තැපැල් වර්ජනය හේතුවෙන් රුපියල් මිලියන 35- 40 ප්රමාණයක දෛනික පාඩුවක් දෙපාර්තමේන්තුවට සිදුවන බව නියෝජ්ය තැපැල්පතිනි චමීෂා ද සිල්වා පැවසුවාය.
අතිකාල දීමනා ගැටලුව සහ ඇඟිලි සලකුණු යන්ත්රව පැමිණීම සහ පිටවීම සලකුණු කිරීම ඇතුළු කරුණු කීපයක් මුල් කරගෙන තැපැල් වෘත්තීය සමිති ආරම්භ කළ වැඩ වර්ජනය තුන්වැනි දිනටත් ක්රියාත්මක වෙමින් ඇත්තේ තැපැල් නිලධාරීන්ගේ සියලු නිවාඩු අවලංගු කර ඇති පසුබිමකය.
එක්සත් ජාතික තැපැල් සේවක සංගමය ශ්රී නිදහස් තැපැල් හා විදුලි පණිවිඩ පොදු සේවක සංගමය, එක්සත් තැපැල් සහ විදුලි සංදේශ සේවක සංගමය, ශ්රී ලංකා නිදහස් තැපැල් සේවා සංගමය, ශ්රී ලංකා තැපැල් සේවා පෙරමුණ ඇතුළු වෘත්තීය සමිති 23ක් මෙම වැඩ වර්ජනයට එක් වී සිටිති.
වෘත්තීය සමිති පෙන්වා දෙන්නේ වැඩවර්ජනය අතර තුර සාකච්ඡාවක් පැවැත්වීමට පැය 24 පුරාම සූදානම් බවය. එහෙත් තැපැල්පතිවරයා ප්රකාශ කළේ සාකච්ඡා පැවැත්වීමට රජය ඕනෑම වෙලාවක සූදානම් නමුත් සාකච්ඡා සඳහා විවෘත විය හැක්කේ වැඩ වර්ජනය අත්හැර දැමීමෙන් පසුව බවය.
