ජාතික නිවාස සංවර්ධන අධිකාරියේ (NHDA) සිදුවී ඇතැයි කියන මහා පරිමාණ ඉඩම් අවභාවිතයන්, මූල්ය අක්රමිකතා සහ පරිපාලන දුර්වලතා පිළිබඳ විධිමත් විමර්ශන පැවැත්වීම සඳහා එම කරුණු අපරාධ පරීක්ෂණ දෙපාර්තමේන්තුව (CID) සහ අල්ලස් හෝ දූෂණ විමර්ශන කොමිෂන් සභාව වෙත යොමු කිරීමට පොදු ව්යාපාර පිළිබඳ කාරක සභාව (COPE) තීරණය කර තිබේ.
කෝප් කමිටු සභාපති පාර්ලිමේන්තු මන්ත්රී (වෛද්ය) නිශාන්ත සමරවීරගේ සභාපතිත්වයෙන් පසුගියදා පාර්ලිමේන්තුවේදී රැස්වූ අවස්ථාවේදී මෙම පියවර ගෙන ඇත. එහිදී ජාතික නිවාස සංවර්ධන අධිකාරියේ 2022 සහ 2023 වර්ෂවලට අදාළ විගණකාධිපති වාර්තා සහ වර්තමාන කාර්යසාධනය පිළිබඳව දීර්ඝ ලෙස විමර්ශනයට ලක් කෙරිණි.
වටිනා ඉඩම් කුණු කොල්ලයට දීලා
මෙහිදී අනාවරණය වී ඇත්තේ මාලිගාවත්ත, ඇල්විටිගල මාවත සහ දඹුල්ල රංගිරිගම ප්රදේශවල පිහිටි අධිකාරිය සතු අතිශය වටිනා ඉඩම්, කිසිදු අමාත්ය මණ්ඩල අනුමැතියකින් තොරව ඉතා අඩු නාමික වටිනාකම් යටතේ බාහිර පාර්ශ්ව වෙත බදු දී ඇති බවය.
එමෙන්ම, අදාළ ගිවිසුම්වල සඳහන් පරමාර්ථයන්ට සම්පූර්ණයෙන්ම පටහැනි ලෙස එම ඉඩම් භාවිත කර ඇති අතර, අධිකාරිය සතු පොදු දේපළ නිසි ලෙස ආරක්ෂා කිරීමට බලධාරීන් අසමත් වී ඇති බවද කමිටුව හමුවේ අනාවරණය විය.
වගකිවයුත්තන්ට එරෙහිව විනය පියවර
මෙම ගනුදෙනු බොහොමයක් ජාතික නිවාස සංවර්ධන අධිකාරියේ මූලික පරමාර්ථයන් සහ නීතිමය ප්රතිපාදන උල්ලංඝනය කරමින් සිදුවී ඇති බව නිරීක්ෂණය කළ කෝප් කමිටුව, අදාළ අක්රමිකතා සම්බන්ධ සම්පූර්ණ වාර්තා වහාම CID සහ අල්ලස් කොමිසම වෙත යොමු කර අවශ්ය නීතිමය ක්රියාමාර්ග ගන්නා ලෙස නිර්දේශ කළේය.
මීට අමතරව, මෙම සිදුවීම් සම්බන්ධයෙන් වන අභ්යන්තර විගණන පරීක්ෂණ කඩිනම් කරන ලෙසත්, ඊට වගකිවයුතු නිලධාරීන් වහාම හඳුනාගෙන ඔවුන්ට එරෙහිව දැඩි විනයානුකූල පියවර ගන්නා ලෙසත් නිලධාරීන්ට උපදෙස් දෙනු ලැබීය. ඉදිරියට මෙවැනි අක්රමිකතා වැළැක්වීම සඳහා දේපළ කළමනාකරණය සහ අභ්යන්තර පාලන පද්ධති වහාම ශක්තිමත් කිරීමටද පියවර ගන්නා ලෙස කාරක සභාව වැඩිදුරටත් අවධාරණය කළේය.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්රෑම් සමූහයන්ට එක්වෙන්න.
මෙම විශේෂ කාරක සභා රැස්වීම සඳහා පාර්ලිමේන්තු මන්ත්රීවරුන් වන නීතීඥ දයාසිරි ජයසේකර, එස්. එම්. මරික්කාර්, නීතීඥ සුජීව සේනසිංහ, මුජිබුර් රහුමාන්, චමින්ද විජේසිරි, වෛද්ය එස්. ශ්රී බවානන්දරාජා, සුනිල් රාජපක්ෂ, තිලිණ සමරකෝන්, චන්දිම හෙට්ටිආරච්චි, අසිත නිරෝෂණ එගොඩ විතාන, රුවන් මාපලගම, ජගත් මනුවර්ණ, දිනේෂ් හේමන්ත, එම්.කේ.එම්. අස්ලම් සහ සුදත් බලගල්ල සහභාගි වූහ.
