ඉඳුනිල් කහටපිටිය –
අම්බලන්ගොඩ මෝදර දේවාල කමිටුවේ සභාපති වරුෂවිතාන මිරන්ත (55) ය. ඔහුට ඊයේ වෙඩි තබා ඝාතනය කරන්නේය. ඔහු ගමන් ගන්නා යතුරුපැදිය පසුපසින් හඹා එන රතු පැහැති මෝටර් රථයක් අම්බලන්ගොඩ නගර සභාව සහ මහජන පුස්ථකාලය අතර මැද මහ මග දී වෙඩි තබා ඝාතනය කරන්නේය.
බැංකුවක සිට අම්බලන්ගොඩ ධීවර වරයා වෙත ගමන් කරමින් සිටිය දී ඝාතකයින් එල්ල කළ වෙඩි පහර 05ක් වින්දිතයාට වැදී තිබිණි. දෙකක් මුහණටය. තුනක් පපුවටය. අසාධ්ය තත්ත්වයේ සිටි ඔහු බලපිටිය රෝහලට ඇතුළත් කිරීමෙන් පසු මිය ගියේය. ඔහුට වෙඩි තබා තිබුණේ මිලි මීටර 9 වර්ගයේ ගිනි අවියකින් බව පොලිස් මාධ්ය කොට්ඨාසය කීවේය.
ඝාතකයා පැමිණි වාහනය කරන්දෙණිය එගොඩවෙල මංසන්ධියේ සැකකරුවන් විසින් දමා ගොස් තිබිය දී හමුවිය. මෝටර් රථය රක්ෂණ සමාගමකට අයත් එකක් බව අංක තහඩුවලට අනුව අනාවරණය වී ඇත. එම අංක තහඩු ව්යාජ ඒවාදැයි තවම දන්නේ නැත. දැන් මේ ඝාතන සිද්ධිය ගැන විමර්ශන ආරම්භ වී ඇත්තේය.
විමර්ශනවලින් පෙළ ගැසෙන කතාව මෙසේය.
වරුෂ විතාන මිරන්ත ව්යාපාරිකයෙකි. ඔහු දකුණේ කුප්රකට මත්කුඩුකාර පාතාලයාවන කරන්දෙණිය සුද්දාගේ මස්සිනාය. එහෙත් වරුෂවිතාන මිරන්ත යනු අපරාධ ඉතිහාසයක් හෝ ඊට සම්බන්ධතා සහිත පුද්ගලයෙක් නොවේ.
එහෙත් කරන්දෙණිය සුද්දා යනු පාතලයේත් අවජාතකයෙකි. ඔහු පාතාල ජඩයෙක් බවට පත් වන්නේ හිතහොඳ දොස්තර ලෙසින් ප්රකටව සිටි වෛද්ය විජේසිංහ කරන්දෙණිය රෝහලේ සේවයේ නිරත වෛද්යවරයකු කොන්ත්රාත්තුවකට අනුව ඝාතනය කරමිනි. හමුදා සේවයේ නිරතව සිටියදී කළ එම ඝාතනයෙන් පසු කරන්දෙණිය සුද්දා මිනිස් ඝාතන රැසකටම චෝදනා ලැබුවේය. කාලයක් බන්ධනාගාරගතව සිටි ඔහු ඇප ලැබීමෙන් අනතුරුව ඩුබායි වෙත පලාගොස් එරට සිට මත්කුඩු ජාවාරම හා පාතාල අපරාධ මෙෙහයවමින් සිටින බව පොලීසිය කියන්නේය.
-
වරුෂවිතාන මිරන්ත බිල්ලක් වන්නේ ඇයි
අපරාධ ඉතිහාසයක් නැති වරුෂවිතාන මිරන්ත ඝාතනය පෙනෙන ආකාරයට කරන්දෙණිය සුද්දාට රිදවීමට ගත් බිල්ලකි. එම ඝාතනයට හිනිදුම සහ මීටියාගොඩ ප්රදේශවල අවන්හල් දෙකකදී සිදුවූ වෙඩි තැබීම් හා ඝාතනය අතර සම්බන්ධයක් ඇති බවට සැකකරන තොරතුරු විමර්ශන නිලධාරීන්ට මේ වනවිට ලැබී තිබේ.
පසුගිය ජනවාරි 30 වැනිදා හිනිදුම මහබෝධිවත්තේ නවාතැන් පොළකදී තිදෙනකුට වෙඩි තබා මරා දැම්මේය. මේ වෙඩි තැබීම කරන්දෙණිය සුද්දාගේ මෙහෙයැවීමකට අනුව සිදුවූ බව කියැවිණි. යතුරුපැදියකින් පැමිණි දෙදෙනෙක් විසින් ටී-56 අවියකින් කළ වෙඩි තැබීමෙන් නවාතැන් පොළේ හිමිකරුද ඝාතනය විය. ඔහු පොලිස් විශේෂ කාර්ය බලකායේ තොරතුරුකරුවෙක් ලෙස කටයුතු කර ඇති බව ද සඳහන්ය.
