ශ්රියානි විජේසිංහ –
ඉමියුනෝග්ලෝබියුලින් ( immunoglobulin ) ගනුදෙනුව සම්බන්ධයෙන් මේ වන විට රක්ෂිත බන්ධනාගාරගත කර සිටින සැපයුම්කරුගේ නිතීඥයා විවෘත උසාවියේදී සඳහන් කළ පරිදි මෙම ගනුදෙනුවේ මහ මොළකරු සිටින්නේ කැබිනට්ටුවේ බැවින් ඔහු කවුද යන්න සොයා බලා වහාම අත්අඩංගුවට ගැනීමට කටයුතු කරන්නැයි රජයේ වෛද්ය නිලධාරින්ගේ සංගමය අපරාධ විමර්ශන දෙපාර්තමේන්තුවෙන් විශේෂ ඉල්ලීමක් කරයි.
මෙම ගනුදෙනුවට සම්බන්ධ පහළ සිටින නිලධාරින් කිපදෙනෙක් පමණක් අත් අඩංගුවට ගෙන මෙම ප්රශ්නය යට ගැසීමට උත්සහ කරන්නේ නම් ඒ පිලිබදව රජයේ වෛද්ය නිලධාරීන්ගේ සංගමය දැඩි විමසිල්ලෙන් පසුවන බවද සංගමයේ ලේකම් වෛද්ය හරිත අලුත්ගේ පවසා සිටියි.
ඉමියුනෝග්ලෝබියුලින් ඖෂධ සම්බන්ධයෙන් පමණක් නොව ප්රසම්පාදන ක්රියාවලිය තුළ සිදුකර තිබෙන වංචා දුෂණයන් සම්බන්ධයෙන් සොයා බලා වරදකරුවන්ට එරෙහිව වහාම පරික්ෂණයක් ආරම්භ කර වරදකරුවන්ට දැඩි දඩුවම් ලබා නොදුණහොත් වසර 2023ට වඩා 2024 තුළදී ඖෂධ හිගය වඩාත් උග්රවනු ඇති බවද හෙතෙම පෙන්වාදේ.
බොහෝ අක්රමිකතාවන්, වංචා , දූෂණ හා මිනිස් ජීවිතයට සිදුවන තර්ජන සියල්ලමක් සිදුවන්නේ හදිසි මිලදී ගැනීම් හේතුවෙන් යැයි පෙන්වා දෙන ලේම්වරයා සාමාන්ය ප්රසම්පාදන ක්රියාවලියකට වහාම අනුගත විම අනිවාර්යය යැයිද පවසි සිටිියි.
පසුගිය කාලය තුළදී සාමාන්ය ප්රසම්පාදන ක්රියාවලියක් නොදැක්ක බවත් දැක ගැනීමට හැකි වූයේ හදිසි මිලදී ගැනීම් පමණක් බවත් හෙතෙම වැඩි දුරටත් අවධාරණය කළේය.
