සේල කුරුළුවංශ –
ඉන්ධන භාවිතයෙන් ශ්රී ලංකාවේ සිදුවන පරිසර දූෂණය අවම කිරීම සඳහා චීනය විසින් විදුලියෙන් ක්රියා කරන සුඛෝපභෝගි බස් රථ 100 ක් ශ්රී ලංකාවට ලබාදෙන බව ශ්රී ලංකාවේ චීන තානාපති චී වොන් හොංග් මල්වතු අස්ගිරි උභය මහා විහාරීය මහානායක ස්වාමින්ද්රයන් වහන්සේ දෙනම හමුවේ පැවසුවේය.
මෙම බස් රථයක මිල ඇමරිකානු ඩොලර් දෙලක්ෂ විසිපන්දහසක් බවද ඔහු කීවේය.
චීන තානාපතිවරයා ඊයේ (22) මහනුවරට පැමිණ මල්වතු පාර්ශවයේ මහානායක අතිපූජ්ය තිබ්බටුවාවේ ශ්රී සිද්ධාර්ථ සුමංගල මහනාහිමියන් සහ අස්ගිරි පාර්ශවයේ මහානායක අතිපූජ්ය වරකාගොඩ ශ්රී ඤාණරතන මහනාහිමියන් බැහැදැක ආශිර්වාද ලබා ගත්තේය.
අනතුරුව මහනායක හිමිවරු හමුවේ අදහස් දැක්වූ චීන තානාපතිවරයා මෙසේද පැවසුවේය.
“මෙම බස් රථ මහනුවර, ගාල්ල හා කොළඹ ප්රදේශයන්හි ධාවනය සඳහා තමයි ලබා දෙන්නේ. මේ රටේ විදුලි වාහන භාවිතය වැඩි කරන්න චීනය උපරිම සහයෝගය දෙනවා. දැන් චීනයේ වැඩියෙන්ම භාවිතා කරන්නේ විදුලි වාහනයි. දිට්වා සුළි කුණාටුවෙන් අඩාල වූ ශ්රී ලංකාවේ ආර්ථිකය නගා සිටුවීමට චීනය පූර්ණ සහයෝගය ලබා දෙනවා. ”
“ශ්රී ලංකාවේ වත්මන් ආණ්ඩුව සමඟ චීනය ඉතාමත්ම සහයෝගයෙන් අන්යෝන්ය අවබෝධයකින් යුක්තව කටයුතු කරනවා. ශ්රී ලංකාවට විපතක් වන ඕනෑම අවස්ථාවක චීනය ඒ වෙනුවෙන් පෙනී සිටිමින් පූර්ණ සහයෝගය ලබා දෙනවා. නුවරඑළිය, නුවර හා බදුල්ල යන දිස්ත්රික්කවල ආපදාවට පත් වූ පාලම් හා මහා මාර්ග ප්රතිසංස්කරණය කර දෙන ලෙස ශ්රී ලංකා රජය ඉල්ලීමක් කළා. මේ සම්බන්ධයෙන් සොයා බලා කටයුතු කිරීමට විෂය සම්බන්ධ විශේෂඥයන් 06 දෙනෙකු ශ්රී ලංකාවට පැමිණියා. මහනුවර, නුවරඑළිය හා බදුල්ල දිස්ත්රික්ක වල බහුතර මහාමාර්ග හා පාලම් මේ වන විට ප්රතිසංස්කරණය කොට හෝ ප්රතිසංස්කරණය කරමින් පවතින බව දැන ගන්නා ලැබුණා. එනිසා ඒ කණ්ඩායම මේ වනවිට ලංකාව පුරා සංචාරය කරමින් හානියට පත් මාර්ග හා පාලම් නිරීක්ෂණය කරනවා.
නවීන තාක්ෂණය භාවිතකර ප්රතිඵලදායී ආකාරයෙන් මේ ප්රතිසංස්කරණ කටයුතු කරන්නට චීන රජය සහයෝගය දෙනවා. ලෝකයේම මහා මාර්ග ඉදිකිරීම සම්බන්ධයෙන් ප්රමුඛ විශේෂඥ දැනුම ඇත්තේ චීනයට බව කවුරුත් දන්නවා.
ඒ වගේම ශ්රී ලංකාවේ අධ්යාපනය නගා සිටුවීම සඳහා චීනයේ විශේෂ අවධානය යොමු වෙලා තිබෙනවා. ඒ සඳහා පූර්ණ සහයෝගය ලබා දෙනවා. අපි වාර්ෂිකව පාසල් ළමුන්ගේ නිල ඇඳුම් සඳහා අවශ්ය සුදු රෙදි ලබා දෙනවා. මෙම වසරේ නිල ඇඳුම් සඳහා සුදු රෙදි මීටර් කෝටි එකහමාරක් ලබා දුන්නා. ඒ වගේම තමයි පාසල් 500 කට ස්මාර්ට් පන්ති කාමර 900 ක් ලබා දුන්නා. ඉදිරියටත් ශ්රී ලංකාවේ අධ්යාපනය නගා සිටීම සඳහා විශාල වශයෙන් සහයෝගය ලබා දෙනවා. ලංකාවේ මහා මාර්ග පද්ධතිය වගේම, ආර්ථිකය හා ව්යාපාර නගා සිටුවන්න චීනයේ උපරිම සහයෝගය ලබා දෙනවා.
