උපේක්ෂා උඩුවැරැල්ල –
ඉමහත් මැතිවරණ ජයග්රහණයකින් පසුව, ජනප්රිය නළුවෙකු මෙන්ම දේශපාලනඥයෙකු ද වන සී. ජෝසප් විජේ හෙවත් තලපති විජේ 2026 මැයි මාසයේදී තමිල්නාඩුවේ මහ ඇමතිවරයා ලෙස පදවි ප්රාප්ත විය. ඔහුගේ පක්ෂය වන තමිලග වෙට්ට්රි කසාගම් (TVK) ඓතිහාසික ආසන සංඛ්යාවක් දිනා ගැනීමට සමත් විය.
විජේයි ගේ දේශපාලන ප්රකාශනය අතිශයින්ම ග්රාම්ය ලෙස තමිල්නාඩු වැසියන්ගේ හැඟීම්වලට ආමන්ත්රණය කිරීම බව ඔහු කලක සිට පෙන්වූයේය. ශ්රි ලංකාවේ අභ්යන්තර දේශපාලනික ප්රශ්න, විශේෂයෙන්ම උතුරේ යුද්ධය පිළිබඳව ඔහුගේ මතවාදය පහළ ස්ථරයේ ජනමනස පුබුදුවන්නක් විය. ඔහු සිය එම ආකල්ප සමාජගත කරනු ලැබුවේ රිදී තිරයේ පහළවුන අධිබල ප්රාප්ත වීරයාගේ රූපය තුළ සැඟවි හිඳිමිනි.
තමිල්නාඩුවේ වෙරළබඩ කලාපය අතිමහත් ධීවර ප්රජාවකින් යුක්තය. තමිල්නාඩු දේශපාලකයින්ගේ ධීවර ව්යාපාරයට යොදවනු ලබන අසරණ දුගී මිනිසුන්ගෙන් ද මේ ධීවර ප්රජාව සමන්විතය. දහස් ගණනින් පැමිණ ශ්රී ලංකා මුහුදු තීරය ආක්රමණය කරමින් ධීවර කොල්ලයේ යෙදෙන්නේ මේ පිරිස්ය. ඔවුහු නාවික හමුදාව සමග ගැටෙති. ලාංකික ධීවර කණ්ඩායම් සමග ගැටෙති. සිය මුහුදු සීමාව තුළ ධීවර කටයුතුවල යෙදෙන උතුරේ ධීවරයින්ගේ ධීවර උපකරණත් වනසමින් ඉන්දීය ධීවරයින් කරනු ලබන බලහත්කාරී කොල්ලය නෛතිකව නතර කිරීමට දරන උත්සාහයේ දී තමිල්නාඩු ධීවරයෝ ශ්රී ලංකා නාවික හමුදාවේ අත් අඩංගුවට පත් වෙති.
ශ්රී ලංකා බලධාරීන් විසින් නිතර අත්අඩංගුවට ගනු ලබන දෙමළ ධීවරයන් පිළිබඳව තමිල්නාඩු වැසියන් දැඩි අවධානයක් යොමු කරති. මහ ඇමති ධුරයට පත්වීමෙන් පසුව, විජේ ශ්රී ලංකාව සමඟ පවතින මෙම ගැටලුව සම්බන්ධයෙන් සිය දැඩි උනන්දුව ප්රකට කරමින් වැඩ අරඹා ඇත.
ධුරයට පත්වී දින කිහිපයකට පසු, එනම් ඊයේ ( 2026 මැයි 12 ), විජේයි ඉන්දියාවේ විදේශ කටයුතු අමාත්ය එස්. ජයිශංකර් වෙත නිල ලිපියක් යොමු කළේය. එම ලිපිය මගින් ඔහු ඉන්දීය රජයෙන් ඉල්ලා සිටියේ ශ්රී ලංකාවේ රඳවා සිටින තමිල්නාඩු ධීවරයන් නිදහස් කර ගැනීම සඳහා රාජ්යතාන්ත්රික ක්රියාමාර්ග කඩිනමින් භාවිතා කරන ලෙසය.
මසුන් ඇල්ලීමේදී මුහුදු සීමාව උල්ලංඝනය කළ බවට පවසමින් එදිනම රාමනාදපුරම් දිස්ත්රික්කයේ ධීවරයන් හය දෙනෙකු ශ්රී ලංකා නාවික හමුදාව විසින් අත්අඩංගුවට ගනු ලැබීය. විජේ සිය ලිපිය මගින් තවමත් ශ්රී ලංකා භාරයේ පවතින අනෙකුත් ධීවරයන් 48 දෙනෙකු සහ බෝට්ටු 264 ක් පිළිබඳව ද සඳහන් කළේය. මෙම අත්අඩංගුවට ගැනීම් හේතුවෙන් තමිල්නාඩුවේ ධීවර පවුල්වල ජීවිත හා රැකියා වලට දැඩි හානියක් සිදුවන බව ඔහු පැවසීය. දිල්ලි මධ්යම රජය ශ්රී ලංකාව සමඟ සෘජුව සාකච්ඡා කර ධීවරයන් සහ බෝට්ටු ආරක්ෂිතව ආපසු ගෙන්වා ගැනීමට කටයුතු කළ යුතු බවට ඔහු අවධාරණය කළේය.
