මනම්පිටිය නිමල් ජයරත්න –
පොළොන්නරුව මාදුරුඔය ඉසඩ්.ඩී. ප්රධාන ඇළට 20 වෙනිදා අලුයම වැටී සිටි වන අලියෙකු ගොඩ ගැනීමෙන් අනතුරුව එම අලියා දිඹුලාගල වෙහෙරගම ගම්මානයට කඩා වැදී එකම පවුලේ දෙදෙනෙකුට පහරදීමෙන් ඔවුන් දෙදෙනාම මියගොස් ඇති බව අරලගංවිල පොලිසිය කියයි.
මියගොස් ඇත්තේ වෙහෙරගම දේවගල ලිපිනයේ අංක 223 ලිපිනයේ පදිංචිව සිටි 80 වියති ඩී.ආර්. ප්රේමාවතී මැණිකේ මහත්මිය සහ ඇයගේ සොහොයුරෙකු වන 74 වියති, ඩී.ආර්. පොඩි රාළහාමි යන අය බව පරීක්ෂණ සිදුකරන අරලගංවිල පොලිසිය සඳහන් කරයි.
වන අලියා පහරදීමෙන් ඩී.ආර්. ප්රේමාවතී මැණිකේ මිදුලේම මියගොස් ඇති අතර ඇයගේ සොහොයුරා පොළොන්නරුව මහ රෝහලට ඇතුළත් කිරීමෙන් අනතුරුව මියගොස් ඇති බවද පොලිසිය පවසයි.
වාර්තාවන පරිදි සිද්ධිය මෙසේය.
මාදුරුඔය ජාතික වනෝද්යානයේ සිට බීමට ජලය සොයා පැමිණි වයස 35ක් පමණ ඇති වන අලියෙක් 20 වෙනිදා අලුයම පොළොන්නරුව මාදුරුඔය ඉසෙඩ්.ඩි. ප්රධාන ඇළට වැටී තිබේ.
මේ වන අලියා අරලගංවිල බමුණාකොටුව ප්රදේශයෙන් ඉසඩ්. ඩී. ප්රධාන ඇළට වැටී ජලයේ සැඩ පහරට හසුව ඌ කිලෝමීටර් හයක් පමණ දුරට ගසාගෙන ගොස් ඇත.
පැය තුනක පමණ මෙහෙයුමකින් අනතුරුව වෙහෙරගල වනජීවි නිලධාරීන් විසින්, මැදගම ප්රදේශයෙන් මෙම වන අලියා ගොඩට ගෙන තිබිණි.
වනජීවී නිලධාරීන් උත්සාහ කර තිබුණේ එම අලියා දිඹුලාගල වෙහෙරගම රක්ෂිතයට පලවා හැරීමටය. එහෙත් ගොඩට පැමිණි වන අලියා රක්ෂිතයට පලා යනු වෙනුවට වෙහෙරගම ගම්මානයට කඩා වැදුනි.
වෙහෙරගල ගම්මානයට කඩා වදින විට මුලින්ම ගම්මානයේ ඇල ඇසළ සිටි පිරිමි පුද්ගලයා සහ ඒ අසල පිහිටි නිවස ඉදිරිපිට සිටි කාන්තාවට මෙම අලියා පහරදී තිබේ.
පහරදීමෙන් තුවාල ලැබූ පිරිමි පුද්ගලයා මනම්පිටිය රෝහලෙන් පොළොන්නරුව මහ රෝලට ඇතුළත් කිරීමෙන් අනතුරුව මියගොස් ඇති බවද පොලිසිය පවසයි.
ඉසඩ් ඇලෙන් ගොඩගත් වන අලියා ගම්මානයට කඩා වැදීමට සැලැස්වීම පිළිබඳ වෙහෙරගල ගම්මානයේ ගම්වාසීන් වනජීවි නිලධාරීන්ට දැඩි විරෝධයක්ද මෙහිදී පලකර සිටියහ.
අරලගංවිල පොලිස් ස්ථානාධිපති පොලිස් පරීක්ෂක, ඉඳුනිල් හේමපාල ඇතුළු පොලිස් නිලධාරි කණ්ඩායමක් මේ පිළිබඳ වැඩිදුර පරීක්ෂණ සිදුකරයි.
