තායිලන්තයට රැගෙන ගොස් වෛද්ය ප්රතිකාර ආරම්භ කර ඇති මුතුරාජා එම ප්රතිකාර මාලාවෙන් පසු නැවත ලංකාවට රැගෙන ඒම අපේක්ෂා කළ නොහැකි බව තායි මාධ්ය වාර්තා කරයි.
තායිලන්ත පරිසර අමාත්යාංශ උපදේශිකා මෙන්ම තායි ඇතා යළි රැගෙන ඒමේ කටයුතු අධීක්ෂණය කළ දූත කණ්ඩායමේ ප්රධානී කන්චානා සිල්පා – ආර්චා ලංකාවේ දි ප්රකාශ කළේ මෙම හස්ථියාට ඉතිරි ජීවිත කාලය පුරාම ප්රතිකාර සහිතව තායි වෛද්යවරුන් අධීක්ෂණයේ ඉන්නට සිදුවන බවය.
Thai PBS පුවත් සේවයට අනුව, තායිලන්තයේ ස්වභාවික සම්පත් හා පරිසර අමාත්ය වරාවුත් සිල්පා – ආර්චා ඊයේ (04) ප්රකාශ කර ඇත්තේ මේ වනවිට ඇතා සිටින්නේ තායිලන්ත මහ රජුගේ අනුග්රහය යටතේ බවය.
“දැන් තායිලන්තයේ ප්රසිද්ධම හස්තිරාජයා සක් සූරීන්. ඔහු දැන් ඉන්නේ තායිලන්ත රජුගේ අනුග්රහය යටතේ. බැවින් ඔහුට නැවත ශ්රී ලංකාවට නොපැමිණීම ප්රශ්නයක් නොවේ. “ ස්වාභාවික සම්පත් හා පරිසර අමාත්ය වරාවුත් සිල්පා-ආර්චා ප්රකාශ කර ඇති ආකාරය Thai PBS වාර්තා කර ඇත. ඊයේ තායිලන්ත අලි සංරක්ෂණාගාරය විසින් කස් සුරින් සම්බන්ධව කළ සජීවී විකාශනය නැරඹීමට දස දහසකට අධික පිරිසක් ෆේස් බුක් පිටුවට පැමිණ තිබිණි.
තායිලන්ත ප්රවෘත්ති මාධ්ය වාර්තා කරන්නේ ඉරිදා තායිලන්තයට පැමිණි සක් සූරීන් වසර 22 ක් ශ්රී ලංකාවේ ජීවත් වුවද ඔහුගේ නව පරිසරය ඉක්මනින් හුරුපුරුදු වී ඇති බවය.
ඇතා සම්පූර්ණයෙන් සුව වූ පසු බැංකොක් වෙත ආපසු එන ලෙස ශ්රී ලංකාවේ ජ්යේෂ්ඨ භික්ෂූන් වහන්සේලා කළ ඉල්ලීම පිළිබඳව සිය අදහස් දක්වන ස්වාභාවික සම්පත් හා පරිසර අමාත්ය වරාවුත් සිල්පා- ආර්චා දන්වා සිටින්නේ , මෙම කාරණය සාකච්ඡාවට පවා විවෘත නොවන එකක් බවය.
“සක් සූරීන් දැන් රජුගේ අනුග්රහය යටතේ සිටින බැවින් ඉදිරියේ දි ඔහු සම්බන්ධව කිසිම කෙනෙකුට ප්රශ්නයක් වෙන්නෙ නෑ,” ඔහු වැඩි දුරටත් කීවේය.
දැනට ලම්පෑන්ග් පළාතේ හැන්ග් චැට් දිස්ත්රික්කයේ අලි සංරක්ෂණ මධ්යස්ථානයේ දින 30ක නිරෝධායන කාලයක් ගතකරමින් සිටින මුතු-රාජා සම්බන්ධයෙන් විශේෂ පශු වෛද්යවරුන් ලවා වඩාත් සවිස්තරාත්මක පරීක්ෂණ සැලැස්මක් සංවිධානය කර තිබේ. නිරෝධායන කාලයෙන් අනතුරුව එම ප්රතිකාර මාලාව ආරම්භ වනු ඇති බව අමාත්යවරයා ප්රකාශ කර ඇත.
සියලු රෝගවලින් සම්පූර්ණ සුවය ලැබෙන තුරු ප්රතිකාර ලබා දෙන බවද ඇතා සම්පූර්ණයෙන් සුවය ලැබීමට බොහෝ කාලයක් ගතවනු ඇති බවද ඇමතිවරයා උපුටා දක්වමින් තායි මාධ්ය වාර්තා කර තිබේ.
දැනට හදුනාගේන ඇති පරිදි මුතුරාජා ගේ දකුණු ඇසේ ඇසේ සුද ඇතිවීම ඇරඹී තිබේ. ඔහුගේ ඉදිරිපස වම් පාදය නැමිය නොහැකි වීම, උකුල් ප්රදේශයේ ගැඹුරු තුවාලය ආසාදනය වී තිබීම, නියපොතු සහ පාද හතරේම ගැටලු පැවතීම සම්බන්ධව මූලික පරීක්ෂණවලින් හඳනාගෙන ඇත.
මුතු-රාජා තායිලන්තයට ගුවනින් රැගෙන ගියේ අයහපත් සැලකිලි සහ තුවාල පිළිබඳ වාර්තා වීමෙනි. මේ තරම් වදයට ලක් වූ ඇතා තායිලන්ත නියෝජිතයන්ට කන්දේ විහාරයේ හාමුදුරුවන් විසින් ලබා දෙන්නේ ප්රතිකාර කර යළි ලංකාවට දෙන බවට වූ දැඩි කොන්දේසි පැනවීමෙන් අනතුරුවය.
