කපිල කේ හීනටියන –
පසුගිය සතියේ වෙනිසියුලාවේ ඇති වූ ප්රබල ද්විත්ව භූමිකම්පාවකින් ආර්ජන්ටිනා ජාතික පාපන්දු ක්රීඩක ලූකස් ට්රෙජෝගේ බිරිඳ සහ කුඩා දරුවන් දෙදෙනා ජීවිතක්ෂයට පත්වීමේ අතිශය කණගාටුදායක පුවතක් වාර්තා වේ.
ඔහුගේ වෘත්තීය ජීවිතය බොහෝ විට වෙනිසියුලාවේ ක්රීඩා කණ්ඩායම්වලට සම්බන්ධව ගත වී තිබිණි. මේ ඛේදවාචකයට ඔහු මුහුණ දෙන විට මෙම 38 හැවිරිදි ක්රීඩකයා ‘ක්ලබ් ස්පෝර්ට් මාරිටිමෝ ලා ගුවයිරා’ (Club Sport Marítimo La Guaira) කණ්ඩායම නියෝජනය කරමින් සිටියේය. අනතුර සිදුවන අවස්ථාවේදී ඔහු සිටියේ අගනුවර වන කරකාස් හි පැවැති පුහුණු කඳවුරකට සහභාගී වෙමිනි. ඔහුගේ බිරිඳ වන යානිනා මරනෙල්ලා සහ ඔවුන්ගේ දරුවන් වන ආරොන් සහ අයින්හෝවා එම අවස්ථාවේදී අගනුවරට උතුරින් පිහිටි වෙරළබඩ නගරයක්වන ලා ගුවයිරා හි පිහිටි ඔවුන්ගේ නිවසේ රැඳී සිට ඇත. භූමිකම්පාව හේතුවෙන් ඔවුන් ජීවත් වූ නිවස සම්පූර්ණයෙන්ම විනාශ වී තිබේ.
මෙම භූමිකම්පා තත්ත්වය 2026 ජූනි 24 වැනි බදාදා දින සිදු වූ අතර, එය තත්පර 39ක අන්තරයක් තුළ එක පිට එක පැමිණි ප්රබල භූමිකම්පා දෙකකින් සමන්විත දුර්ලභ ගණයේ ද්විත්ව (doublet) භූමිකම්පාවක් ලෙස හඳුනාගෙන ඇත. මෙය වසර සියයකට වැඩි කාලයකින් වෙනිසියුලාවට බලපෑ ප්රබලම භූමිකම්පාව වන අතර, ලා ගුවයිරා ප්රදේශය මෙයින් දරුණු ලෙසම පීඩාවට පත් වූ කලාපයකි.
අනතුර සැණින් දැනගත් ට්රෙජෝ, ලා ගුවයිරා සිට කිලෝමීටර 30ක් පමණ දකුණින් පිහිටි පුහුණු කඳවුරේ සිට වහාම නිවස බලා දිව ආවේය. කඩා වැටුණු ගොඩනැගිල්ලේ සුන්බුන් අතර තම පවුලේ අය ජීවතුන් අතර සිටිනු ඇතැයි යන බලාපොරොත්තුවෙන් ඔහු දින තුනක් මුළුල්ලේ ඔවුන්ව සෙවීය. ඔහුගේ මිතුරන් සහ කණ්ඩායමේ සගයන් ද මෙම සෙවීම් කටයුතු සඳහා සහය දැක්වූ අතර, මුදාගැනීමේ කටයුතු වේගවත් කිරීම සඳහා ඔවුන් වැඩිදුරටත් බර යන්ත්රෝපකරණ ද ඉල්ලා සිටියහ.
කෙසේ වෙතත්, ඉරිදා දිනයේදී ක්ලබ් ස්පෝර්ට් මාරිටිමෝ ලා ගුවයිරා ක්රීඩා සමාජය සිය සමාජ මාධ්ය ගිණුම් ඔස්සේ මෙම සංවේදී පුවත තහවුරු කළේය. ට්රෙජෝගේ බිරිඳ සහ දරුවන්ගේ මෙම “පියවිය නොහැකි අහිමි වීම” පිළිබඳව තමන් දැඩි සේ කම්පාවට පත්වන බව එම ක්රීඩා සමාජය ප්රකාශ කළේය.
“ලූකස්, ඔබ තනි වී නැත. මාරිටිමෝ ලා ගුවයිරා හි සිටින ඔබේ පවුල ඔබ සමඟ සිටී,” යනුවෙන් ට්රෙජෝ සහ ඔහුගේ බිරිඳ, දරුවන් සිටින ඡායාරූපයක් ද එකතු කරමින් ඔවුහු ස පණිවිඩයක් නිකුත් කළහ.
ට්රෙජෝගේ මස්සිනා වන රිකාඩෝ ආර්ඩිලස් මාධ්ය වෙත පවසා තිබුණේ, ට්රෙජෝ මේ වන විට දැඩි මානසික කඩා වැටීමකට ලක්ව ඇති බවය. කඩා වැටුණු ගොඩනැගිල්ලෙන් කිසිදු දෙයක් ඉතිරි වී නොමැති බවද ඔහු සඳහන් කළේය.
බලධාරීන් පවසන පරිදි වෙනිසියුලාව පුරා මෙම භූමිකම්පාවලින් අවම වශයෙන් පුද්ගලයින් 1,450 දෙනෙකු මිය ගොස් ඇත. තවත් දහස් ගණනක් අතුරුදහන් වී හෝ තුවාල ලබා තිබේ. සහන සේවා කණ්ඩායම් තවදුරටත් ජීවතුන් අතර සිටින අය සෙවීමේ කටයුතුවල නිරත වුවද, සුන්බුන් අතරින් මිනිසුන් පණපිටින් බේරාගත හැකි තීරණාත්මක පැය 72ක කාල සීමාව මේ වන විට පසු වී අවසන්ය.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්රෑම් සමූහයන්ට එක්වෙන්න.
මෙම පෞද්ගලික ඛේදවාචකය වෙනිසියුලාවේ සමස්ත පාපන්දු ප්රජාවම කඳුළින් තෙත් කර තිබේ. මෙම ව්යසනය හේතුවෙන් තවත් ක්රීඩකයින් සහ තරුණ දක්ෂයින් රැසකටද ඔවුන්ගේ පවුලේ සාමාජිකයින් අහිමි වී ඇත. මේ වන විට ලූකස් ට්රෙජෝ සහ ඔහුගේ ක්රීඩා සමාජය මෙන්ම සමස්ත වෙනිසියුලානු ජනතාවම එරට මෑත ඉතිහාසයේ සිදු වූ දරුණුතම ස්වභාවික ව්යසනය හමුවේ දරාගත නොහැකි ශෝකයකට මුහුණ දී සිටිති.
