උපේක්ෂා උඩුවැරැල්ල –
හිතුවා හරියටම හරිය. වැඩේ පස්සේ ඉන්නේ කාලකණ්ණි කුඩ්ඩෙකි. අද උදෑසන (මැයි 16 ) කැලණිය සහ වනවාසල දුම්රිය ස්ථාන අතරතුර ප්රදේශයේ දී මගී දුම්රියක් පිලී පැන මැදිරියක් ගැලවී විසීවී 12 දෙනෙක් තුවාල ලැබූ අසාමාන්ය අනතුර පසුපස ඉන්නේ මත්ද්රව්ය භාවිතය සඳහා රේල්පීලිවල ඇන ගැලවූ ඊට ඇබ්බැහි වූ එකෙකි. දැනට සැක පිට එකෙක් අත් අඩංගුවට ගෙන තිබේ. පොලිසිය කියන්නේ මේකාම මේ වැඩේ කළා දැයි තවම නිශ්චිතව කිව නොහැකි බවය.
වාර්තාවන පරිදි සිද්ධිය මෙසේය. වනවාසල දුම්රිය ස්ථානය පසුවී මීටර 200ක් පමණ යනවිට විශේෂ අංගනයක් වෙත දුම්රිය මාර්ගයක් හදා තිබුණේය . මේ දුම්රිය මාර්ගය හැදුවේ ඊට නුදුරින් තනා ඇති කසල ප්රතිචක්රීකරණ මධ්යස්ථානනය වන සොලිඩ් බේස් (Solid Base) අංගනය වෙත දුම්රිය ගමන් කරවීමයට. පසුගිය රජය සමයේ මෙම අංගනය සහිත වැඩ පිළිවෙළ සකස් කරනු ලැබුවේ දිප්පිටිගොඩ පාර හරහා ලොරිවලින් රැගෙන එන කුණුවල ප්රතිචක්රීකරණය කළ නොහැකි කොටස් අරුවක්කාලු වෙත දුම්රියෙන් ගෙනයෑම සඳහාය.
දැනට නිරීක්ෂණය වී ඇත්තේ ‘සොලිඩ් බේස්’ (Solid Base) අංගනයට ඇතුළු වන මාර්ගය සහ ප්රධාන දුම්රිය මාර්ගය එකිනෙක සම්බන්ධ වන, පීලි මාරු කරන ස්ථානයේ (Point) තිබූ යකඩ බාර් (Lock bars) කුඩ්ඩන් විසින් ගලවා ඉවත් කර ඇති ආකාරය ය.
එම කොටස් ගැලවීම හේතුවෙන් පීලි මාරු කරන ස්ථානය ලිහිල් වී තිබේ. ඒ නිසා ධාවනය වූ දුම්රියේ ඉදිරි මැදිරි ප්රධාන මාර්ගයේත්, පසුපස මැදිරි සොලිඩ් බේස් මාර්ගයේත් ගමන් කර ඇත. මෙලෙස මැදිරි පීලි දෙකකට බෙදී ධාවනය වීම හේතුවෙන් මෙම බලවේග කට්ටල දුම්රියේ දෙවන මැදිරිය පීලි පැන පෙරළීමට ලක්ව තිබේ.
මේ සම්බන්ධයෙන් දුම්රිය බලධාරීන් විසින් පොලිසියට පැමිණිලි කළේය. පොලිස් විශේෂ විමර්ශන ඒකකයක් මඟින් මේ වන විට ස්ථානීය පරීක්ෂණ ඇතුළු පුළුල් විමර්ශනයක් ආරම්භ කර මත්ද්රව්යයට ඇබ්බැහි වූ එකෙක් මේ වනවිට අත් අඩංගුවට ගෙන ඇත්තේය.
පීලි පනින්නේ අලුයම 3.25ට පොල්ගහවෙලින් දකුණු කළුතර දක්වා ගමන් කරන මන්දගාමී දුම්රියය. එම දුම්ර්ය කොළඹ කොටුවට ලඟා වන්නට නියමිතව ඇත්තේ අළුයම 5.38 ටය. මීට ආසන්න වෙලාවලදී දුම්රිය තුනක් මේ මාර්ගයේ ගමන් කරන්නේය. එනම් 2.46 ට පොල්ගහ වෙල පසුකර එන සීඝ්රගාමී දුම්රිය, 3.09ට පොල්ගහවෙල සිට මොරටුව දක්වා ගමන් කරන සීඝ්රගාමී දුම්රිය, 3.47ට පොල්ගහවෙලින් පිටත් වී මන්දගාමී දුම්රිය ඉස්සරකරමින් පැමිණ 5.17ට ගමන් කොළඹ කොටුව දුම්රිය ස්ථානය වෙත ගමන් ගන්නා සීඝ්රගාමී දුම්රිය ය.
කෙසේ වෙතත් මේ දුම්රිය තුනම අනතුරට ලක් වූයේ නැත. ඒ දුම්රියක් අනතුරට පත් වුවා නම් සිදුවන විනාශය සිතාගන්නටවත් නොහැකි වනු ඇත. මේ මන්දගාමි දුම්රිය වනවාසල දුම්රියපලේ ද නවත්වා ඒ ප්රදේශය පසුවනවිට ධාවනය කරන්නේ මද වේගයෙනි
පෑලියගොඩ පොලිසිය සිදුකළ මූලික විමර්ශනවලදී හෙළි වී ඇත්තේ මෙම සැකකරු දුම්රිය මාර්ගයෙන් ගැලවූ යකඩ වෙනත් ස්ථානයකට ප්රවාහනය කර ඇතිදැයි සොයා බලන බවය. ඔහු මත්ද්රව්යවලට ඇබ්බැහි වූවෙකු බව ද පොලිසිය සනාථ කර ඇත. මෙම සිදුවීමට සම්බන්ධ තවත් සැකකරුවෙක් අත්අඩංගුවට ගැනීම සඳහා පෑලියගොඩ පොලිසිය මේ වන විට වැඩිදුර විමර්ශන ක්රියාත්මක කර තිබේ.
දුම්රිය දෙපාර්තමේන්තුවේ උසස් නිලධාරීන් කණ්ඩායමක් අනතුර සිදුවූ ස්ථානයට පැමිණ පරීක්ෂණ ආරම්භ කර ඇති අතර, මාර්ගය යථා තත්ත්වයට පත් කිරීමේ කටයුතු කඩිනමින් සිදු කෙරේ. හානිවූ රේල් පාරේ දිග සහ වර්ග ඵලය, අදේශක ද්රව්යවල මිල ගණන්, මැදිරියේ හානිය, දුම්රිය සේවා අඩපණ වීම හේතුවෙන් සිදුවූ අලාභය, තුවාල ලැබ බරපතල තත්ත්වයේ පසුවන අසරණ මගීන්ට සිදුවන ආර්ථික හානිය ගණනය කළ හොත් මේ මිල කොපමණදැයි අපට වැටහෙන්නේ නැත. කුඩු වඩියක් සඳහා රේල් පාරේ ඇණ ගැලවූ එකාද වින්දිතයෙකි. ඌ මත්ද්රව්යවලට ඇබ්බැහිවීමත් සමාජ ව්යසනයක කතාවකි. මහා සමාජ සංකීර්ණයක කතාවක් පමණක් ඛේදවචාකයක් ලෙස ප්රකාශ වී ඇත. ප්රශ්නය එතනමය. හෙටත් මේ දේ සිදු නොවනු ඇතැයි කිසිවෙකුට සහතිකයක් නැත.
