මනම්පිටිය නිමල් ජයරත්න –
පොළොන්නරුව මාදුරුඔය ඉසඩ්.ඩී. ප්රධාන ඇළට අද ( 24 ) අලුයම පිඹුරත්තෑව ප්රදේශයෙන් වැටි සිටි වන අලියෙකු ජලයේ සැඩ පහරට හසුව කිලෝමීටර් 20 පමණ දුරට ගසාගෙන ගොස් තිබියදී පැය 11 ක මෙහෙයුමකින් අලියා ගොඩට ගෙන වෙහෙරගම රක්ෂිතයට පලවා හැරීමට පිඹුරත්තෑව වන ජීවී නිලධාරීන් විසින් කටයුතු කර තිබිණි.
පිඹුරත්තෑවෙන් වැටුණු වන අලියා ගොඩට ගෙන තිබුණේ අරලගංවිල මැදගම ප්රදේශයෙනි.
වන අලියා ගොඩට ගැනීම සඳහා අරලගංවිල පොලීසිය සහ ප්රදේශවාසීන්ගේ ද සහාය ලැබුණු බවත්, එම අලියාගේ වයස අවුරුදු හතළිහක් පමණ වන බවත් පිඹුරත්තෑව සහකාර අඩවි ආරක්ෂක, එස්.ඒ වික්රමරත්න අප කළ විමසීමකදී පැවසීය.
ඉසැඩ්.ඩී ඇළට වැටුණු වන අලියා කොන්ක්රීට් බෝක්කු අතරින් අවස්ථා කිහිපයකදීම ඇදවැටී තිබේ. ගොඩගත් අලියාගේ ශරීරයේ වෙඩි වැදුනු ලකුණු කීපයක් දක්නට තිබුණු බවද වනජීවී නිලධාරීහු සඳහන් කළහ.
