නව QR කේත ක්රමය ක්රියාත්මක කිරීමේදී යම් යම් ප්රායෝගික ගැටලු මතු විය හැකි බවට වූ පූර්ව අවබෝධය සහ පුරෝකථනය මත පිහිටා එය ක්රියාත්මක කිරීමේ තීරණය ගත් බව ජනාධිපතිවරයා පවසයි.
පවතින ආර්ථික ක්රියාවලිය අඩාල නොකර ඉන්ධන පාලනයක් සිදු කිරීම සඳහා මෙම අවදානම ගත් බව ජනාධිපතිවරයා වැඩිදුරටත් අවධාරණය කළේය. ඔහු ඒ බව පැවසුවේ ඊයේ රාත්රියේ පැවති විශේෂ මාධ්ය හමුව අමතමිනි.
ජනාධිපතිවරයාට අනුව මෙම පද්ධතිය සැකසීම සඳහා ඩයලොග් ආයතනය, MIT ආයතනය සහ ඩිජිටල් ආර්ථිකය පිළිබඳ උපදේශක හාන්ස් විජේසූරිය ඇතුළු විශේෂඥ කණ්ඩායමක් ස්වේච්ඡාවෙන් දායකත්වය ලබා දී ඇත.
මීට පෙර මෙවැනි පද්ධති ක්රියාත්මක කිරීමේදී රට වසා දමා සති දෙකක කාලයක් ලබා දී තිබුණද, දුවන ආර්ථිකය පවත්වාගෙන යා යුතු බැවින් මෙවර එසේ කිරීමට නොහැකි වූ බවත්, ඒ හේතුවෙන් ඉරිදා දිනයක් තෝරාගෙන මෙය සක්රිය කළ බවත් ජනාධිපතිවරයා පෙන්වා දුන්නේය.
මේ වන විට මිලියන පහකට ආසන්න පිරිසක් පද්ධතියේ ලියාපදිංචි වී ඇති අතර, ඉන්ධන නිකුත් කරන අතරතුරම මෙම පද්ධතිය ක්රියාත්මක කරන පළමු අවස්ථාව මෙය බව ජනාධිපතිවරයා කීවේය.
අත්යවශ්ය සේවා සඳහා කිසිදු බාධාවක් නොවන අයුරින් මෙය පවත්වාගෙන යාමට රජය අපේක්ෂා කරන අතර, පවතින ගැටලු ඉතා ඉක්මනින් නිරාකරණය කරන බව ද ජනාධිපතිවරයා සඳහන් කළේය.
