හරී බුධා මාගර් ගේ දෙපා දණහිසට පහළින් නැත. බ්රිතාන්යයේ කීර්තිමත් නේපාල රෙජිමේන්තුව වූ ගුර්කා බලකායේ සෙබලෙක් ලෙස වර්ෂ 2010 දී ඇෆ්ගනිස්ථානයේ රාජකාරි කරමින් සිටිය දී බෝම්බයකට හසුවීමෙන් ඔහුගේ දෙපා අහිමි විය. ඒ වනවිට ඔහුගේ වයස අවුරුදු 30කි.
දෙපා අහිමි වී වසර 13කින් පසු මේ හරී බුධා අමුතුම වැඩක් කරන්නට යන්නේය. ඒ මීටර 8848ක් උස ලෝකයේ උසම කන්ද වූ එවරස්ට් තරණය කිරීමය.
අත් පා හතර ඇත්තෙක් පවා තිගස්වන මේ අභියෝගයට මුහුණ දී එය ජය ගැනීමට ඔහු මැයි මාසයේ දි සැලසුම් කර ඇත්තේය. ආබාධිත බව යනු වචනයක් පමණක් බව ලෝකයට කියන්නට මේ 43 හැවිරිදි අසිරිමත් මනුෂ්යයා සූදානම් වෙමින් ඇත. ඒ දණහිසට පහළින් දෙපා අහිමිව එවරස්ට් තරණය කළ ලොව පළමු පුද්ගලයා බවට පත්වීමේ අභියෝගය ඉදිරිපත් කරමිනි.
බීබීසිය අමතා ඔහු සිය උත්සාහය සම්බන්ධව මෙසේ කියා තිබිණි.
“කකුල් දෙකම නැතිවුනාම මම හිතුවා මගේ ජීවිතය ඉවරයි කියලා. මං හිතුවා ජීවිතයේ ඉතිරි කාලයම රෝද පුටුවක තමයි ඉන්න වෙන්නේ කියලා.”
“ ඒත් මම වෙනස් විදිහකට හිත්න ගත්තා. කකුල් දෙකම නැති වුනාට පසසේ මගෙ ඉලක්කය වුනේ මට ශාරීරිකව කරන්න පුලුවන් දේ හොයන එක. මගේ මනස විවෘත කළා. මට හැකි හැම දේම උත්සාහ කළා.”
“මට ලෝකයට ධනාත්මක බලපෑමක් කරන්න ඕන වුනා. ආබාධිතබව ගැන දැනුම්වත් කරන්න ඕන වුනා. මම තෝරගත්තා එවරස්ට් නගින අභියෝගය.” හරී බුධා කීවේය.
ඔහු සිය දැක්ම ලෝකයට කියන්නේ මෙසේය.
“ ඕන කෙනෙකුට ඕන දෙයක් කරන්න පුලුවන්. ඒවා කරන්න වෙනස් විදි තියනවා. සීමාවක් නෑ… සීමාව අහස තමයි…”
වසර ගණනක පුහුණුවෙන් පසු මැයි මස දී එවරස්ට් නගින හරී බුධා තෝරාගෙන ඇත්තේ දැවන්ත අභියෝගයකි. දෙපා අහිමි හරී මීටර 8848ක් උස එවරස්ට් නැගීම ශාරීරික දුබලතා නැති අයෙකුට වඩා තුන් ගුණයක් මන්දගාමීයි.
එහෙත් මේ ශක්තිමත් මිනිසාගේ හිත එවරස්ට් වගේම උසය. ඔහු එය ජය ගනු ඇති බව ලෝකයම විශ්වාස කරමින් සිටින අයුරු පෙනේ.
බීබීසී –
