දෙරණ –
බැක්ටීරියා ඇතුළු අහිතකර ජීවීන් අඩංගු පොහොර තොගයක් මෙරටට ගෙන එමින් සිටි බව කියන චීන සමාගමට, හා එහි දේශීය නියෝජිතවරයාට මුදල් ගෙවීම වළක්වාලමින් මහජන බැංකුව වෙත පනවා ඇති වාරණ නියෝගය මේ මස 19 වනදා දක්වා තවදුරටත් දීර්ඝකරන ලෙස කොළඹ වාණිජ මහාධිකරණය නියෝග කළේය.
කොළඹ කොමර්ෂල් පොහොර සමාගම ඉදිරිපත්කළ පෙත්සමක් අද (09) යළි සලකා බැලීමෙන් අනතුරුව විනිසුරු ප්රදීප් හෙට්ටිආරච්චි මහතා එම නියෝගය නිකුත් කළේය.
එම නඩුව කැඳවූ අවස්ථාවේදී වගඋත්තරකාර චීන පොහොර සමාගම වෙනුවෙන් පෙනීසිටි නීතිඥවරු අධිකරණය හමුවේ කරුණු දක්වමින් නිත්යානුකූල ප්රමිති වාර්තා ඉදිරිපත්කර තමන් විසින් මහජන බැංකුවේ ණයවර ලිපි විවෘතකළ බව සඳහන් කළේය.
එසේ තිබියදී ඊට මුදල් ගෙවීම අත්හිටුවීම නීතියට පටහැනි ක්රියාවක් යැයි පෙන්වාදුන් එම නීතිඥවරු නඩුවට අදාළ විරෝධතා ඉදිරිපත්කිරීම සඳහා දිනයක් ලබාදෙන්නැයි ඉල්ලා සිටියේය.
ඒ අනුව එම නඩුවට අදාළ විරෝධතා තිබේනම් ඒවා ඉදිරි දින ඉදිරිපත් කිරීමට පියවර ගන්නා ලෙසද වගඋත්තරකාර පාර්ශවයේ නීතිඥවරුන්ට අධිකරණය නියම කළේය.
පෙත්සම්කාර පොහොර සමාගම වෙනුවෙන් පෙනීසිටි අතිරේක සොලිස්ටර් ජනරාල් සුසන්ත බාලපටබැඳි මහතා මීට පෙර අධිකරණය හමුවේ කරුණු දක්වමින් පැවසුවේ රුපියල් බිලියනයකට වඩා වැඩි වටිනාකමකින් යුත් ජීවානුහරණය කළ කාබනික පොහොර ලංකාවට ගෙන්වීමේ ටෙන්ඩරය ලබාගත් වගඋත්තරකාර “කුවින්ඩාඔ සිවින් බයෝටෙක් ගාප් කම්පනි” නමැති චීන සමාගම එම ටෙන්ඩරය ක්රියාත්මක කරමින් පොහොර තොගයක් ලංකාවට එවීමට පියවර ගත් බවය.
ඒ අනුව ජීවානුහරණය කළ කාබනික පොහොර මෙරටට නැව්ගත කිරීමට අවශ්යව තිබූණ ද එම කාබනික පොහොරවල ක්ෂුද්ර ජීවීන් සිටින බව අදාළ සමාගම නැව් උපදෙස් පත්රිකාව මගින් පිළිගෙන ඇතැයි අතිරේක සොලිසිටර් ජනරාල්වරයා අධිකරණය හමුවේ ප්රකාශ කළේය.
ජාතික ශාක නිරෝධායන සේවය වෙත වගඋත්තරකාර චීන සමාගම විසින් යවා ඇති පොහොර නියඳීය පරීක්ෂා කිරීමේදී එහි ඇතැම් පොහොර කොටස්වල හානිකර බැක්ටීරියා ඇතුළු ජීවින් සිටින බව තහවුරු වී ඇතැයි ද සඳහන් කළ අතිරේක සොලිසිටර් ජනරාල්වරයා මේ තත්ත්වය මත වගඋත්තරකාර චීන සමාගම ටෙන්ඩරයේ පිළිගෙන තිබූ කරුණු සම්පූර්ණ කොට නැතැයි චෝදනා කළේය.
ඒ අනුව අදාළ චීන සමාගම වෙනුවෙන් නිකුත් කොට ඇති ණයවර ලිපියට අනුව කිසිදු මුදලක් එම සමාගමට, එහි දේශීය නියෝජිත ආයතනය වෙත හෝ මහජන බැංකුව වෙත ගෙවීම් හෝ ලබාගැනීම වළක්වන වාරණ නියෝගයක් නිකුත් කරන්නැයි අතිරේක සොලිස්ටර් ජනරාල්වරයා අධිකරණයෙන් ඉල්ලා තිබුණි.
