1973 අංක 25 දරන ක්රීඩා නීතියේ 32 වැනි වගන්තිය යටතේ තමා වෙත පැවරී ඇති බලතල අනුව ක්රීඩා හා යෞවන කටයුතු ඇමති රොෂාන් රණසිංහ ක්රිකට් ක්රීඩාවේ ජාතික සංගමය වන ශ්රී ලංකා ක්රිකට් ලියාපදිංචිය අත්හිටුවන ගැසට් පත්රය නිකුත් කර තිබේ.
2023.11.05 දින සිට බලපැවැත්වෙන පරිදි ක්රිකට් ක්රීඩාවේ දූෂණ, අක්රමිකතා, විෂමාචාර සෙවීමට සහ එහි රාජකාරි සහ කාර්යයන් ඉටු කිරීමට අපොහොසත් වීම පිළිබඳ ස්වාධීන, විනිවිදභාවය සහ විශ්වාසදායක පරීක්ෂණයක් පැවැත්වීමටත් ඊට පිළියම් යෙදීමටත් අවශ්ය වන බැවින් මෙම කමිටුව පත් කරන බව ඇමතිවරයා එම ගැසට් නිවේදනයේ සඳහන් කරයි.
1973 අංක 25 දරන ශ්රී ලංකා ක්රීඩා නීතියේ 33 වැනි වගන්තිය යටතේ තමා වෙත පැවරී ඇති බලතල ප්රකාරව ක්රීඩා හා යෞවන කටයුතු අමාත්යවරයා වශයෙන් සාමාජිකයන් හත් දෙනෙකුගේ නම් සඳහන් අතුරු කමිටුව ද එම ගැසට්ටුව මගින් ප්රකාශ කර තිබේ.
ගැසට් පත්රය ප්රකාරව මෙම අතුරු කමිටුවට ශ්රී ලංකා ක්රිකට් ආයතනයේ බලතල, කර්තව්ය සහ යුතුකම් ක්රියාත්මක කිරීම සඳහා නිලවරණය පැවැත්වෙන තුරු හෝ නැවත දැනුම්දීමක් නිකුත් කරන තුරු ශ්රී ලංකා ක්රිකට් ආයතනයේ ඵලදායි ක්රියාකාරිත්වය සඳහා බලය පවරා ඇත.
- විගණකාධිපති විසින් නිකුත් කරන ලද 2023 සැප්තැම්බර් 11 දිනැති විගණන වාර්තාවේ අඩංගු නිර්දේශ සම්බන්ධයෙන් සොයා බලා සුදුසු ක්රියාමාර්ග ගැනීමට,
- අදාළ පරීක්ෂණ ස්වාධීනව, විනිවිදභාවයෙන් සහ විශ්වාසවන්තව සිදු කරමින් අතුරු කමිටුව විසින් පිළියම් ක්රියාමාර්ග ගන්නා තෙක් ශ්රී ලංකා ක්රිකට් ආයතනයේ බලතල, කාර්යයන් සහ රාජකාරි සුදුසු අයුරින් ක්රියාත්මක කිරීමට
- විගණකාධිපතිවරයාගේ එකී විගණන වාර්තාවේ දක්වා ඇති එවැනි දූෂණ, අක්රමිකතා, විෂමාචාර සහ අසාර්ථකත්වයන් නැවත ඇති නොවීමට වග බලා ගැනීම සඳහා නිර්දේශ සහ උපාය මාර්ගික ක්රියාමාර්ග ගැනීමට මෙම අතුරු කමිටුවට ගැසට් නිවේදනයෙන් බලය පවරා තිබේ.
