කාන්තාවක ඝාතනය කර ඇයගේ දෙහැවිරිදි දැරිය මහමග දමාගිය අපරාධකරුවෙකුට  හම්බන්තොට මහාධිකරණයෙන් මරණ දඩුවම.

 සූරියවැව නුවන් ජයසේකර –

දේපළ සම්බන්ධ ආරවුලක් මත වසර 15කට පෙර තිස්සමහාරාම පන්නිගමුවදී කාන්තාවක ඝාතනය කිරීමේ චෝදනාවට වැරිදිකරු වු පුද්ගලයෙකුට හම්බන්තොට මහාධිකරණ විනිසුරු ටිකිරි කේ.ජයතිලක මහතා ඊයේ ( 01 ) දින සවස  මරණීය දණ්ඩනය නියම කළේය. කාන්තාව ඝාතනය කිරීමෙන් අනතුරුව ඇයගේ දෙහැවිරිදි කුඩා දියණිය මෙම අපරාධකරු අළුයම මහ මග දමා ගොස් තිබියදී හමුවී තිබිණි. 

මෙලෙස මරණ දඩුවම හිමි වුයේ අංක 60/A, කීර්ති ශ්‍රී රාජසිංහ මාවත,  රඹූක්කන ලිපිනයේ පදිංචි  යක්කලගේ ලසිත් වසන්ත කුමාර නැමති 52 හැවිරිදි පුද්ගලයෙකුටය.

මෙලෙස ඝාතනයට ලක්ව තිබුණේ රත්නපුර නිවිතිගල ප්‍රදේශයේ පදිංචි එක්දරු මවක වු වෙදගේ නිලානි විජේතුංග නැමති කාන්තාවකි.

පුවත්පතක පළකර තිබූ විවාහ මංගල දැන්වීමක් මත චුදිත හා ඝාතනයට ලක් වු කාත්තාව දැන හැඳිනගෙන තිබේ. ඒ අවස්ථාව වන විටත් මෙම කාන්තාවට වෙනත් විවාහයකින් දැරියක්ද සිට ඇත. දෙදෙනා දැන හැඳිනගැනීමෙන් පසු කලක් එකට ජීවත්ව සිට ඇති අතර එම කාලසිමාවේදී එම කාන්තාවට අයත් දේපළ සම්බන්ධයෙන් චුදිත පුද්ගලයා හා එම කාන්තාව අතර ආරවුලක් ඇතිව තිබේ. දෙදෙනා අතර ඇති වු මෙම ආරවුල මත චුදිත පුද්ගලයා විසින් මෙම කාන්තාව ඝාතනය කර එදින අළුයම ඇයගේ දෙහැවිරිදි දැරිය  වංගු 10, රක්වාන ප්‍රදේශයේ මහාමාර්ගයක දමා ගොස් තිබේ.

කොලොන්න සිට කොළඹ දක්වා ධාවනය වු බස් රථය අළුයම 04ට පමණ රක්වාන වංගු 10 ප්‍රදේශයෙන් ගමන් කරන විට කුඩා දැරියක පාරදිගේ එනු දැක එම බස් රථයේ රියදුරු විසින් බසය නවතා දැරිය බස්රථයට නංවාගෙන තිබේ. ඒ වන විටත් දැරිය දැඩි භීතියකින් පසුව ඇති   අතර දැරියට මව පියා පිළිබදව හෝ ගම පිළිබදව කියාගත නොහැකිව ඇත. 

දැරිය බස් රථ රියදුරා විසින් රත්නපුර පොලිසියට බාරදීමෙන් පසු සිදුකළ මුලික විමර්ශනවලදී සැකකරු පිළිබඳ තොරතුරු අනාවරණය වී ඇත. ඒ අනුව සැකකරු අත්අඩංගුවට ගෙන සිදුකළ මුලික විමර්ශනවලදී අනාවරණය වී ඇත්තේ සැකකරු දැරිය මහ මග දමා කාන්තාව ඝාතනය කර තිස්සමහාරාම පන්නිගමුව ප්‍රදේශයේ වලදමා ඇති බවය.

ඒ අනුව රත්නපුර පොලිසිය විසින් සිද්ධිය පිළිබඳව තිස්සමහාරාම පොලිසියට දැන්වීමෙන් අනතුරුව විමශනය ආරම්භ කළ තිස්සමහාරාම පොලිසිය සැකකරුගේ මගපෙන්වීම මත තිස්සමහාරාම පන්නිගමුව ප්‍රදේශයේ වල දමා තිබූ කාන්තාවගේ හිස කොටස පමණක් සොයාගෙන ඒ පිළිබඳව තිස්සමහාරාම මහේස්ත්‍රාත් අධිකරණයට ඉදිරිපත් කර තිබේ.

එහිදී සැකකරු බන්ධනාගාර ගත කර පැවති මුලික නඩු විභාගයෙන් අනතුරුව සැකකරුට එරෙහිව නීතිපති වරයා විසින් 2021.නොවැම්බර් 11 දින හම්බන්තොට මහාධිකරණය හමුවේ අධිචෝදනා දෙකක් යටතේ නඩු පවරා තිබේ.

අනතුරුව පැවති දීර්ඝ නඩු විභාගයකින් පසු චුදිත පුද්ගලයාට එරෙහිව නගා තිබූ අධිචෝදනා දෙක  පැමිණිල්ල විසින් සාධාරණ සැකයෙන් ඔබ්බට ඔප්පු කිරීමට සමත් වී තිබේ. ඒ අනුව මහාධිකරණ විසිනිසුරු වරයා චුදිතට මරණීය දණ්ඩනය නියම කළ අතර, චුදිතට මරණීය දණ්ඩණය පමුණුවන තෙක් චුදිත වැළිකඩ බන්ධනාගාරයේ රඳවා තබන ලෙසට අගුණුකොළපැලැස්ස බන්ධනාගාර අධිකාරී වරයාට නියම කෙරුණි.