ඉඳුනිල් කහටපිටිය –
බිරිඳ සහ දාහත් හැවිරිදි වැඩිමල් දියණිය මරා දමා යටිනුවර ප්රාදේශීය සභාවේ විපක්ෂ නායක චම්පික නිලන්ත සියදිවි හානි කරගෙනය. මේ බිහිසුනු අපරාධය කණ වැකෙන්නේ අද (29) අළුයම ය. එම ආරංචිය කණ වැකුන මොහොත මතකය. මට දැන්නේ මා ගිනි ගන්නා සේය.
මේ මනුෂ්යයා කලෙක සිට දනිමි. ඔහු යහපත් මිනිසෙකි. මෙවැනි තීන්දුවක් ගැනීමට තරම් බිහිසුණු සිතක් නැති මේ මනුෂ්යයා මේ විනාශය කරන්නට ඇත්තේ පියවි සිහියෙන් නොවන තරම් මානසික විකල් භාවයකින් බව විශ්වාසය. ඔහුගේ සමීපතමයන් බොහෝ දෙනෙකුට මේ විනාශය ගැන සිතාගන්නටවත් බැරි වී ඇත්තේ ඒ නිසාය.
එක්සත් ජාතික පක්ෂයෙන් දේශපාලනයට පිවිස යටිනුවර ප්රාදේශීය සභාවේ සභාපති ධූරය ද කලක් හෙබවූ චම්පික නිලන්ත පසුව සමගි ජනබලවේගය හා එක්විය. පසුගිය පළාත් පාලන මැතිවරණයට සමගි ජන සන්ධානයෙන් ඉදිරිපත් ඔහු කොට්ඨාසය ජයග්රහණය කරමින් යටිනුවර ප්රාදේශිය සභාවට තේරී විපක්ෂ නායක ධූරයට පත්විය.
සිදුවූයේ කුමක් ද?
චම්පික නිලන්ත නිවසේ දී ඔහුගේ බිරිඳ හා දියණියක ඝාතනය කර සියදිවි නසාගත් බව ට සැක කරමින්පේරාදෙණිය පොලීසිය දැන් පරීක්ෂණ ආරම්භ කර තිබේ. ඔහු මිය ගොස් සිටියේ ඔවුන් පදිංචි දෙමහල් නිවසේ මුළුතැන් ගෙයි අසල වු එළිමහන් කොටසක බාල්කයේ එල්ලීය.
මේ පවුලේ බාල දියණිය ජීවතුන් අතරය. සිය පියාගේ විකල් ඝාතනයෙන් බේරී ජීවත් වෙන්නට ඇයට වාසනාව තිබිණි.
පොලිසිය කියන්නේ ඝාතනයට ලක්වන බිරිය 45 හැවිරිදි දිල්රුක්ෂි ජයලත් කුමාරගේය. දියණිය ශිහාරා ආශිංසනී හපුගොඩය. ඇය 13 හැවිරිදිය. නිදි පෙති වර්ගයක් බිරිඳට හා දියණියට බීමට දී නින්ද ගිය පසු ඔවුන්ව ඝාතනය කර තිබෙන බවට පොලීසිය දැනට සැක කරයි.
ඊයේ (28) බාල දියණිය පාසලේ අධ්යාපන චාරිකාවට ගොස් නිවසට පැමිණ ඇත්තේ රාත්රියේ ය. ඇයව පාසලේ සිට නිවස දක්වා රැගෙන පැමිණ ඇත්තේ ද චම්පික නිලන්ත. බාල දියණිය රැගෙන එන්නට මේ මනුස්සාය යන්නේ සිය වැඩිමහල් දියණිය සහ බිරිය ඝාතනය කර සඟවා තැබීමෙන් පසුය.
නිවසට පැමිණ බාල දියණිය උඩු මහළට රැගෙන ගොස් ඇයටත් නිදි පෙති බොන්නට දී තිබේ. එහෙත් ඇය එම පෙති නොබී නින්දට ගොස් ඇත. නිදි පෙති බී විසඤ්ඤ ඇතැයි සිතා ඇයව මරන්නට පැමිණෙන මේ වියරු පියා දකින්නේ දියණිය නිදි නොලැබ සිටින අන්දමය. පොලිසිය කියන්නේ මේ හේතුව නිසා ඇය නොමරා හරින්නට ඔහු තීරණය කරන්නට ඇති බවය.
අපරාධයට හේතුව
විපක්ෂ නායක මහනුවර ව්යාපාරිකයෙකුගෙන් රුපියල් ලක්ෂ 50 ක මුදලක් පොලියට ලබාගෙන තිබේ. එම මුදල ආපසු ගෙවීමට නොහැකිව විශාල පොලී මුදලක් එකතු වීම මත ඔහු මුළුමනින්ම බිඳවැටී ඇත.
මෙම පුද්ගලයා ඔහු සතු මෝටර් රථය විකුණා පොලියට මුදල් ලබාගත් ව්යපාරිකයාට පසුගිය මාර්තු මාසයේ දී ලක්ෂ 15 ක පමණ මුදලක් ලබා තිබිණි.
ඉන් පසුවද ව්යාපාරිකයා දිගින් දිගටම මොහුට කරදර කර තිබෙන බව දැන ගන්නට ඇත. එහි දී ඉහළ පොලිස් නිලධාරියෙකු ගේ සහයද ව්යාපාරිකයාට හිමිව ඇතැයි දැන ගන්නට තිබේ.
අදාළ ගැටලුව ඉක්මනින් විඳා දීම සඳහා නිතීඥයෙකු මහනුවර ඉහළ පොලිස් නිලධාරියෙකුට ලබාදීම සඳහා රුපියල් ලක්ෂ 05 ක මුදලක් ඉල්ලා සිටි බව ද මියගිය විපක්ෂ නායකවරයා ලිපියේ සඳහන් කර තිබී ඇත.
ඝාතනයට ලක් වූ 17 හැවිරිදි දියණිය සුදු කබර රෝගයෙන් පීඩා විඳ සිට ඇති බවත් ඉන්දියාවට රැගෙන ගොස් ඇයට ප්රතිකාර ලබාදීමේ දැඩි වුවමනාවක් මිය ගිය චම්පිකට තිබී ඇති බවත් කියන්නේ පවුලේ ඥාතීන්ය.
මහේස්ත්රාත් පරීක්ෂණයෙන් පසු මළ සිරුරු පශ්චාත් මරණ පරීක්ෂණය සඳහා පේරාදෙණිය ශික්ෂණ රෝහලට රැගෙන ගොස් ඇත. අම්මාත් අක්කාත් තාත්තාත් මෝචරියේය. ජීවිතය බේරාගත් බාල දියණිය එම රෝහලේම වාට්ටුවකය.
මේ තත්ත්වය ඒ පුංචි දියණියට කෙසේ දැනෙනවා දැයි අප දන්නේ නැත. එහෙත් ඒ කතාව අහන දකින කිසිවෙකුට ජීවිතයේ අමතක නොවන ආකාරයේ තිගැස්මක් උපදවනු ඇති බව සහතිකය.
