තුෂාරී කළුබෝවිල –
දිවයිනේ ප්රදේශ රැසකට බලපෑ අධික වැසි හා ගංවතුර තත්ත්වය හේතුවෙන් දිස්ත්රික් 11ක පුද්ගලයන් 4ක් මිය තිබේ.
දිස්ත්රික්ක 11ක, අයත් ප්රාදේශීය ලේකම් කොට්ඨාස 34ක, පවුල් 5212 කට අයත් පුද්ගලයින් 21888 දෙනෙකු මේ වනවිට අධික වැසි සමග ඇති වූ ආපදාවන්ගෙන් විපතට පත් ව ඇතැයි ආපදා කළමනාකරණ මධ්යස්ථානය පවසයි.
සහන කඳවුරු 4ක පුද්ගලයින් 264 දෙනෙකු තාවකාලික ව රඳවා සිටින අතර නිවාස හා කුඩා ව්යාපාරික ස්ථාන 128 කට ද හානි සිදු ව තිබේ.
විවිධ සංවර්ධන කටයුතුවලදී ස්වාභාවික පරිසරයට සිදු කර තිබෙන නොයෙකුත් අවහිරතා සහ හානි හේතුවෙන් වැසි ජලය නිසි පරිදි ගලා නොයාම නිසා දින දෙකක වර්ෂාවෙන් විශාල පිරිසක් පීඩාවට පත් ව ඇත.
හම්බන්තොට දිස්ත්රික්කයේ බෙලිඅත්ත, ගාල්ල දිස්ත්රික්කයේ වැලිපිටිය, ත්රිකුණාමලය දිස්ත්රික්කයේ මුතූර්, කිලිනොච්චිය දිස්ත්රික්කයේ කිලිනොච්චිය, කලුතර දිස්ත්රික්කයේ දොඩංගොඩ, ඉංගිරිය, හොරණ, මිල්ලනිය, මතුගම, ගම්පහ දිස්ත්රික්කයේ කැලණිය, මහර, කටාන, ජාඇළ, දොම්පේ, ගම්පහ, වත්තල, බියගම, මිනුවන්ගොඩ, කොළඹ දිස්ත්රික්කයේ තිඹිරිගස් යාය, හෝමාගම, කොළොන්නාව, සීතවක, ශ්රී ජයවර්ධනපුර කෝට්ටේ, පුත්තලම දිස්ත්රික්කයේ කරුවලගස්වැව, වෙන්නප්පුව, රත්නපුර දිස්ත්රික්කයේ ඇහැළියගොඩ, පැල්මඩුල්ල, ඕපනායක, නිවිතිගල, මහනුවර දිස්ත්රික්කයේ ගඟ ඉහළ කෝරළේ, මැද දුම්බර, අකුරණ, හාරිස්පත්තුව, කෑගල්ල දිස්ත්රික්කයේ වරකාපොළ මෙසේ බලපෑමට ලක් වූ ප්රදේශ වේ.
මෙම සියලු ප්රදේශවල කඳුකර ආශ්රිත ව තවදුරටත් නායයාම් අවදානම පවතින බවට නිවේදන නිකුත් කර ඇති අතර කලු ගඟ, මගුරු ගඟ, කුඩා ගඟ, අත්තනගලු ඔය, කැලණි ගඟ, ගුරුගොඩ ඔය, ගිං ගඟ, නිල්වලා ගඟ ආශ්රිත පහත් බිම් රැසක් ද ජලයෙන් යට විය.
විපතට පත්වූවන්ට සහන සැලසීමේ කටයුතු අඛණ්ඩ ව ක්රියාත්මක බව ආපදා කළමනාකරණ මධ්යස්ථානයේ නියෝජ්ය අධ්යක්ෂක ප්රදීප් කොඩිප්පිලි මහතා කීවේ ය.
