මනම්පිටිය නිමල් ජයරත්න –
පොළොන්නරුව දිඹුලාගල, වැලිකන්ද, ඇතුළු මහවැලි බී කලාපයේ ප්රදේශ රැසකට දින දෙකක කාලයක් පුරා උදෑසන කාලයේ අහසින් කඩා හැලෙනා හඳුනා නොගත් මකුළුදැල් වලට සමාන සුදු පැහැති කෙඳී වර්ගයක් පතිත වීම නිසා ප්රදේශවාසීහු විමතියට පත් වී සිටිති.
ඊයේ (10) පොලොන්නරුව, ජයන්තිපුර ප්රදේශයට මෙම හඳුනා නොගත් සුදු පැහැති කෙඳි වර්ග හෙවත් මකුළුදැල්වලට සමාන ද්රව්ය වැටීමත් සමගම ප්රදේශයේ පෙර පාසලක්ද වසා දැමීමට තීරණය කෙරිනි. එම සුදු පැහැති කැබලි මධ්යම පරිසර අධිකාරියේ මගින් පරීක්ෂණයක් සඳහා කොළඹට යවා ඇති බවද සඳහන් වේ.
අද (11) උදෑසන කාලයේදී දිඹුලාගල, නුවරගල, පිහිටිවැව, යක්කුරේ, මනම්පිටිය, සිරිපුර, ඇතුළු අවට ප්රදේශ වලටත් වැලිකන්ද නෙළුම්වැව, මධුරංගල, ඇතුළු අවට ගම්මාන වලටත් මෙම සුදු පැහැති ද්රව්ය වැටෙමින් පවතින බවට අහස හොඳින් නිරීක්ෂණය කරන අයවලුන් දැක තිබේ.
අහසෙන් වැටෙන එම මකුළු දැල්වලට සහ පුළුන් කැබලි වලට සමාන ද්රව්ය හිරු රස්නයට මෙන්ම අධික උෂ්ණත්වයට දියවී යන බවත්, උදෑසන කාලයේ මේවා විශාල වශයෙන් පොලොන්නරුව ප්රදේශයට වැටෙන අතර ඒවා ප්රදේශයේ විදුලි රැහැන් හා ශාකවල දැවැටී තිබෙන අයුරු ප්රදේශවාසීන් විසින් දැක නිරීක්ෂණයට ලක්කර ඇත.
අහසින් පොළොවට පතිත වන හඳුනා නොගත් එම සුදු පැහැති ද්රව්ය අතට ගෙන තත්පර කිහිපයක් ඇතුලත දිය වීමට ලක්වන බවද පොළොන්නරුව ඇතුළු අවට ගම්මානවල ගොවීහු සඳහන් කරති.
පොළොන්නරුව ඇතුළු අවට ප්රදේශවලට මේ දිනවල රාත්රී කාලයේ ගිගුරුම් වැසි පතිතවන අතර එම වර්ෂාවෙන් අනතුරුව පසුවදා පවතින හිරු රස්නයක් සමග මෙම හඳුනානොගත් ද්රව්ය පොලොවට අහසින් පාත් වන අතර මීට වසර තුනකට පමණ ඉහතදී ඓතිහාසික දිඹුලාගල ආරණ්ය සේනාසනයට මෙන්ම ඒ අවට දලුකාන, නාමල්පොකුණ, මලියදේවපුර, සොරිවිල, මනම්පිටිය, ඇතුළු අවට ගම්මාන වලටත් මෙවා වැටී තිබිණි.
