කීර්ති ප්රනාන්දු –
විදුලිය සම්බන්ධව ඉදිරියේ දී ඇතිවිය හැකි සමහර ප්රායෝගික තත්ත්වයන් සිතීම පවා බිය උපදවන බව විදුලි ඉංජිනේරු සංගමයේ සභාපති අනිල් රංජිත් ඉඳුවර සඳහන් කරයි.
මේ වනවිට අධි ධාරිතාවෙන් විදුලිය උපදවන ජල විදුලි බලාගාර සඳහා ජලය හිඟවීම, ඩීසල් හිඟය සමග ඇති වී තිබෙන තත්ත්වය සමග ගල් අඟුරු සැපයුම නිසි ආකාරයෙන් ලබා ගත නොහැකි වුවහොත් ඇති විය හැකි තත්ත්වය සම්බන්ධව කතා නොකර හිඳිමු යැයි සභාපතිවරයා යෝජනා කළේය.
“ ඒක දරාගන්න පුලුවන් තත්ත්වයක් නෙමෙයි. එසේ නොවේවා කියලා ප්රාර්ථනා කරමු.“
ඔහු පැවසුවේය.
“ මේ මොහොතෙ තත්ත්වය තමයි ඉන්ධන හිඟය ජල විදුලිය නිශ්පාදනය ජලය හිඟකමින් අඩුවී යෑම සහ ලක්ෂපාන බලාගාරයේ අලුත් වැඩියාව. මේ කාරණා ත්රිත්වය නිසා තමයි විදුලි කප්පාදුව පැය දෙකකට වඩා වැඩි කාලයකට රැගෙන යන්න වෙලා තිබෙන්නෙ.“
කෙරවලපිටියෙ ඊයේ වෙනවිට තෙල් තිබුණෙ දවස් දෙක හමාරකට. අපි බැරිම තැනකදි තමයි ඉන්ධන භාවිතා කරලා විදුලිය ජනනය කරන්නෙ. ඒක දරාගන්න බැරි වියදම් සහිත උත්පාදනයක්. නැප්තා වලින් දුවන කැලණිතිස්ස බලාගාරය දුවන එක ඩීසල්වලින් කෙළවරපිටිය දුවනවට වඩා ලාබයි. නැප්තා කියන්නෙ පිරිපහදුවෙදි අවශේෂ නිශ්පාදනයක්. නැප්තා අපිට බාහිර වෙළෙඳපලෙන් සපුගස් කන්දෙන් ගන්නවටත් වඩා අඩුවට ගන්න පුලුවන්. සපුගස්කන්දෙන් නැප්තා වැඩි මිලට අරන් දිව්වත් ඩීසල්වලට වඩා ලාබයි. සපුගස්කන්දෙ පිරිපහදුව අවහිර වෙලා නැප්තා නැතිවෙන වෙලාවෙදි අපට නැප්තා ගෙනත් දෙන්නෙ නෑ. ඩීසල් ගේනවනවා ඩීසල් බලාගාර දුවන්න.“
“ මේව ගැන කිසිම කෙනෙක් බලන්නෙ නෑ. අපට මැදිහත් විය හැකි ප්රමාණයක් තියනවා. ලෝකයෙ කොතැනවකවත් වෙන වැඩ නෙමෙයි මේ රටේ වෙන්නේ. නව බලාගාරයක් ඉදිකිරීමේ සිට විදුලි බිල දක්වා මේ තීන්දු තීරණ ගන්නේ පද්ධති කළමනාකරණය කරන වෘත්තිකයො නෙමෙයි. අමාත්යාංශයෙ නිලධාරීන්… මහජන උපයෝගීතා කොමිසම… වෙනත් දේශපාලන මැදිහත් වීම්.
“අඩුම ගානේ ඩොක්ටර් සියඹලාපිටිය කියන දෙයක්වත් මේ අය අහන්නෙ නෑ. “
“අපි ලෝකයත් එක්ක වැඩ කරපු මිනිස්සු. ඒ අත්දැකීම් තිබෙන මිනිස්සු. ලෝකයෙ වැඩ කරන විදිහ අපි දන්නවා. මේ විදිහට රටක් කොහොම ද යන්නෙ. “
“ඇමති එක්ක කතා කරන්න බෑ. ඔහුගෙ ආකල්පය තිබෙන්නෙ කොතැන ද?. පාර්ලිමේන්තුවෙ කතා කරලා කිව්වට පස්සෙ අපි මාෆියාකාරයො කියලා, වැඩ කඩාකප්පල් කරන කණ්ඩායමක් කියලා එතනින් එහාට මොකද කරන්නෙ.“
“මේ අය රට ගෙනියන්නෙ ඉතාම නරක තැනකට…“
ඉංජිනේරු සංගමයේ සභාපති අනිල් රංජිත් ඉඳුවර අවසාන වශයෙන් කීවේය.
