විනය විරෝධී සහ දූෂිත දේශපාලන ගනුදෙනුවල නිරත වීමේ චෝදනාව මත බුලත්සිංහල ප්රාදේශීය සභාවේ සමගි ජන බලවේගය (සජබ) නියෝජනය කළ මන්ත්රීවරුන් පස්දෙනෙකුගේ පක්ෂ සාමාජිකත්වය වහාම ක්රියාත්මක වන පරිදි අහෝසි කිරීමට එම පක්ෂයේ කෘත්යාධිකාරී මණ්ඩලය පියවර ගෙන ඇත.
ඒ අනුව, සජබ බුලත්සිංහල කණ්ඩායම් නායක නිහාල් මෙන්ඩිස් , මොහොමඩ් නිශාර්ඩ්, කාන්ති පැළවත්ත, අයේෂා චාමලී සහ පුෂ්පා සමරසිංහ යන මන්ත්රීවරුන් පක්ෂයෙන් නෙරපා දමා ඔවුන්ගේ මන්ත්රී ධූර අහිමි කර තිබේ.
පසුගිය පළාත් පාලන මැතිවරණයෙන් අනතුරුව බුලත්සිංහල ප්රාදේශීය සභාවේ බලය තහවුරු කරගැනීම වෙනුවෙන් ජාතික ජන බලවේගයට (මාලිමාවට) සහාය දීම සඳහා මෙම පිරිස මූල්යමය ප්රතිලාභ (අල්ලස්) ලබාගෙන ඇති බවට දිගින් දිගටම බරපතළ චෝදනා එල්ල වෙමින් පැවතිණි.
මෙම මූල්ය ගනුදෙනුව සනාථ කෙරෙන දෘශ්ය පටයක් (වීඩියෝවක්) ප්රදේශයේ ප්රසිද්ධ හිමි නමක විසින් විපක්ෂ නායක සජිත් ප්රේමදාස සහ පක්ෂ මහලේකම්වරයා වෙත භාර දීමෙන් පසු, සජබ නීතිඥ මණ්ඩලයේ ද උපදෙස් මත මෙම පිරිස පක්ෂයෙන් නෙරපීමට තීරණය විය.
මෙම දේශපාලන වර්ධනය පිළිබඳව මාධ්ය වෙත අදහස් දැක්වූ කළුතර දිස්ත්රික් සජබ පාර්ලිමේන්තු මන්ත්රී ජගත් විතාන පෙන්වා දී ඇත්තේ අදාළ මන්ත්රී කණ්ඩායම පක්ෂයේ පොදු ස්ථාවරය අභියෝගයට ලක් කරමින් දිගින් දිගටම කටයුතු කළ බවයෙ.
ප්රාදේශීය සභාව තුළ සිදු වූ දේශපාලන පෙරළිය පිළිබඳව පාර්ලිමේන්තු මන්ත්රී ජගත් විතාන මෙසේ විස්තර කළේය:
“ප්රාදේශීය සභාවේ විපක්ෂ බලවේග එකමුතුව ගත්තාම එතන සජබ 6 දෙනා, එජාපය සහ ස්වාධීන කණ්ඩායම් එක්ක අපිට ආසන 16ක බහුතරයක් තිබුණා. ජාතික ජන බලවේගයට තිබුණේ ආසන 9ක් විතරයි. නමුත් සභා බලය ගන්න මාලිමාවේ අය අපේ මන්ත්රීවරුන් පස්දෙනෙකුට මුදල් දීලා තමන්ගේ පැත්තට නතු කරගත්තා. මේ පාවාදීම ගැන මම නිරන්තරයෙන්ම පක්ෂ නායකත්වය දැනුවත් කළා.”
“මේ අතරතුර තමයි ප්රදේශයේ ස්වාමීන්වහන්සේ නමක් මැදිහත් වෙලා මෙම මුදල් ගනුදෙනුවට අදාළ ස්ථිර සාක්ෂි සහිත රෙකෝඩින් එකක් පක්ෂ නායකත්වයට දුන්නේ. ඉන් පස්සේ චෝදනා සම්පූර්ණයෙන්ම තහවුරු වුණා. පක්ෂයේ නීති අංශ සහ කෘත්යාධිකාරී මණ්ඩලය හරහා අවශ්ය පියවර අරගෙන අද දවසේ මේ පස්දෙනාම පක්ෂයෙන් නෙරපන්න මම මැදිහත් වුණා.”
“පසුගිය මාසයේ සභා රැස්වීමේදී පවා පක්ෂයේ ස්ථාවරයට පිටින් ගිහින් මාලිමාව ගෙනාපු හැම යෝජනාවකටම මේ අය පක්ෂව ඡන්දය දුන්නා. පක්ෂය පාවා දුන් අයට නිසි දඬුවම ලැබිලා තියෙනවා. හිස් වූ මන්ත්රී ධුර සඳහා මනාප ලැයිස්තුවේ ඊළඟට සිටින අය නීත්යානුකූලව පත් කිරීමට ඉදිරියේදී කටයුතු කරනවා.”
