මන්නාරම වෙඩිතලතිව් රක්ෂිතයේ කොටසක් එහි ආරක්ෂිත තත්ත්වයෙන් නිදහස් කරමින් වනජීවී අමාත්ය පවිත්රා වන්නිආරච්චි නිකුත් කළ ගැසට් පත්රය බලරහිත කරන ලෙස ඉල්ලා ගොනු කර ඇති මූලික අයිතිවාසිකම් පෙත්සම විභාගයට ගැනීමට ශ්රේෂ්ඨාධිකරණය අවසර ලබා දුන්නේය.
පරිසර යුක්ති කේන්ද්රය ඇතුළු පිරිසක් විසින් ඉදිරිපත්කළ මෙම මූලික අයිතිවාසිකම් පෙත්සම සලකාබැලීමෙන් අනතුරුව ප්රීති පද්මන් සූරසේන සහ ශිරාන් ගුණරත්නගෙන් සමන්විත ශ්රේෂ්ඨාධිකරණ විනිසුරු මඩුල්ලක් විසින් මෙම නියෝගය නිකුත් කරනු ලැබීය.
ඉන් අනතුරුව පෙත්සම් විභාගය නොවැම්බර් මස 12 වනදා පැවැත්වීමට ද අධිකරණය දින නියම කළේය.
රක්ෂිත වනාන්තර කලාපයක් ලෙස නම්කර තිබෙන වෙඩිතලතිව් රක්ෂිත කලාපයෙන් අක්කර දෙදහස් පන්සීයකට ආසන්න භූමි ප්රමාණයක් රක්ෂිත භාවයෙන් නිදහස් කරමින් ඇමතිවරිය ගැස්ට් නිවේදනයක් නිකුත් කර තිබුණේ එම භූමියේ ඉස්සන් වගාවක් සඳහා බව පෙත්සම් කරුවෝ කියා සිටියහ.
පෙත්සම් කරුවන් පෙන්වා දුන්නේ මෙම තීන්දුව ප්රකාශයට පත් කළ ගැසට් නිවේදනය රටේ නීතිය වූ වනජීවී හා වෘක්ෂලතා අඥා පනතට පටහැනි බවය.
මෙම ක්රියාව නිසා අදාළ වනාන්තර කලාපයට පිවිසෙන සංක්රමණික පක්ෂීන්ට මෙන්ම ජල ජීවීන්ට ද විශාල අගතියක් සිදුවන ඔවුහු පෙන්වා දුන්හ.
මේ හරහා ප්රදේශයේ ජෛව විවිධත්වයට ද දැඩි බලපෑමක් සිදුවන හෙයින් අදාළ ගැසට් නිවේදනය බලරහිත කිරීමේ නියෝගයක් නිකුත් කරන ලෙස ද පෙත්සම්කරුවන් ශ්රේෂ්ඨාධිකරණයෙන් ඉල්ලා සිටියි.
