දිනසේන රතුගමගේ –
උතුරු ප්රදේශයෙන් රුසියානු හමුදාවට පුද්ගලයින් 200 ක් පමණ දෙනා බැදී සිටින බවටත් ඉන් කීප දෙනෙකු මියගොස් ඇති බවටත් තොරතුරු ලැබී ඇති නිසා වහාම රජය මේ පිළිබඳව සොයා බලා එම පිරිස ගැන යම් තොරතුරක් දැනුම් දෙන ලෙස ඉලංකෙයි තමිල් අරුසු කච්චි පක්ෂයේ නායක කිළිනොච්චිය දිස්ත්රික් පාර්ලිමේන්තු මන්ත්රී එස්. ශ්රීධරන් මන්ත්රීවරයා යළිත් වරක් අද ( 9 ) රජයට ලිපියක් යවමින් ඉල්ලීමක් කොට තිබේ.
මන්ත්රීවරයා ප්රකාශ කරන්නේ මේ පිළිබදව තමන් පාර්ලිමේන්තුවේදී තොරතුරු විමසූ අවස්ථාවේදී විජිත හේරත් අමාත්යවරයා මේ පිරිස ඔවුන්ගේ කැමැත්තෙන් ගොස් සිටින බව ප්රකාශ කළත් එම පිළිතුර සෑහීමකට පත්විය හැකි පිළිතුරක් නොවන නිසා රුසියානු හමුදාවේ සිටින උතුරේ වැසියන් පිළිබදව සවිස්තරාත්මක තොරතුරු ඉදිරිපත් කරණ ලෙස ලිපිය මගින් ඉල්ලා ඇත.
මේ වන විට ශ්රී ලාංකිකයින් 554 දෙනෙකු රුසියානු හමුදාවට බැදී ඇති බවටත් ඉන් 64 දෙනෙකු පමණ මියගොස් ඇති බවටත් තොරතුරු වාර්තා වන නමුත් මේ සංඛ්යා ලේඛන වල සත්යතාවය ගැන දෙගිඩියාවක් ඇති බැවින් රජය මැදිහත් වී නිවැරදි සංඛ්යා ලේඛන ජනතාවට ඉදිරිපත් කරන ලෙස මන්ත්රීවරයා ඉල්ලා සිටියේය.
මීට මාස හතරකට පමණ ඉහතදී උතුරු පළාතෙන් රුසියාවට ගොස් එම හමුදාවට බැදුණු සාමාජිකයින් කීපදෙනෙකුම ඔවුන්ගේ ඡායාරූප හා තොරතුරු ඔවුන්ගේ පවුල්වල උදවියට එවන ලද නමුත් මේ වන විට ඔවුන් ගැන කිසිදු තොරතුරක් නොමැති නිසා එම වැසියන් දැඩි පීඩනයකින් හා සිත්තැවුලකින් සිටින බව මන්ත්රීවරයා පවසයි.
එම පවුල් වල උදවියට මෙම පුද්ගලයින් පිළිබඳව නිවැරදි තොරතුරක් ලබා දීමට පියවර ගන්නා ලෙස ශ්රීධරන් මන්ත්රීවරයා සිය ලිපියෙන් රජයෙන් ඉල්ලා ඇත.
