2022 වසරේ පැවති ආකාරයේ ආර්ථික අර්බුදයක් රට තුළ යළි ඇති වීමට කිසිසේත්ම ඉඩ නොතබන බවත්, මැදපෙරදිග පවතින යුදමය වාතාවරණය හමුවේ නිර්මාණය වී ඇත්තේ බාහිර අර්බුදයක් වුවද එය මැනවින් කළමනාකරණය කරගැනීමේ ශක්තිය වත්මන් රජය සතු බවත් ජනාධිපති අනුර කුමාර දිසානායක අවධාරණය කරයි. ජනාධිපතිවරයා මේ බව සඳහන් කළේ වසර 24කට පසුව නින්දවූර් සංස්කෘතික මධ්යස්ථානයේ ඉදිකිරීම් කටයුතු යළි ආරම්භ කිරීමේ නිල උත්සවයට අද (22) පෙරවරුවේ එක්වෙමිනි.
රටේ ශක්තිමත් ආර්ථිකයක් ගොඩනැඟීම, ජාතිවාදයට ඉඩ නොතැබීම, දූෂිතයන්ට දඬුවම් දීම, සැමට නීතිය සමානව ක්රියාත්මක කිරීම සහ දේශපාලකයන්ගේ අසීමිත වරප්රසාද කප්පාදු කිරීම වත්මන් රජය බලයට පත් කරමින් ජනතාව ලබාදුන් ජනවරමේ ප්රධාන අපේක්ෂාවන් වූ බව පෙන්වා දුන් ජනාධිපතිවරයා, ඒ වෙනුවෙන් මේ වන විටත් සැලකිය යුතු වැඩ කොටසක් රජය විසින් ඉටු කර ඇති බව ප්රකාශ කළේය.
බලය, ධනය හෝ තරාතිරම නොබලා සැමට නීතිය සමානව ක්රියාත්මක කිරීමේ වගකීම තම පාලනය යටතේ අනිවාර්යයෙන්ම ඉටු කරන බවත්, විශ්රාම වැටුප් ඇතුළු දේශපාලකයන්ගේ වරප්රසාද අහෝසි කරමින් ඔවුන් මහජනතාව වෙනුවෙන් සේවය කරන පිරිසක් බවට පත් කර ඇති බවත් හෙතෙම වැඩිදුරටත් පැවසීය.
මෙහිදී වත්මන් ආර්ථික තත්ත්වය පැහැදිලි කරමින් ජනාධිපතිවරයා මෙසේද සඳහන් කළේය.
“අපි ජනතාව අසීරුතාවට පත් වූ සෑම අවස්ථාවකදීම ඔවුන් රැකබලා ගන්නා ආණ්ඩුවක්. දිට්වා සුළි කුණාටුව මෙන්ම මැදපෙරදිග යුද තත්ත්වය හමුවේ වුවත් සහන සැලසීම වෙනුවෙන් අපි විශාල මුදලක් වෙන් කළා. මැදපෙරදිග කලාපීය යුද තත්ත්වය හේතුවෙන් ඉන්ධන ආනයනයේදී ඩොලරයේ අගය සහ ආනයනික භාණ්ඩ මිල ඉහළ යාම නිසා වැඩි ඩොලර් ප්රමාණයක් පිටතට ගලා යනවා. සංචාරක කර්මාන්තයට සහ අපනයන ආදායමටත් මෙයින් බලපෑම් එල්ල වී තිබෙනවා.”
“ඇතැමුන් මේ තත්ත්වය 2022 වසරට සමාන කිරීමට උත්සාහ කළත් එය සම්පූර්ණයෙන්ම වැරදියි. 2022 වසරේදී මහ බැංකුවේ තිබුණේ ඩොලර් මිලියන 50ක් පමණයි. නමුත් අද වන විට මහ බැංකුව සතුව ඩොලර් මිලියන 7,000කට ආසන්න සංචිතයක් පවතිනවා. ඉදිරි දින කිහිපයේදී තවත් ඩොලර් මිලියන 700ක් ලැබීමට නියමිතයි. වෙළෙඳපොළේ පවතින ඩොලර් හිඟය තාවකාලික පීඩනයක් වුවත්, රට තුළ ඉන්ධන, ගෑස්, කිරිපිටි හෝ පොහොර හිඟයක් ඇති වීමට කිසිසේත්ම ඉඩ තබන්නේ නැති බවට මම සහතික වෙනවා.”
රටේ පාලනයෙන් බාහිරව පවතින මෙම මැදපෙරදිග යුද අර්බුදයට සාර්ථකව මුහුණ දීමට රජය සූදානම් බවත්, රජය සතු ශක්තිමත් මූල්ය කළමනාකරණය හේතුවෙන් පක්ෂ විපක්ෂ මන්ත්රීවරුන්ගේ ඉල්ලීම් සලකා බලා නින්දවූර් සංස්කෘතික මධ්යස්ථානයේ ඉදිකිරීම් සඳහා ප්රතිපාදන වෙන් කිරීමට හැකි වූ බවත් ජනාධිපතිවරයා සිහිපත් කළේය.
අම්පාර දිස්ත්රික්කයේ ජනතාවගේ දීර්ඝකාලීන ඉල්ලීමකට අනුව, එහි පොහොසත් සංස්කෘතික උරුමයන් මතු පරපුරට දායාද කිරීමේ අරමුණින් 1999 වසරේදී මෙම සංස්කෘතික මධ්යස්ථාන ව්යාපෘතිය ආරම්භ කෙරිණි. කෙසේ වුවද 2014 වසරේ සිට මෙහි ඉදිකිරීම් සම්පූර්ණයෙන්ම නතර වී තිබූ අතර, වසර 24කට පසුව මෙලෙස එහි වැඩකටයුතු යළි ආරම්භ කෙරේ.
මේ සඳහා ඇස්තමේන්තුගත මුළු මුදල රුපියල් මිලියන 945.04ක් වන අතර, 2026 අයවැය මඟින් රුපියල් මිලියන 300ක ප්රතිපාදන දැනටමත් වෙන් කර ඇත. ඉතිරි ප්රතිපාදනද අවශ්යතාව පරිදි ඉදිරියේදී වෙන් කිරීමට නියමිත අතර, ව්යාපෘතියේ සමස්ත ඉදිකිරීම් කටයුතු 2027 දෙසැම්බර් 31 වැනිදාට පෙර අවසන් කිරීමට සැලසුම් කර තිබේ.
