දශකයකට වැඩි කාලයකට පෙර ශබ්දයේ වේගයට වඩා වේගයෙන් පහළට ඇද වැටෙමින් පෘථිවි වායු ගොලය හරහා සැතපුම් 24 ක පිම්මක් පනින ලද පළමු ස්කයිඩයිවර් වූ අති දක්ෂ මලල ක්රීඩක ෆීලික්ස් බෝම්ගාට්නර්, බ්රහස්පතින්දා (17) ඉතාලියේ නැගෙනහිර වෙරළ තීරයේ සිදුවූ අනතුරකින් මිය ගියේය.
මිය යන විට ඔහුගේ වයස අවුරුදු 56 කි. ෆීලික්ස් බෝම්ගාට්නර් මිය යන්නේ ඉතාලියේ දී සිදුවු පැරග්ලයිඩින් අනතුරකිනි. පැරග්ලයිඩින් යනු නිදහසේ ගුවනේ පාවෙන ප්රකට ක්රීඩාවකි.
සිද්ධිය සම්බන්ධව අදහස් දැක්වූ ඉතාලි ගිනි නිවන භටයින් පැවසුවේ පෝර්ටෝ සැන්ට් එල්පිඩියෝ නගරයේ පිහිනුම් තටාකයක පැත්තට පැරග්ලයිඩරයක් කඩා වැටී එම ක්රීඩාවේ නිරත වූ තැනැත්තා බරපතල තුවාල ලබා තිබූ බවය.
අනතුරුව නගරයේ නගරාධිපතිවරයා සමාජ මාධ්ය සටහනකින් බෝම්ගාට්නර්ගේ මරණය තහවුරු කළේය.
“ගෝලීය ප්රසිද්ධියක් උසුලන, ධෛර්යයේ සහ අන්ත පියාසර කිරීම සඳහා ඇති ආශාවේ සංකේතයක් වන ෆීලික්ස් බෝම්ගාට්නර්ගේ ඛේදජනක වියෝව අපගේ ප්රජාව දැඩි ලෙස පීඩාවට පත් කර ඇත,” නගරාධිපති මැසිමිලියානෝ සියර්පෙලා පැවසීය.
“නිර්භීත ෆීලික්ස්” ලෙස හැඳින්වෙන බෝම්ගාට්නර්, 2012 දී කිසිම බාහිර උපකරණයක් හෝ යන්ත්රයක් භාවිතා නොකර සිය සිරුරින් ශබ්දයේ වේගය පරදවන වේගයක් ලබා ගත් පළමු මිනිසා බවට පත්වී ලෝකය මවිත කළේය. ඔහු පීඩනයට ඔරොත්තු දෙන ඇඳුමකින් සැරසී නිව් මෙක්සිකෝවට ඉහළින් යෝධ හීලියම් බැලූනයක් සහිත කැප්සියුලයක නැගී කිලෝ මීටර 39ක් පෘථිවි පෘෂ්ඨයෙන් ඉහළට ගොස් පෘථිවි වායුගොලය හරහා පෘථිවි පෘෂ්ඨයට පැන්නේය. මේ ඒ පිම්මය.
මෙම ඔස්ට්රියානු ජාතිකයා, මිනිත්තු නවයක කාලයක් තුළ පෘථිව පෘෂ්ඨයට ලඟාවන අතර තුර එක් අවස්ථාවක , පැයට සැතපුම් 843.6 ක වේගයක් ලබා ගත්තේය. එය ශබ්දයේ වේගය මෙන් 1.25 ගුණයකට සමාන විය. ශබ්දයේ වේගය ඉක්මවා පොළොවට පතිතවන අතරතුර එක් අවස්ථාවක තත්පර 13 ක් තිස්සේ භයානක තිරස් භ්රමනයකට ලක් වු බව ඔහුගේ කාර්ය මණ්ඩලය පසුව පැවසීය.
“මම දැන් පොළොවේ පය ගහලා ඉන්නවා. එපමණයි. එවැනි අවස්ථාවක දි ඔබ තවදුරටත් වාර්තා බිඳ දැමීම ගැන සිතන්නේ නැහැ, ඔබ විද්යාත්මක දත්ත ලබා ගැනීම ගැන සිතන්නේ නැහැ. ඔබට අවශ්ය එකම දෙය ජීවතුන් අතර නැවත පැමිණීමයි,” ඔහු නැගෙනහිර නිව් මෙක්සිකෝ කාන්තාරයට ගොඩ බැසීමෙන් පසු කීවේය.
හිටපු ඔස්ට්රියානු හමුදා පැරෂුට් කරුවෙකු වන බෝම්ගාට්නර්, ගුවන් යානා, පාලම්, ඉහළම ගොඩනැගිලි සහ බ්රසීලයේ ක්රිස්තුස් වහන්සේගේ ප්රතිමාව ඇතුළු ප්රසිද්ධ ස්ථානවලින් බිහිසුණු අත්දැකීම් ලබමින් දහස් ගණනක් පැනීම් සිදු කළ විශිෂ්ටයෙකි. වර්ෂ 2003 දී, ඔහු ගුවන් යානයකින් පැන කාබන් ෆයිබර් තටුවක් භාවිතා කරමින් ඉංග්රීසි ඕඩය හරහා පියාසර කළේය.
එවැනි වික්රමයන් කළ මේ අපූරු මිනිසා සාමාන්ය පැරග්ලයිඩින් පිම්මක් අතර සිදුවූ අනතුරකින් මිය ගියේය.
