පසුගිය දා හිටපු කතානායකවරුන්ගේ වියදම් සම්බන්ධව තමන් විසින් පාර්ලිමේන්තුවට ඉදිරිපත් කළ වාර්තා සම්බන්ධව අවඥා සහගත ප්රකාශ කළ හිටපු කථානායක මහින්ද යාපා අබේවර්ධනට නැවත වරක් පිළිතුරක් ලබා දිය යුතු බවත්, තමන් විසින් ඉදිරිපත් කළ සියලුම දත්ත සහ වාර්තා ලබා ගත්තේ කථානායකවරයාගේ අවසරය මත කථානායක කාර්යාලයෙන් බවත් සභානායක බිමල් රත්නායක අද (12) පාර්ලිමේන්තුවට විශේෂ ප්රකාශයක් කරමින් දන්වා සිටියේය.
හිටපු කතානායකවරුන්ගේ මූල්ය වියදම්වල පාර්ලිමේන්තු මූල්ය ධ්යක්ෂ ජී.සරත් කුමාර විසින් සහතික කළ පිටපත් නැවත වරක් ඉදිරිපත් කර හැන්සාඩ්ගත කරමින් සභානායකවරයා පැවසුවේ පාර්ලිමේන්තුවත් ජනතා මුදලින් නඩත්තුවන ආයතනයක් බවය. රජයේ මුදල් පිළිබඳ වගකීම සහිත, ජනතාවගේ බදු මුදලින් නඩත්තුවන පාර්ලිමේන්තුවේ වියදම් පිළිබඳව පාර්ලිමේන්තුව ජනතාවට දැඩිව වගකිව යුතු බවත්, ජනතා නියෝජිතයින් ලෙස එම මුදල් අරපිරිමැස්මෙන් භාවිතා කිරීමේ ආදර්ශය ජනතා නියෝජිතයින් විසින් සැපයිය යුතු බවත් සභානායකවරයා අවධාරණය කළේය.
පාර්ලිමේන්තුවේ කතා නායක, නියෝජ්ය කතා නායක්, නියෝජ්ය කාරක සභා සභාපතිවරුන්ගේ අනෙක් සියලුම වියදම් වාර්තා හැන්සාඩ්ගත කළ සභානායකවරයා 2023 සිට මේ දක්වා හිටපු සහ ඉන්න කතානායකවරුන්ගේ ඉන්ධන වියදම්වල සහතික පිටපත්වල ඇති දත්ත අද යළිත් පාර්ලිමේන්තුවට ප්රකාශ කළේ මේ ආකාරයටය.
හිටපු කතා නායක ගරු මහින්ද යාපා අබේවර්ධන මහතා 2023 ජනවාරි ඉඳලා 2023 දෙසැම්බර් 31 දක්වා එතුමා වාහන 08ක් භාවිතා කර තිබෙනවා. ඒ සඳහා මිලියන 26ක ඉන්ධන භාවිතා කර තිබෙනවා. එය පාර්ලිමේන්තුවේ මුල්ය අධ්යක්ෂතුමා සහතික කර තිබෙනවා. මම එය හැන්සාඩ්ගත කරනවා.
2023 වර්ෂයේ නියෝජ්ය කතානායක අජිත් රාජපක්ෂ මහතා… ඔහු වාහන 06ක් භාවිතා කරලා තියනවා. මිලියන 14ක ඉන්ධන වියදම් ලබාගෙන තියනවා.
9 වැනි පාර්ලිමේන්තුවේ නියෝජ්ය කාරකසභා සභාපති අංජන් රාමනාදන්. වාහන 4යි. මිලියන 7.8ක ඉන්ධන භාවිතා කර තියනවා.
2024 වසරේ දී හිටපු කතානායකතුමා වාහන 09ක් සහ මිලියන 33ක ඉන්ධන භාවිතා කර තිබෙනවා. 2024 පළවෙනි මාස 09ට. හිටපු නියෝජ්ය තකානායක තුමා මිලියන 13ක ඉන්ධන භාවිතා කර තිබෙනවා වාහන 6ක් භාවිතා කර තිබෙනවා. 2024 පළවෙනි මාස 09ට හිටපු නියෝජ්ය කාරක සභා සභාපතිතුමා වාහන 4ක් සඳහා රුපියල් මිලියන 7.2ක ඉන්ධන භාවිතා කර තිබෙනවා. මේ සියල්ලම පාර්ලිමේන්තුවේ මූල්ය අධ්යක්ෂවරයාවන ජී. සරත් කුමාර විසින් සහතික කර සනාථ කොට තිබෙනවා.
ඒ වගේම වර්තමාන පාර්ලිමේන්තුවේ වෙනසත් මම කියලා අවසන් කරන්නම් ගරු කතානායක තුමනි. 2024 වර්ෂයේ පළවෙනි මාස එක හමාරට නව කතානායකතුමා විසින් භාවිත කළ ඉන්ධන සඳහා වියදම එක් ලක්ෂ විසි තුන් දාහයි. නියෝජ්ය කතා නායකතුමාගේ ඉන්ධන වියදම රුපියල් හතලිස් පන් දාහයි. නියෝජ්ය කාරක සභා සභාපතිනියගේ වියදම රුපියල් දහ අට දාහයි.
2025 ජනවාරි මාසයේ ඔබතුමාගේ ඉන්ධන වියදම දෙලක්ෂ දහ අට දාහයි. නියෝජ්ය කතානායකතුමාගේ 23000යි. කාරක සභා සභාපතිතුමියගේ වියදම 81000යි. පෙබරවාරි 25 දක්වා ඔබතුමාගේ ඉන්ධන වියදම රුපියල් එක් ලක්ෂ විසි තුන් දාහයි. නියෝජ්ය කතානායකතුමාගේ වියදම රුපියල් විසි පන් දාහයි.
වාර්තා ඉදිරිපත් කිරීම පමණක් නොවෙයි, අප ආදරශයෙනුත් ඔබතුමා ලබා දුන් ආදර්ශය අගය කරනවා. ඒ වගේම ඔබතුමාගේ අභිමතය පරිදි විගණනයෙන් එන තීරණ මත අවශ්ය නීතිමය ක්රියාමාර්ග උනත් ගන්න පුලුවන්නම් ගන්න කියලා ඉල්ලනවා.