මෙය විජෙයි මහ ඇමතිවරයා ලෙස පත්වීමෙන් පසු විදේශ කටයුතු සම්බන්ධයෙන් ගත් ප්රථම නිල ක්රියාමාර්ගයයි. මෙය ඔහු දෙමළ ධීවරයන්ගේ අයිතිවාසිකම් ආරක්ෂා කිරීමට දක්වන කැපවීම පිළිබඳ සලකුණක් ලෙස ඉන්දීය මාධ්ය පුළුල් ලෙස වාර්තා කළේය.
විජෙයි සිය මැතිවරණ ප්රචාරක ව්යාපාරය අතරතුර ද කිහිප වතාවක්ම මෙම ගැටලුව ගැන කතා කර තිබුණි. ඔහුගේ පක්ෂ ප්රතිපත්ති ප්රකාශනය මගින් ද ශ්රී ලාංකික දෙමළ ජනයාට සහ ධීවරයින්ට උපකාර කිරීම සඳහා ඉන්දීය රජයට බලපෑම් කරන බවට පොරොන්දු වී තිබුණි.
මේ අතර ජ්යෙෂ්ඨ ඉන්දීය මාධ්යවේදියෙකු සහ ලේඛකයෙකු වන එම්.ආර්. නාරායන ස්වාමි විජේයි වෙත විවෘත ලිපියක් ලිවීය. එහිදී ඔහු විජේගේ විශිෂ්ට ජයග්රහණයට සුබ පතමින්, ශ්රී ලංකා කරුණු සම්බන්ධයෙන් “පරීක්ෂාකාරීව කටයුතු කරන” ලෙස උපදෙස් දුන්නේය.
ඉන්දියාව, තමිල්නාඩුව සහ ශ්රී ලංකාව අතර පවතින සංකීර්ණ ඉතිහාසය එම ලිපියෙන් පැහැදිලි කර තිබුණි. විදේශ ප්රතිපත්ති හසුරුවනු ලබන්නේ ප්රාන්ත නායකයින් විසින් නොව ඉන්දියාවේ මධ්යම රජය විසින් බව ඔහු විජේට මතක් කර දුන්නේය. රටවල් දෙක අතර ගැටලු මඟහරවා ගැනීම සඳහා සමබර සහ සන්සුන් ප්රවේශයක් අනුගමනය කරන ලෙස නාරායන ස්වාමි ඉල්ලා සිටියේය.
ඉන්දියාවේ මෙතෙක් ප්රතිචාරය:
ශ්රී ලංකාව් ධීවර කොල්ලය සඳහා පැමිණ හමුදා අත් අඩංගුවට පත් වුන ඉන්දීය ධීවරයින් සම්බන්ධව විජෙයිගේ ලිපිය දිල්ලි මධ්යම රජය වෙත යොමු කර ඇත. මේ වන විට (2026 මැයි 13), අමාත්ය ජයිශංකර් හෝ ඉන්දීය රජය වෙතින් ඊට ප්රසිද්ධ ප්රතිචාරයක් ලැබී නොමැත. විදේශ ප්රතිපත්තිය මධ්යම රජයේ කාර්යයක් බැවින් මීළඟ පියවර ඔවුන් විසින් තීරණය කරනු ඇත.
කෙසේ වෙතත් නව තමිල්නාඩු මහ ඇමතිවරයා සම්බන්ධව ශ්රි ලංකා රජයේ හැසිරීම වඩාත් රාජ්ය තාන්ත්රිකය. ශ්රී ලංකා ජනාධිපති අනුර කුමාර දිසානායක විජෙයි වෙත සුබපැතුම් එක් කරමින් ශ්රී ලංකාව සහ තමිල්නාඩුව අතර පවතින ශක්තිමත් සංස්කෘතික හා ආර්ථික සබඳතා පිළිබඳව මිත්රශීලී පණිවිඩයක් යවා තිබුණි. එම සුබ පැතීම සම්බන්ධයෙන් විජේ ප්රසිද්ධියේ ස්තූති කිරීමෙන් මිනිත්තු කිහිපයක් ඇතුළත මධ්යම රජයට විජෙයි කරන ඉල්ලීම ඉදිරිපත් විය.
එහෙත් ශ්රී ලංකාව සමඟ පවතින ධීවර ගැටලුව සම්බන්ධයෙන් ඉතා ඉක්මනින් සහ පැහැදිලිව ක්රියා කරමින් සිටී. ඉන්දීය මාධ්ය මෙය දකින්නේ තමිල්නාඩුවේ ධීවර ප්රජාවට ඔහු ලබා දුන් පොරොන්දුවේ කොටසක් ලෙසය. නාරායන ස්වාමිගේ විවෘත ලිපියෙන් පෙනී යන්නේ ඇතැම් ප්රවීණයන් ඔහුගෙන් වඩාත් ප්රවේශම් සහගත බවක් අපේක්ෂා කරන බවයි. ඉදිරි දිනවලදී දිල්ලිය සහ කොළඹ මේ සඳහා ප්රතිචාර දක්වන ආකාරය දෙස ලෝකය බලා සිටී.
