පස් ජාවාරමක නිරත වූ පුද්ගලයෙකු මාධ්යවේදී නිමල් ජයරත්නට බැන තර්ජනය කිරීමේ චෝදනා මත මනම්පිටිය පොලිසියට කැඳවීමෙන් පසු, තමා සිදුකළ වරද පිළිගෙන මාධ්යවේදියාගෙන් සමාව ගෙන තිබේ. ජූනි 21 වනදා පොලිසිය හමුවේ පෙනී සිටි අදාළ පුද්ගලයා යළි කිසිදු මොහොතක මෙවැනි බැණ තර්ජනයක් නොකරන බවට පොරොන්දු වූ බව මනම්පිටිය පොලිසිය පවසයි.
මාධ්යවේදී නිමල් ජයරත්නට දුරකථනයෙන් මෙලෙස බැණ තර්ජනය කොට තිබුණේ අරලගංවිල යාය 07 ප්රදේශයේ පදිංචි 32 වියති එක්දරු පියෙකි.
දිඹුලාගල ප්රාදේශීය සභාවේ නම යොදා ගනිමින් වෙහෙරගල ප්රදේශයේ සිට ටිපර් තුනකින් නීති විරෝධීව පස් ප්රවාහනය කර අලෙවි කර ඇති බවට නිමල් ජයරත්න සිය සමාජ මාධ්ය ජාලාවේ පළ කිරිමත් සමඟ, අදාළ පුද්ගලයා පරුෂ වචනයෙන් බැන තර්ජනය කර ඇත. ඒ සම්බන්ධයෙන් පසුගිය 17 වෙනිදා මනම්පිටිය පොලිසිය වෙත පැමිණිල්ලක් යොමු කර තිබිණි.
තර්ජනය කළ පුද්ගලයාගේ දුරකථන අංකය, හඬපට මෙන්ම අදාළ සියලු තොරතුරු පොලිසිය වෙත ලබාදීමෙන් අනතුරුව, මනම්පිටිය පොලිසිය ඒ සම්බන්ධයෙන් අරලගංවිල පොලිසිය මාර්ගයෙන් දැනුවත් කර තිබේ. ඉන් අනතුරුව සැකකරු මනම්පිටිය පොලිසියට ඉදිරිපත් වී ඇත.
පැමිණිල්ල විභාග කළ මනම්පිටිය පොලිස් ස්ථානාධිිපති ප්රධාන පොලිස් පරීක්ෂක පී.ජී.ඒ.සී. ආරියරත්න සඳහන් කළේ, කිසිදු අයෙකුට බැණ තර්ජනය කිරීම දඬුවම් ලැබිය හැකි වරදක් බවත්, එය අධිකරණය දක්වා ගෙන යා හැකි බරපතළ කටයුත්තක් බවත්ය. එමෙන්ම කිසිදු මාධ්යවේදියෙකුට බැන තර්ජනය කිරීමට කිසිවෙකුට අයිතියක් නොමැති බවද ස්ථානාධිපතිවරයා අවධාරණය කළේය.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්රෑම් සමූහයන්ට එක්වෙන්න.
තර්ජනය කරන ලද පුද්ගලයා, තමා සිදු කළේ වරදක් බව පවසමින් මාධ්යවේදියාගෙන් සමාව අයැද, කිසිදු දිනක යළි තර්ජනය නොකරන බවට පොලිස් පොතේ සටහනක් තබා අත්සන් කොට පොරොන්දු වී තිබේ. ඉන් අනතුරුව මාධ්යවේදී නිමල් ජයරත්න ඔහුට සමාව ලබා දීමට කටයුතු කළේය.