පසුගිය මැයි 3 වැනිදා රාත්රී කාලයේදී මීටියාගොඩ එරනවිල පිහිටි අවහන්හලක් තුළදී මත්පැන් පානය කරමින් සිටි පිරිසක් ඉලක්ක කරගෙන වෙඩි තැබීමක් සිදුවිය. එය සිදුවන්නේත් කරන්දෙණිය සුද්දාගේ මෙහෙයවීමෙන් බව විමර්ශන අංශ වෙත තොරතුරු ලැබි තිබිණි.
මෙම ඝාතනයන්වලට පළිගැනීමක් ලෙස කරන්දෙණිය සුද්දාට දැනෙන්නට වරුෂවිතාන මිරන්ත ඝාතනය සිදුකර ඇතැයි දැන් විමර්ශන කණ්ඩායම් සැකකරයි.
ඒ සම්බන්ධයෙන් තොරතුරු පොලිස් විශේෂ කාර්ය බළකාය සහ විශේෂ පොලිස් කණ්ඩායම් කිහිපයක්ම සොයා බලමින් සිටින බව පොලිස් තොරතුරු උපුටා දක්වමින් දිනමිණ පුවත්පත වාර්තා කරයි.
කෙසේ වෙතත් තවමත් මෙම වෙඩි තැබීම සම්බන්ධයෙන් නිශ්චිත තොරතුරක් ලැබී නැත. පැති කිහිපයක් ඔස්සේ විමර්ශන පවත්වන බවත් ඇල්පිටිය කොට්ඨාසයභාර ජ්යෙෂ්ඨ පොලිස් අධිකාරී ලකී රන්දෙණිය පවසා තිබේ.
-
වරුෂවිතාන මිරන්ත කවුද?
ඔහු සමාජයේ පිළිගත් තනතුරු දැරූවෙකි. පසුගිය පළාත් පාලන මැතිවරණයේදී අම්බලන්ගොඩ නගර සභාවට සමගි ජන බලවේගය පක්ෂයෙන් ඉදිරිපත් කරන ලද අතිරේක නාමයෝජනා ලැයිස්තුවේ ඔහු සිටියේය. අම්බලන්ගොඩ ධීවර වරාය කළමනාකරණ කමිටුවේ උප සභාපති ඔහුය. අම්බලන්ගොඩ ග්රාමීය ධීවර සංවිධානයේ ලේකම් ධූරය දරා ඇත්තේත් මිරන්තය. අම්බලන්ගොඩ හිරේවත්ත සමූපකාර ධීවර සමිතියේ ලේකම්වරයා ලෙස ඔහු කටයුතු කළේය. අම්බලන්ගොඩ මෝදර දේවාල කමිටුවේ සභාපති වරුෂවිතාන මිරන්තය. එමෙන්ම ඔහු ව්යාපාරිකයෙකි. ඔහුට අම්බලන්ගොඩ ධීවර වරායේ බහුදින ධීවර යාත්රා දෙකක් ඇති බවටද අනාවරණය වී තිබේ.
කෙසේ වෙතත් සැක සහිත තැන් තිබේ. අම්බලන්ගොඩ මෝදර දේවාල කමිටුවේ සභාපති මිරන්තය. පාතාල අපරාධකරුවෙක් වූ ලොකු පැටීගේ රුපියල් කෝටි 33ක කළු සල්ලි සුදු කිරීම සම්බන්ධයෙන් අපරාධ පරීක්ෂණ දෙපාර්තමේන්තුවේ නීති විරෝධී වත්කම් විමර්ශන කොට්ඨාසය මගින් පසුගිය දා අත්අඩංගුවට ගනු ලැබූවේ මොහු සභාපතිධුරය දරන මෝදර දේවාලයේ කපුවාය.
ඇතැම්විට පෙනෙන දේ වඩා වැඩි යමක් මේ ඝාතනය පසුපස තිබෙන්නට පුලුවන. ගාලු දිසාභාර නියෝජ්ය පොලිස්පති ජගත් සේරම්, ඇල්පිටිය ජ්යෙෂ්ඨ පොලිස් අධිකාරි ලකී රන්දෙණියගේ උපදෙස් මත අම්බලන්ගොඩ පොලීසිය විමර්ශන ආරම්භ කර තිබේ. ( දිනමිණ පුවත්පතට ගයනා කුමාර වීරසිංහ විසින් සැපයූ ලිපියක් ද පසුබිම් කර ගැනුණි )
