යලිත් රට මළගමක් විය යුතු කතාවක් ඇසේ. පාසල් දරුවන් පිරිසක් රැගත් පාසල් වෑන් රථයක් කුලියාපිටිය පල්ලේ පිටිය ප්රදේශයේ දි වැලි ටිපර් රථයක ගැටී පාසල් යන්නට ගිය දියණිවරු දෙදෙනෙක් මිය ගොස්ය. තවත් දරුවන් සිවු දෙනෙක් ජීවිතය සමග පොර බදමින් කොළඹ ජාතික රෝහලේ සහ කුරුණෑගල ශික්ෂණ රෝහලේ දැඩි සත්කාර ඒකකවලය.
මේ මොන පජාත මිනිසුන් සහිත රටක් දැයි අපට තේරෙන්නේ නැත. සමාජයේ වගකීම් රහිත අවිනීතකම මහ පාරේදී නිරුවත් වී ඇත. සිස්ටම් චේන්ජ් එකක් ගැන කතා කරන්නේ මේ අශීලාචාර මිනිස්සුය. හැමදාම මහ පාරේ දී 08 දෙනෙක් මිය යන රටක පාසල් දරු පැටවු මිය යමින් ඇත්තේ සිදුවන්නේ මෙලෝ හසරක් නොදැනය.
මේ වනවිට රිය අනතුරින් පාසල් සිසුවියන් 02ක් මිය ගොස් ඇත. ඒ 12 සහ 13 හැවිරිදි දැරියන් දෙදෙනෙකි. 63න් හැවිරිදි වෑන් රථ රියදුරාත් මරණයට පත් වූයේය. කුලියාපිටිය පල්ලේපිටිය වෙල්පල පාලම අසලදී මෙම අනතුර සිදුවී තිබිණි. සිද්ධිය ඇසින් දුටු ත්රී රෝද රථකරුවෙක් අනතුර මාධ්යයට විස්තර කළේය.
“හන්දියට මෙහා මම වීල් එක නතර කළා මට කෝල් එකක් ඇවිත්. ඊට පස්සේ මම දැක්කා අනතුරට පත් වුන වාහනය මාව පහු කරන් ගියා. ඒ එක්කම කුලියාපිටිය පැත්තෙ ඉඳන් ආපු ටිපර් එක වෑන් එකේ වැදිලා වෑන් එක විසිවුනා. මම මීටර් දෙසීයක් විතර පස්සට වෙලා හිටියේ. “
“මම එතෙන්ට යනකොට දරුවො දෙන්නෙක් වැටිලා හිටියා. ඉතිරි කට්ටිය හිරවෙලා වගේ හිටියේ. අපි හැකි ඉක්මනින් දරුවො ටික රෝහල්ගත කිරීමට කටයුතු කළා. මම දැකපු විදිහට වෑන් එකේ රියදුරු එතනම නැතිවෙලා හිටියේ. එයාවත් 1919ට කතා කරලා රෝහල්ගත කළා.” ඔහු පැවසුවේය.
වෑන් රථයේ සිටි තවත් සිසුවියන් 13ක් තුවාල ලබා කුලියාපිටිය රෝහලට ඇතුළත් කර තිිබිණි. බරපතල තුවාල ලැබූ එක් සිසුවෙක් කොළඹ ජතික රෝහලේය. තවත් තිදෙනෙක් කුරුණෑගල ශික්ෂණ රෝහලේය.
අනතුර සම්බන්ධයෙන් ටිපර් රථයේ රියදුරු අත් අඩංගුවේය.
කුලියාපිටිය කලාප අධ්යාපන අධයක්ෂ සී.ඩී.බන්දුලානී බස්නායක රෝහල අසලදී මාධ්යයට කතා කළාය. ඇය කියන්නී කුලියාපිටිය ප්රධාන පාසල්වල අධ්යාපනය ලබන සිසුවියන් 15 දෙනෙක් අනතුරට ලක් වූ බවය.
