම නිවස කුලියට ගෙන පදිංචියට පැමිණ ඇති බවය.
මෙම වෙඩි තැබීමට හේතුව ලෙස පොලිසිය සැක කරන්නේ මීට මාස එකහමාරකට පෙර “වනාතේ චතූ” නැමැත්තාගේ හිතවතියකට තියුණු ආයුධවලින් පහරදීමේ සිද්ධියකට පළිගැනීමක් වශයෙනි. එම ප්රහාරය එල්ල කළේ යැයි සැක කෙරෙන පුද්ගලයන් ඉලක්ක කර වනාතේ චතූගේ පාර්ශවය විසින් මෙම වෙඩි තැබීම සිදුකර ඇති බවට විමර්ශන අංශ සැක කරයි.
දැනට නවගමුව පොලිසිය සහ නුගේගොඩ අපරාධ විමර්ශන අංශය එක්ව සැකකරුවන් අත්අඩංගුවට ගැනීම සඳහා පුළුල් විමර්ශන ආරම්භ කර ඇත.
