-
අපි දේශපාලකයින් හැටියට අපේ සීමාව දන්නවා. අපි ඒ සීමාවෙ ඉන්නම්… රාජ්ය සේවකයො හැටියට නිවහල්ව ඔබේ රාජකාරිය කරන්න – අගමැති හරිනි
-
අපි කිසිම ආකාරයක දූෂණයකට වංචාවකට අපේ පැත්තෙන් ඉඩ තියන්නේ නෑ… අපි නොකරන කිසිම දෙයක් ඔබත් මින් පසු කරන්න බෑ. – වරාය හා සිවිල් ගුවන්සේවා ඇමති විජිත
කාර්යක්ෂම සහ ජනතාවාදී රාජ්ය පාලනයක් ගොඩනැගීම තමන්ගේ ඉලක්කය බව ආචාර්ය හරිනී අමරසූරිය කීවාය. ඊයේ ඇය මේ බව පැවසුවේ අග්රාමාත්යවරිය ලෙස වැඩ භාරගැනීමෙන් අනතුරුව අග්රාමාත්යවරිය ලෙස සිය කාර්යාලයේ නිලධාරීන් මුල් වරට අමතමිනි.
ශක්තිමත් ජනතාදී රාජ්ය සේවයක් ගොඩනගන එක තමයි අපේ අරමුණ. රාජ්ය සේවය කියන එක තුළ නැවත වතාවක් ඒ සේවා ගරුත්වය ඇති කළ යුතුයි. ජනතාව සහ රාජ්ය සේවය අතර විශ්වාසය ගොඩනැගිය යුතුයි. රජයේ සේවකයින්ට සාධාරණව වැඩ කරන්නත් පුලුවන් වෙන්න ඕන.
අප දකින විදිහට දේශපාලනයට තියනවා කාර්යභාර්යයක්. රාජ්ය සේවයට තියනවා කාර්යභාර්යයක්. හැබැයි දේශපාලඥයාගේ සීමාව දේශපාඥයා දැනගන්නත් ඕනි. රාජ්ය සේවකයා තමන්ගේ සීමාව තේරුම් අරන් කටයුතු කරන්නත් ඕන. අපි එකතු වෙලා වැඩ කරමු.
අගමැතිවරිය ඉල්ලා සිටියාය.
මහජන ආරක්ෂක අමාත්යාංශයට පැමිණ වැඩ භාරගත් විජිත හේරත් පොලිසිය ඇමතුවේය. මෑත කාලයේ දී පොලිස් දෙපාර්තමේන්තුවට ඒ ආකාරයෙන් කිසිම දේශපාලඥයෙක් කතා කළ බව මතක නැත.
“පොලිසියේ උසස් නිලධාරී මහත්තුරුන්ගෙන් අපි ඉල්ලා සිටින්නේ මෙතෙක් පැවතුනා නම් විවිධ වැරදි ක්රම ඒ වැරදි ක්රම වෙනස් කරමු. ඒ සම්බන්ධයෙන් සම්පූර්ණ නිදහස අපි දෙනවා. ඔබතුමාලගේ පැත්තෙන් තියෙන්නේ දේශපාලඥයින්ගේ මැදිහත්වීම්වලට අනුව කටයුතු කරන්නේ නැතිව නීතිය සහ සාමය රැකීම. එය ස්වාධීනව කරන්න. කිසිදු දේශපාලන මැදිහත්වීමකට යට වෙන්න එපා. අපේ ආණ්ඩුවේ ඇමතිවරු, මන්ත්රීවරු ඕඅයිසී මහත්තුරුන්ට කතා කරලා අරදේ කරන්න මේ දේ කරන්න කියලා වැරදි පරණ සංස්කෘතිය කරන්නේ නෑ. ඒ ගැන අපි සහතික වෙනවා. මේ රටේ ජනතාවටත් අපි ඒක කියනවා. ”
“මෙතැන් සිට අලුතින් වැඩ කරමු. රට අලුත් තැනකට ගෙනෙමු. එ් වෙනුවෙන් අපි සෑම දෙනාම කැපකිරීමක් කරලා මැදිහත් වෙමුය කියන ඉල්ලීමත් නිලධාරීන් සියලු දෙනාගෙන්ම ඉල්ලීමක් කරනවා.”