කුලියාපිටිය මධ්යමහා විද්යාලයේ දරුවන් 03ක් සහ සාරානාත් විද්යාලයේ දරුවෙක්, කුලියාපිටිය විශාඛා විද්යාලයේ දරුවන් 04 දෙනෙක්, කුලියාපිටිය පිරිමි විද්යාලයේ එක් දරුවෙක්, කුලියාපිටිය සුරදුත විද්යාලයේ දරුවන් 06 දෙනෙක් මේ අනතුරට ලක් වූ බව ඇය කීවාය.
“මේ අනතුරින් සුරදූත විද්යාලේ දරුවන් 02ක් මිය ගොස් තියන බව අපට දැනගන්න ලැබුණා.දරුවන්ගේ ප්රවාහන පහසුකම් සලසන කාලයේ දී විශේෂයෙන්ම බර වාහන නතර කරන්නට පුලුවන් නම් එ් ගැන තීන්දුවක් ගන්න පුලුවන්නම් ගොඩාක් හොඳයි…” අධ්යාපන අධ්යක්ෂවරිය කීවාය.
අප අටෝ රාසියක් සැලසුම් හදන රටකි. මෙම වසරේ අගෝස්තු 01 වැනිදා වනවිට පමණක් මේ දක්වා මාරක රිය අනතුරු 1,605ක් වාර්තා වී තිබිණි. එය පසුගිය වසරට වඩා අනතුරු 171ක වැඩිවීමක් බවත් පොලිසිය නිවේදනය කළේය. මාර්ග අනතුරු හේතුවෙන් සිදුවන මරණ සංඛ්යාව ද ඉහළ ගොස් ඇති අතර, මේ වසරේ අගෝස්තු මස 01 දා වනවිට මරණ 1,700ක් වාර්තා වී ඇති අතර එය පසුගිය වසරට වඩා මරණ 193ක වැඩිවීමකි.
මේ රටේ කාලකන්ණි පාලකයින්ට හැමදාම රටේ විෂය ප්රාමාණික විද්වතුන් ඉල්ලූ දෙයක් තිබේ. එනම් පාසල් ප්රවාහන වාහන ප්රමිතිගත කරන ලෙසය. ඔබට ඔබේ ගම්වල දකින ඇත්ත සිහි කරගන්නට හැකිය. මේ දරුවන් ප්රවාහනය කරන වාහන දරමඩු බඳු අබලි ඒවා ය. අවුරුදු 25 -30 ඇතැම්විට අවුරුදු 40 පැරණි කෑලි හැලුන අබලන් වාහන පාසල් දරුවන් ප්රවාහනයට යොදාගන්නට ඉඩ දී ඇති කාලකන්නි රටක පුනරුදය ගැන කතා කර තේරුමක් නොවේ. මේ තත්ත්වයන් පාලනය කිරීමට අමුතු අපහසුවක් නැත. අද දහවල් දෙකට පසු පාරට බැස බැලුවත් මේ මිනී පෙට්ට් බඳු වාහන දරු පැටවුන් පටවාගෙන බකල ගමමින් ගමන් කරණ ආකාරය ඔබට දැක ගත හැකි වනු ඇත.
අනෙක් කාරණාවක් ද තිබේ. පොලිසිය තුන්සිය හැටපස් දවසේම මහ පාරේය. මාර්ග අනතුරු වළක්වා ගැනීමට නීති රීති දැඩි කර තිබේ. එහෙත් හැමදාම පොඩි වී තැලී මිය යන මිනිසුන්ගෙන් එක් ජීවිතයක් බේරා ගැනීමට අපට හැකි වී නැත. එදා සිට අද දක්වා එකම රිද්මයකට මහපාරේ මිනිස්සු මැරෙන්නේය.
අප තේරුම් ගත යුත්තේ රටට මේ තරමට කෙළ වී ඇති පසුබිමකත් මනුෂ්යයින් ලෙස අපේ හික්මීම, විනය සහ නීතිගරුකබව හදාගන්නට බැරි නම් අප තවදුරටත් මිනිසුන් නොවන බවය.
