මහනුවර තෙල්දෙණිය ප්රදේශයේ නවතා තිබූ මෝටර් රථයක් තුළ තිබී කාන්තා මළ සිරුරක් සොයාගැනීමේ සිද්ධියේ ප්රධාන සැකකරු වන මියගිය කාන්තාවගේ පෙම්වතා, ඔහුගේ විවාහක බිරිඳ සහ කුඩා දරුවෙකු යාපනයේදී අත්අඩංගුවට ගෙන තිබේ.
ඊයේ (23) වැල්ලවත්තේ සිට යාපනයේ චාවකච්චේරිය දක්වා බස් රථයකින් ගමන් කරමින් සිටි මෙම සැකකරුවන් පිළිබඳව ලද තොරතුරක් මත, යාපනය කොට්ඨාස අපරාධ විමර්ශන කාර්යාංශයේ සහ වලාන දූෂණ මර්දන ඒකකයේ නිලධාරීන් විසින් ඒකාබද්ධ මෙහෙයුමක් දියත් කර තිබුණි. ඒ අනුව අද (24) අලුයම මොවුන්ව අත්අඩංගුවට ගැනීමට පොලිස් නිලධාරීන්ට හැකිවී ඇත.
අත්අඩංගුවට ගන්නා අවස්ථාවේදී පොලිස් ඇසට වැලි ගැසීම සඳහා ප්රධාන සැකකරු මුව ආවරණයක් පැලඳ සිට ඇති අතර, ඔහුගේ විවාහක බිරිඳ මුස්ලිම් කාන්තාවක ලෙස වෙස්වලාගෙන සිට ඇති බව ද වාර්තා වෙයි.
පොලිස් අත්අඩංගුවට පත්වීමෙන් පසු සැකකරුගෙන් සිදුකළ මූලික ප්රශ්නකිරීම්වලදී ඔහු ප්රකාශ කර ඇත්තේ, වව්නියාවේ සිට කුරුණෑගල ප්රදේශයට පැමිණ තමන්ගේ අනෙක් දරුවන් දෙදෙනා ද බලා ඉන් අනතුරුව පොලීසියට භාරවීමට සැලසුම් කර තිබූ බවය.
සිද්ධිය සම්බන්ධයෙන් යාපනය කොට්ඨාස අපරාධ විමර්ශන කාර්යාංශය සහ වලාන දූෂණ මර්දන ඒකකය වැඩිදුර විමර්ශන සිදුකරයි.
මේ ලිපියත් කියවන්න…
අම්පාරේ භෞත චිකිත්සකවරියගේ ජීවිත සිහිනය ඛේදවාචකයක් වී තෙල්දෙණියෙන් කෙළවර වූ හැටි!
