මනම්පිටිය නිමල් ජයරත්න –
වන අලින්ගෙන් තවද්රරත් සිදුවන හානියත්, අලි මිනිස් ගැටුම වලක්වාලීමටත් දියත් කර ඇති කෙටි කාලීන වැඩපිළිවෙළ යටතේ වන අලින් යළි රක්ෂිතවලට පලවා හැරීමට වන ජීවී දෙපාර්තමේන්තුවට අවශ්ය භෞතික සම්පත් හැකි උපරිමයෙන් සපයා බිඳී ඇති තැන්වල අලි වැට යළි සකස් කිරීමටත්, ඊට සමගාමීව දීර්ඝකාලීන තිරසාර සහ විද්යාත්මක වැඩපිළිවෙළක් ආරම්භ කිරීමටත් මේ වනවිට කටයුතු කර ඇති බව පරිසර අමාත්ය වෛද්ය ධම්මික පටබැඳි පවසයි.
වන අලි පලවා හැරීමේ කටයුතු කෙටි කාලීනව සාර්ථක කරගැනීමට වනජීවි නිලධාරින්ට අවශ්ය තාක්ෂණික උපකරණ, වාහන සහ ඉන්ධන මේ වනවිට ලබා දී ඇති ආකාරය පරිසර අමාත්යවරයා හෙළි කළේය.
වෛද්ය ධම්මික පටබැදි මහතා මේ අදහස් පලකර සිටියේ පොළොන්නරුව දිස්ත්රීක්කයේ වනජීවී ගැටලු පිලිබද සාකච්ඡා කර ඊට විසදුම් ලබාදීම වෙනුවෙන් පොළොන්නරුව දිස්ත්රීක්කයේ වනජීවී විෂය සම්බන්ධයෙන් කටයුතු කරනු ලබන රාජ්ය නිලධාරීන් හමුවී පොළොන්නරුව දිස්ත්රීක් ලේකම් කාර්යාලයේදි ඊයේ 11 පැවති රැස්වීමකට සහභාගී වෙමිනි.
මෙම අවස්ථාව සඳහා පරිසර නියෝජ්ය අමාත්ය ඇන්ටන් ජයකොඩි නිවාස නියෝජ්ය අමාත්ය ටී.බී.සරත් පොළොන්නරුව දිස්ත්රීක් ජාතික ජන බලවේගයේ පාර්ලිමේන්තු මන්ත්රීවරුන් වන සුනිල් රත්නසිරි වෛද්ය ජගත් වික්රමරත්න සහ පද්මසිරි බංඩාර වනජීවී අධ්යක්ෂ ජනරාල් වරයා ප්රාදේශීය ලේකම්වරුන් වනජීවී නිලධාරීන් යුද හමුදාව පොලීසිය සිවිල් ආරක්ෂක නිලධාරීන් ඇතුළු රාජ්ය නිලධාරීන් හා ග්රාමීය සංවිධානවල නියෝජිතයින් විශාල පිරිසක් මේ අවස්ථාවට සහභාගි වී සිටියහ.
මෙහිදී වැඩිදුරටත් අදහස් දක්වමින් පරිසර අමාත්ය වෛද්ය ධම්මික පටබැදි මෙසේද පවසා සිටියේය.
මේ සාකච්ඡාවේදී මූලිකම අරමුණු වුණේ පොළොන්නරුව දිස්ත්රීක්කයේ ප්රාදේශීය ලේකම් කොට්ටාශවලට බලපා ඇති අලි මිනිස් ගැටුමට ඉක්මන් විසදුම් ලබා දීමයි.
ඊට විසදුම් විදිහට ඒ තත්වය වැළැක්වීම සඳහා අපි කඩිනම් ක්රියාමාර්ග ගැනීමට අද දිනයේ තීන්දු තීරණ ගත්තා. අපි විශ්වාස කරනවා ඒ විසදුම් තුලින් මේ ප්රශ්ණයට කෙටි කාලීන විසදුම් ලැබෙයි කියලා.
ඒ අතර අපි පරිසර අමාත්යාංශය වගේම ඊට සම්බන්ධ අනෙකුත් ආයතනත් සම්බන්ද කරගෙන දීර්ඝ කාලීන විසදුම් වලට යන්න තීරණය කරලා තියෙනවා.ඒවා දැනටමත් ක්රියාත්මක වෙලා තියෙනවා. ඒ නිසා මේ සාකච්ඡාව සාර්ථකයි. අපි විශ්වාස කරනවා මේ කෙටි කාලීන ක්රියාමාර්ග තුල සහනයක් ලැබෙයි කියලා.
මේ ගෑටලු තියෙන තැන් හඳුනා ගෙන ගම්වැදිලා ඉන්න අලි රක්ෂිත වලට පලවා හරින්නත් බිද වැටිලා තියෙන අලි වැටවල් ප්රකෘති තත්වයට පත් කරන්නත් ඒ වගේම වනජීවී හා වන සංරක්ෂණ නිලධාරීන්ගේ පහසුව සඳහා වාහන ලබා දීමටත් මේ සඳහා ඒ ප්රදේශවල තිබෙන ආයතන සම්බන්ධ කරන්නත් අවශ්ය කටයුතු කළා.
පරිසර අමාත්යවරයා විදිහට වගේම පරිසර අමාත්යාංශයත් මේ වනවිට හදුනාගෙන තියෙනවා මේ රටේ පරිසර සමතුලිතතාවය බිදී ගොස් තිබෙන බව. ඒ නිසා ගොවීන්ට සාමාන්ය ජනතාවට විශාල පීඩනයක් හිරිහැරක් මේ නිසා ඇති වෙලා තියෙනවා. ඉතින් අපි මේ ප්රශ්නය විසදගන්න ඕන. නැවත පරිසර තුළිතතාවය ඇති කරන්න ඕන. එවිට මේ ගැටලු විසඳේවි. ” අමාත්ය වෛද්ය ධම්මික පටබැඳි සඳහන් කළේය.
