තෙල් මිල ලංකාව තුළ වැඩිවීමට හේතුව මැදපෙරදිග ඇති වී තිබෙන ජාත්යන්තර අර්බුදකාරී තත්ත්වය නොව, බාල ගල් අඟුරු නිසා සිදුවූ බලශක්ති හිඟය පියවා ගැනීමට වැඩිපුර ඉන්ධන දහනය කිරීමට සිදුවීම සහ ලෝක වෙළෙඳපොළෙන් වැඩිම මිලට ඉන්ධන මිල දී ගැනීම බව පොදුජන පෙරමුණේ ජාතික සංවිධායක නාමල් රාජපක්ෂ පවසයි.
නාමල් රාජපක්ෂ මේ බව පැවසුවේ ඊයේ (31) සවස් වරුවේ නුගේගොඩ ප්රදේශයේ දී මාධ්ය අමතමිනි. “අලුත්ම ගල් අඟුරු නැවත් රිජෙක්ට් වෙලා කියනවනේ. මොනවා කරන්නද ඉතින් වැඩ බැහැ නේද? හොරකමයි වංචාවයි. ගල් අඟුරු නැව ඊළඟ එකත් බාල වෙච්ච ගමන්, තව දවසකට මාව සීඅයිඩී එකට කැඳවයි.” නාමල් රාජපක්ෂ පැවසුවේය.
එහිදී ඔහු වැඩිදුරටත් මෙසේ ද අදහස් දැක්වීය.
රටේ ජනතාවගෙන් ඇහුවොත් ආණ්ඩුව ගැන ජනතාව හරියට පිළිතුරක් ලබාදෙයි. මොකද පැහැදිලිවම ආණ්ඩුව ජනතාව ගැන හිතන්නේ නැහැ. සියලුම බර ජනතාව පිට දානවා. කලින් නම් ඇහුවේ මිල වැඩි කරන්න ආණ්ඩු ඕනද කියලා. දැන් ඒ අය බලයට ඇවිල්ලා තමන්ගේ නොහැකියාවන්, වංචා දූෂණයන් සහ පාඩු සියල්ල ජනතාවගේ පිට පටවන බවක් පේනවා.
මාලිමාවේ එකසිය පනස් නම දෙනාටම, පාර්ලිමේන්තුවේ මං කතා කරනකොට ළඟට එනවා. ඒ වගේ උසාවියට ඇවිල්ලා නඩු දිනයේදීත් වාඩිවෙලා හිටියොත් හොඳයි. මොකද එතකොට දැනගන්න පුළුවන් ඒ අයට ඇත්ත කතාවක්. තැන් තැන්වල කියවන්නේ නැතුව ඔය එකසිය පනස් නමදෙනාම ඔය දවසට උසාවියට එන්න. එහෙම නැත්නම් ඔයාලගේ ජනාධිපතිවරයාගෙන්ම අහන්න. මොකද එයා වේදිකාවේ නඩු තීරණ දෙනවා.
මැතිවරණයක් තැබීම මේ වෙලාවේ යහපත් බව ද නාමල් රාජපක්ෂ පැවසුවේය. එමෙන්ම ආණ්ඩුකාරවරුන් දේශපාලනික පත්වීම් සහිත ද්විත්ව පුරවැසියන් බව ද නාමල් රාජපක්ෂ සිය කතාවේ දී හැඟවූයේය.
“මැතිවරණයක් තිබ්බොත් හොඳයි කියලා මට හිතෙනවා. එක පැත්තකින් ජනතාවට අවස්ථාව දෙන්න ඕන ප්රාදේශීය නායකයින් තෝරාගන්න. ඒ වගේම අද පළාත් සභාවල තියෙන බලය සහ මුදල් පරිපාලනය ජනාධිපතිවරයාගේ දේශපාලන නියෝජිතයන් නව දෙනෙක්ට දීලා තියෙනවා. ඒක දේශපාලන නියෝජිතයන් නව දෙනෙක්ට දෙන්නේ නැතුව ජනතා නියෝජිතයින්ට දුන්නා නම් තමයි හොඳ. මොකද ඒ අය ජනතාවට වග කියනවා. එහෙම නැත්නම් දැන් ඊයේ පෙරේදාත් ආණ්ඩුකාරවරයෙක් ඉල්ලා අස්වුණානේ, අනිත් අයත් ළං වෙන්න ළං වෙන්න ඉල්ලා අස්වෙවී තම තමන්ගේ රටවල් වලට යයි. හැබැයි අවසානයේ වගකියන්න කෙනෙක් නැතිවෙයි.”
ආණ්ඩුව ඉතිරි කාලය තුළ තිබේ ද නැද්ද යන්න ගැන මාධ්ය ඇසූ ප්රශ්නයටත් නාම් උත්තර දුන්නේය.
“ආණ්ඩුව අවුරුදු තුන හමාරක් යනවද නැද්ද කියන එක නීත්යානුකූලව මැතිවරණ කොමිසම තීරණය කරන්න ඕන කාරණයක් සහ මේ රටේ ජනතාව තීරණය කරන්න ඕන කාරණයක්. හැබැයි ඉතින් ආණ්ඩුව ඔය පුටුවේ වාඩිවෙලා ඉන්නකම් ඒ ආණ්ඩුවෙන් වැඩ ගන්න එක තමයි අපි කරන්නේ. ඉතින් අපි ආණ්ඩුවෙන් වැඩ ගන්නවා, ආණ්ඩුවේ වැරදි පෙන්වලා දෙනවා, ආණ්ඩුවේ නොහැකියාව පෙන්වලා දෙනවා. ආණ්ඩුව මේ රටේ ජනතාවට වෙච්ච පොරොන්දු ඉෂ්ට කරනකම් අපි ආණ්ඩුව පිටිපස්සෙන් හැප්පෙනවා.”
