මත්ද්රව්ය ජාවාරම්කරුවකු වන නඳුන් චින්තක වික්රමරත්න නොහොත් ‘හරක් කටා’ නමැත්තාගෙන් රුපියල් කෝටි ගණනින් මුදල් ලබාගත් දේශපාලනඥයන්, නීතිඥවරුන් සහ පොලිස් දෙපාර්තමේන්තුවේ ඉහළ නිලධාරීන් ඇතුළු පිරිසක් කොටුකර ගැනීම සඳහා දැවැන්ත විමර්ශනයක් ආරම්භ කර තිබේ.
මෙම විමර්ශනය ආරම්භ වන්නේ හරක් කටා අපරාධ පරීක්ෂණ දෙපාර්තමේන්තුවේ රැඳවුම් භාරයේ පසුවූ සමයේ, ඔහුගේ මුදලින් යැපුණු පොලිස් නිලධාරීන් සහ දේශපාලනඥයන් පිරිසක් සිට ඇති බවත්, එම දූෂිත ක්රියාවලියට එරෙහි වූ අවංක පොලිස් නිලධාරීන්ට විවිධ බලපෑම් සහ අඩන්තේට්ටම්වලට මුහුණ දීමට සිදු වූ බවත් පොලිස් අභ්යන්තර ආරංචි විසින් තහවුරු කර ඇති පසුබිමකදී ය.
අල්ලස් හෝ දූෂණ චෝදනා විමර්ශන කොමිෂන් සභාව විසින් මෙහෙයවනු ලබන මෙම විශේෂ විමර්ශනය සඳහා අපරාධ පරීක්ෂණ දෙපාර්තමේන්තුවේ (CID) සහය ද හිමිවන බව වාර්තා වේ.
විමර්ශන ආරංචි මාර්ග සඳහන් කරන්නේ සැකකාර හරක් කටා විසින් විටින් විට මෙරට ප්රමුඛ පෙළේ දේශපාලනඥයන් සහ පොලීසියේ හිටපු ඉහළ නිලධාරීන්ගේ නම් හෙළි කර ඇති බැවින්, ඒ පිළිබඳව සවිස්තරාත්මක තොරතුරු ලබාගැනීම සඳහා ඉදිරියේදී ඔහුගෙන් දීර්ඝ ප්රකාශයක් සටහන් කර ගැනීමට නියමිත බවයි.
විශේෂයෙන්ම හරක් කටා අපරාධ පරීක්ෂණ දෙපාර්තමේන්තුව භාරයේ රඳවා සිටි කාලසීමාව තුළ එකල එහි ප්රධානීන් ලෙස කටයුතු කළ ඉහළ පොලිස් නිලධාරීන් කිහිපදෙනෙකු මොහුගෙන් මුදල් ලබාගෙන ඇති බවට නිශ්චිත තොරතුරු අනාවරණය වී ඇති බව අභ්යන්තර ආරංචි මාර්ග පවසයි.
එම නිලධාරීන් කිසිවෙකුත් මේ වන විට අපරාධ පරීක්ෂණ දෙපාර්තමේන්තුවට අනුයුක්තව නැත. ඉන් එක් උසස් පොලිස් නිලධාරියෙකුගේ පවුලේ අවමංගල්ය උත්සවයක සම්පූර්ණ වියදම් පවා දරා ඇත්තේ හරක් කටා විසින් බවට ලැබී ඇති තොරතුරක් මත ද පුළුල් පරීක්ෂණ ක්රියාත්මකය. ( දිනමිණ – ගයාන් කුමාර වීරසිංහ)
