සුමිත් පොතුපිටිය –
පානදුර අධිකරණයේ නඩු භාණ්ඩ ගබඩාව කඩා එහි තිබූ හෙරෝයින් මත්කුඩු පාර්සලයක් සොරකම් කර ඇති බවට ලද තොරතුරක් මත පානදුර දකුණ පොලිසිය අද (25) පරීක්ෂණ ආරම්භ කර තිබේ.
රුපියල් කෝටි හතරක් පමණ වටිනා බව පැවසෙන හෙරොයින් මත්කුඩු තොගයක් සමග ගම්පොළ කොට්ඨාස අපරාධ විමර්ශන ඒකකය විසින් අත්අඩංගුවට ගත් හිටපු පොලිස් කොස්තාපල් වරයකු එම මත්කුඩු පානදුර මහේස්ත්රාතා අධිකරණයේ නඩු බඩු ගබඩාවෙන් සොරකම් කළ ඒවා බවට ලබාදුන් ප්රකාශකයක් හේතුවෙන් මෙසේ පරීක්ෂණ ආරම්භ කර තිබේ.
පානදුර මූලස්ථාන පොලිස් පරීක්ෂක උපුල් ප්රියංකර සහ අපරාධ අංශ ස්ථානාධිපතිවරයා සහ අපරාධ ස්ථාන පරීක්ෂණාගාර නිළධාරීන් පිරිසක් මේ සඳහා සහභාගීවී සිටී අයුරු දැකගත හැකිවිය.
අධිකරණ ගබඩාව තුළ තිබූ මත්කුඩු පාර්සලයක් අස්ථානගතව ඇති බවත්, ඒ වෙනුවට පිටි වර්ගයක් හෝ ඊට සමාන කුඩු වර්ගයක් අඩංගු පාර්සලයක් තබා ඇති බවත් මෙතෙක් කළ පරීක්ෂණ වලදී නිරීක්ෂණය වී ඇතැයිද පැවසේ.
තවද පොලිස් පරීක්ෂාවේදී ඇඟිලි සටහන් කිහිපයක් නිරීක්ෂණය කර තවත් විද්යාත්මක සාක්කි රැසක් අපරාධ ස්ථාන පරීක්ෂණාගාර නිළධාරීන්ගේ නිරීක්ෂණයට ලක්ව ඇති බවද සදහන් වේ.
පසුගිය 19 දා හෝ ඊට ආසන්න දිනක රාත්රි නඩු භාණ්ඩ ගබඩාවේ වහලයේ ඇස්බැස්ටෝස් තහඩුව ගලවා සිවිලිමද කුඩාවට සිදුරු කර ගබඩාවට ඇතුළුව ඇති බවටද පොලිසිය තොරතුරු අණාවරණය කරගෙන ඇති බවද සඳහන් වේ.
මත්කුඩු සමග අත්අඩංගුවට ගෙන ඇති හිටපු පොලිස් කොස්තාපල්වරයා පානදුර පොලිස් කොට්ඨාසය යටතේ මොරොන්තුඩුව පොලිස් ස්ථානය යටතේ පානදුර උසාවි රාජකාරි කරමින් සිට ඇති අයෙකු බවත් එවකට මත්කුඩුවලට ඇබ්බැහිව සිට ඇති බවට ලද තොරතුරක් මත ගම්පහ පොලිස් කොට්ඨාසයට මාරුවීමක් ලබාදී ඇති බවත් පොලිස් ආරංචි මාර්ග සඳහන් කරයි.
එහි රාජකාරි කරන අතරතුර එහි උසාවි කටයුතු භාරව රාජකාරි කරන පොලිස් සැරයන් වරයෙකුගේ ලොකරයක් ගැලවීම ඇතුළු කරුණු කිහිපයක් මුල්කර ගනිමින් පොලිස් සේවයෙන් පහකර ඇති අයෙකු බවද පොලිසිය පවසයි .
ජේෂ්ඨ පොලිස් අධිකාරී සමන්ත වෙදගේ , සහකාර පොලිස් අධිකාරී නිශාන්ත සේනාරත්නගේ උපදෙස් පරිදි මූලස්ථාන පොලිස් පරීක්ෂක උපුල් ප්රියංකර නාවුල්ලගේ මෙහෙයවීමෙන් අපරාධ අංශ ස්ථානාධිපති ප්රධාන පොලිස් පරීක්ෂක ඩබ්ලිව් විජේතුංගගේ ප්රධානත්වයෙන් පරීක්ෂණ පවත්වයි.