මේ රටේ වෙනසට ඒ වෙනස් වචන ටික හරහා පොලිස් දෙපාර්තමේන්තුවට ලැබෙන පෞරුෂය ප්රමාණවත්ය. මෙවැනිම කතාවක් විජිත වරාය හා ගුවන් සේවා අමාත්යාංශයට පැමිණ රාජකාරි අරඹමින් නිලධාරීන්ට පැවසුවේය.
“රටේ ජනතාව නව ජානාධිපතිවරයාට ඡන්දය දුන්නේ මේ රටේ මෙතෙක් පැවතිච්ච දේශපාලන සංස්කෘතිය වෙනස් කරන්න. දේශපාලන සංස්කෘතිය වෙනස් කරනවා කියන්නේ දේශපාලනඥයන්ගේ විතරක් නෙමෙයි. නිලධාරීන්ගේ පැත්තෙන් රජයේ ආයතනවලත් එය වෙනස් විය යුතුව තියනවා. සරල භාෂාවෙන් ගත්තොත් දේශපාලන සංස්කෘතිය කිව්වට හොරකම, වංචාව, දූෂණය, නාස්තිය, අපේ රටෙන් තුරන් කරන්න තමයි අපට ජන වරම ලබා දීලා තියෙන්නේ.
දේශපාලඥයින් හැටියට විවේචන තියනවා වගේම අපේ රටේ මහ ජනතාවට රාජ්ය ආයතන පිලිබඳවත් දිගුකාලීන විවේචන තියනවා. සමහර විවේචන එල්ල වෙන්නේ දේශපාලන අධිකාරියෙ වැරදි නිසා නිලධාරීන්ට මුහුණ දෙන්න වෙන තත්ත්වයන්. තවත් සමහර දේවල් තියනවා නිලධාරීන්ගේ පැත්තෙන්ම වෙච්ච අඩුපාඩුකම්.
දැන් ඒ අතීතය අපි ඉවර කරන්න ඕන. අපි අනාගතයේ දි හදන්න ඕන වංචාවෙන් දූෂණයෙන් තොර අමාත්යාංශයක් වගේම රටක් හදන්න ඕන. එතනදි මටත් විශාල වගකීමක් පැවරෙනවා. ලේකම් තුමා ඇතුළු ඔබ සියලු දෙනාටත් ඒ වගකීම පැවරෙනවා.
අතීතයේ යම් යම් අඩුපාඩු සිද්ධ වෙන්න ඇති. හැබැයි මම අවධාරණය කරලා කියනවා මෙතනින් එහාට මේ අමාත්යාංශවල කිසිම ආයතනයක මෙවැනි සිදුවිමක් වාර්තා වෙන්න බෑ. ඒක අපි දැඩි ලෙස අවධාරණය කරනවා. මොකද අපට ජන වරම තියෙන්නේ ඒකට. ඒ ජනවරම ක්රියාත්මක කරන්න අපි කවුරුත් බැඳිලා ඉන්නවා.
අර ඇමතිතුමා මේ ඇමතිතුමා අරක කරන්න මේක කරන්න, අහවලාට මේ ටෙන්ඩරය දෙන්න, උඩින් දාන්න වගේ දේවල් අපි කියන්න එන්නෙ නෑ. අපි ඒවා කියන්නේ නැතිනම් ඔයාලත් ඒවා කරන්න බෑ. අපි කරන්නේ නැතිනම් ඔයලාගෙ පැත්තෙනුත් හිතවත්කම්වලට යාලුකම්වලට වෙන්න බෑ. මෙතනින් එහාට නිවැරදි ප්රසම්පාදන ක්රියාවලියයි ටෙන්ඩර් පටිපාටියයි අනුගමනය කරලා සියලු ව්යාපෘති සිදුකළ යුතුව තිබෙනවා.
කලින් කොහොම වැඩ කළා උනත් කමක් නෑ. විවිධ ඇමතිවරුන් එක්ක වැඩකරලා ඇති. ඒ විදිහටම වැඩ කරන්න ලෑස්ති වෙන්න එපා. අපි අලුත් විදිහට වැඩ කරමු.
මම දේශපාලන හේතුමත සලකලා වැඩ කරන්නේ නැතිනම් ඔයාලගේ පැත්තෙනුත් වගකීමක් බැඳීමක් යුතුකමක් තියනවා එහෙම නැතිව වැඩ කරන්න.
