අඟුරුවාතොට, බටගොඩ ප්රදේශයේ පිහිටි “සෙනෙහසේ කැදැල්ල” වැඩිහිටි රැඳවුම් මධ්යස්ථානයේ පසුගිය බදාදා (03) ඇති වූ දරුණු ගින්නෙන් මියගිය පුද්ගලයින් අතරින් ඥාතීන් විසින් මෙතෙක් භාරගෙන නොමැති මෘතදේහයන්හි අවසන් කටයුතු රජයේ වියදමින් සිදු කිරීමට පියවර ගෙන ඇති බව පොලිසිය පවසයි.
සිද්ධිය සම්බන්ධයෙන් මහෙස්ත්රාත් පරීක්ෂණය, හොරණ මහෙස්ත්රාත් ලක්මිණි විධානගමගේ පසුගිය (04) පෙරවරුවේදී එම ස්ථානයට පැමිණ සිදු කරනු ලැබීය. ඒ අවස්ථාවේ දී දැවී ගිය සිරුරු 09ක් නිවාස භූමියේ තිබිණි. රෝහල්ගත කිරීමෙන් පසු තවත් සිවු දෙනෙක් මිය ගියේය.
ඒ මෙම අනතුරින් මේ වනවිට 13 දෙනෙක් මිය ගොස් තිබේ. මියගිය සියලුම පුද්ගලයන්ගේ පශ්චාත් මරණ පරීක්ෂණ කටයුතු අද දින හොරණ මූලික රෝහලේදී සිදු කිරීමට නියමිතව තිබේ. ඉන් අනතුරුව අවසන් කටයුතු සිදු කිරීම සඳහා මෘතදේහයන් ඥාතීන් වෙත මුදා හැරීමට කටයුතු කරන බව ද පොලිසිය වැඩිදුරටත් සඳහන් කළේය. එම අවස්ථාවේ දී ඥාතීන් විසින් භාර නොගන්නා දේහ පිළිබඳ අවසන් කටයුතු රජයේ වියදමින් සිදුකරනු ලැබේ.
ගින්න හටගන්නා අවස්ථාවේදී එම සුරැකුම් මධ්යස්ථානය තුළ නේවාසිකයන් 71 දෙනෙකු රැඳී සිට ඇත. ගින්නෙන් තුවාල ලැබූ තවත් පුද්ගලයන් පස් දෙනෙකු මේ වනවිට හොරණ මූලික රෝහලේ නේවාසිකව ප්රතිකාර ලබමින් පසුවෙයි.
