ශ්රියානි විජේසිංහ –
වෘත්තීය ඉල්ලීම් කීපයක් මුල් කරගෙන අද (23) දිනයේදී දිවයිනපුරා රෝහල්වල පැය 48ක සංකේත වැඩ වර්ජනයක් ක්රියාත්මක කිරිමට රජයේ වෛද්ය නිලධාරීන්ගේ සංගමය තීරණය කර තිබේ.
සෞඛ්ය සේවාවේ සහ වෛද්යවරුන්ගේ සැබෑ ගැටලුවලට විසඳුම් ලබා දීමට අවශ්ය ප්රතිපත්ති හෝ ක්රියාමර්ගයන් කිසිවක් පසුගිය අයවැය ලේඛණයන් තුළ අන්තර්ගත නොවීම හේතුවෙන් සෞඛ්ය සේවකයින් තුළ බරපතල නොසන්සුන්තාවයක් සහ විරෝධතාවක් මතු වූ බව සංගමයේ ලේකම් වෛද්ය ප්රභාත් සුගතදාස පවසා සිටියි.
වෛද්යවරුන්ට බලපාන ගැටලු වලට විසදුම් ඉල්ලා සංගමය වෘත්තීය ක්රියාමාර්ගයන් මාලාවක් ආරම්භ කළ අතර එහිදී සෞඛ්ය ඇමතිවරයා ලබා දුන් ලිඛිත ඉල්ලිම මත එම වෘත්තීය ක්රියාමාර්ගයන තාවකාලිකව අත්හිට වූ බව ලේකම්වරයා පෙන්වාදේ.
ඇමතිවරයා ලිඛිතව ලබා දුන් එකඟතාවන් දිගින් දිගටම උල්ලංඝණය කිරීම හේතුවෙන් පසුගිය 07 වන දින පැවති සංගමයේ මධ්යමකාරක සභාව ඒකමතිකව තීරණය කළේ වෘත්තීය ගැටලු විසඳීමට වගකිවයුත්තන් අසමත් වන්නේ නම් ඕනෑම මොහොතක දැඩි වෘත්තීය ක්රියාමාර්ගයන්ට එළඹීමට විධායක සභාවට බලය ලබාදීමට බව ලේකම්වරයා ප්රකාශ කළේය.
වෛද්යවරුන්ගේ සහ සෞඛ්ය ක්ෂේත්රයේ පැවති ගැටලු විසදීමට දින 10ක කාලයක් ලබා දුන් බවත් එම කාලය තුළ විසදුම් ලබා නොදෙන්නේ නම් 23වන දින දිප ව්යාප්ත අඛණ්ඩ වෘත්තීය ක්රියාමාර්ගයක් ආරම්භ කිරීමට විධායක සභාව ඒකමතිකව තීරණය කළ බවත් හෙතෙම පැවසුවේය.
මෙම ගැටලු විසඳීමට අවම වශයෙන් නිල සාකච්ඡාවක් හෝ සිදුකිරිමට තරම් අවශ්යතාවක් හෝ වුමනාවක් සෞඛ්ය අමාත්යවරයාට හෝ වගකිවයුත්තන්ට නොමැති වීම හේතුවෙන් මෙම වැඩ වර්ජනය ආරම්භ කළ බව ලේකම්වරයා කීවේය.
මේ අනුව අද(23) උදෑසන 8.00 ට ආරම්බ කරන වැඩ වර්ජනය අඛණ්ඩව පැය 48ක් පුරා දීප ව්යාප්තව ක්රියාත්මක කරන අතර පවතින ප්රවණතාවන් අධ්යනය කරමින් ඉදිරි වෘත්තීය ක්රියාමාර්ගයන් ප්රකාශයට පත්කරන බවද සංගමය පවසා සිටියි.
කෙසේ වෙතත් වැඩ වර්ජනය පැවතුණද රෝහල් තුළ හදිසි සහ අත්යවශ්ය ප්රතිකාර සේවාවන් ක්රියාත්මක කරන අතරම ළමා රෝහල්, මාතෘ රෝහල්, පිළිකා රෝහල්, වකුගඩු ප්රතිකාර ඒකක, ත්රිවිධ හමුදා රෝහල් තුළ සහ ජාතික මානසික විද්යායතනය තුළ වර්ජනය ක්රියාත්මක නොකරන බව සංගමය ප්රකාශ කරයි.
