අහුංගල්ල RIU හෝටලය ඉදිරිපිට දී වෙඩි තැබීමේ සිද්ධියට අදාල කුලී ඝාතකයා ලෙස සැක කර පසුගිය 13 වැනිදා රාත්රියේ බළපිටිය, බණ්ඩරවත්තේදී පොලිස් විශේෂ කාර්යය බලකාය විසින් පිටපතකට අනුව වෙඩි තබා ඝාතනය කළේ එම ඝාතනයේ වෙඩික්කරු නොවන බව මේ වනවිට තහවුරු වී තිබේ.
ආයුද පෙන්වීමට යෑමේ පොලිසියේ පැරණි පිටපතට අනුව 13 දා මෙසේ ඝාතනය වන්නේ අංක 3/33, දෙව්රම්පේ, තණමල්විල ලිපිනයේ පදිංචිව සිටි පටුවන කම්මාචාරිගේ මහේෂ් ඉන්දික ප්රභාත් (36) නැමැති පුද්ගලයෙකි.
ඝාතන සිද්ධියට සම්බන්ධ වෙඩික්කරු යැයි තහවුරු කරගත් පසු සැකකරු අත් අඩංගුවට ගැනීමට යෑමේදී ඔහු අත් බෝම්බයකින් පොලිස් විශේෂ කාර්යය බලකා නිලධාරීන්ට පහර දීමට තැත්කර තිබෙන බවත් පෙරලා පොලිස් විශේෂ කාර්යය බලකාය විසින් තබන ලද වෙඩි පහරින් සැකකරු මියගොස් තිබෙන බවත් පොලිසිය කීවේය. සැකකරු ලඟ ජීව අත්බෝම්බයක් ද තිබුණු බව පැවසුවේය.
එහෙත් සිද්ධියට සම්බන්ද නියම වෙඩික්කරු ඊයේ (20) හෝකන්දර සිංහපුර ප්රදේශයේ සැඟව සිටිය දී බස්නාහිර දකුණ අපරාධ විමර්ශන කොට්ඨාසය විසින් අත්අඩංගුවට ගත් බවත් ඔහු දන්කුඩ්ඩා නැමැත්තෙක් බවත් මේ වනවිට විමර්ශන අංශ හෙළි කරගෙන ඇත.
අත්අඩංගුවට ගත් සැකකරු හිටපු හමුද ලාන්ස් කෝප්රල්වරයෙකි. කුලී වෙඩික්කරුවා යැයි උපකල්පනය කර විශේෂ කාර්ය බලකාය විසින් ඝාතනය කර තිබුණේ වෙඩික්කරු රැගෙන වාහනය පදවාගෙන ගිය පුද්ගලයා බව දැන් තහවුරු වී ඇත.
හෝකන්දර දී අත්අඩංගුවට ගත් දන්කුඩ්ඩා 2019 වසරේ තලංගම පොලිස් වසමේ හෝකන්දර ප්රදේශයේ පදිංචි 74 හැවිරිදි කාන්තාවක ගෙන සිරකර මරා දැමීමේ සිද්දියේ ප්රධාන සැකකරුද වන බව විමර්ශන අංශ පවසයි.
ඉහත කාන්තා ඝාතනය සම්බන්ධව රිමාන්ඩ බන්ධනාගාරගත වී වසර එක හමාරකට පසු ඔහු ඇප මත නිදහස් වී පැමිණ ඇත.
ඇප මත සිටින ඔහුට අහුංගල්ල ත්රීවිල් රියදුරා ඝාතන කොන්ත්රාත්තුව විදේශයකින් ලැබෙන්නේ බන්ධනාගාරයේ දී හඳුනාගත් අපරාධකරුවෙකුගේ මාර්ගයෙනි.
ඝාතනය සඳහා ඔහු ගාල්ලට ගිය බවත්, ගාල්ලේ දී ඔහුව මෝටර් රථයක නන්වාගෙන ඇති අතර යන ගමන අතරමග දී ඔහුට ටී 56 ගිනි අවියක් සපයා ඇති බවත් වාර්තා වේ. රියූ හෝටලය අසලදී ඔහුට ඝාතන ඉලක්කය පෙන්වා ඇත්තේ වාහනයේ රියදුරු විසිනි.
එහෙත් වෙඩි තබන විට ගිනි අවිය පත්තු නොවූ බවත් එහිදී ඉලක්කය වැරදී ගොස් ඉලක්කගත පුද්ගලයා පලා ගොස් ඇති බවත් ගිනි අවියේ එල්ලී ඇත්තේ වෙනත් පුද්ගලයෙක් බවත් දැන් අනාවරණය වී ඇත.
එසේ ගිනි අවිය සමග පොර බදද්දී එය බිම වැටී ක්රියාත්මක වීම හේතුවෙන් පොර බැදූ පුද්ගලයාගේ පාදයට වෙඩි වැදී තිබේ. ඉලක්කය පලා ගොස් ඇති බැවින් තවත් වෙඩි තැබීම්වලට නොගොස් ගිනි අවිය අහුලාගත් දන්කුඩ්ඩා රථයට නැගී පලා ගොස් ඇත.
මගදී ගිනි අවිය රථයේ රියදුරුට භාර දී ඇති අතර ඔහුට රුපියල් ලක්ෂයක මුදලක් ද රියදුරු විසින් ලබා දී ඇත. ගිනි අවිය ක්රියාත්මක නොවූ නිසා ඉලක්කය වැරදී ගිය බවත් ගිනි අවිය ක්රියාත්මක නොවුනේ එය නිසි ලෙස නඩත්තු නොකර තිබීම නිසා බවත් දන්කුඩ්ඩා විමර්ශන අංශ වෙත පවසා තිබේ.
සැකකරු පවසා තිබුණේ විශේෂ කාර්ය බලකාය විසින් අල්ලා මරා දැම්මේ ඔහු සමග එදින පැමිණි රථයේ රියදුරු බවය.
දන්කුඩ්ඩා රඳවා තබාගෙන ප්රශ්න කෙරේ.
කොටිකාවත්ත මුල්ලේරියාව ප්රාදේශීය සභා මන්ත්රී සුමුදු රුක්ෂාන් පිංතු ඝාතනය කිරීම සම්බන්ධව එස්ටීඑෆ් අත්අඩංගුවේ දී ආයුද පෙන්වීමට ගොස් පසුගිය අගෝස්තු 08 දා ගල්කොරියක දී ඝාතනය වුන තුවාන් ශිරාන් නමැත්තා මන්ත්රී ඝාතනයේ සැබෑ මිනීමරුවා නොවුන බව පසුව විමර්ශන වලදී අනාවරණය විය.
නීතිය අතට ගෙන කෙරෙන මේ පොලිස් ඝාතන සම්බන්ධව මේ වනවිට ජාත්යාන්තර මානව හිමිකම් සංවිධානවල අවධානය යොමු වී තිබේ.
