ලලිත් චාමින්ද –
විදුලිබල හා බලශක්ති අමාත්යංශය මගින් වසර 2030 වනවිට මෙරට විදුලි ජනනයෙන් සියයට 70ක් පුනර්ජනනීය බලශක්තිය මගින් ලබා ගැනීමට අපේක්ෂා කර තිබුනද එම ඉලක්කය කරා ළඟාවීම අභියෝගාත්මක විය හැකි බව ජාතික විගණන කාර්යාලය මගින් නිකුත්කොට ඇති නවතම විගණන වාර්තාවක් මගින් අනාවරණය කොට ඇත.
2022 වර්ෂයේ දි මෙරට ජලවිදුලිය ඇතුළු පුනර්ජනනීය බලශක්ති ප්රභවයන්ගේ දායකත්වය සියයට 52කි. එය 2023 වර්ෂයේ දී සියයට 49 දක්වා පහත වැටි තිබුණි. පොදු ප්රතිපත්ති මාර්ගෝපදේශ අනුව කටයුතු කළයුතු අතර එහි ඉලක්ක ළඟා කරගැනිමට අවශ්ය ක්රියාමාර්ග සැලසුම්සහගතව සිදුකළ යුතු බවට විගණනය මගින් නිර්දේශකොට ඇත.
වසර 2030 වනවිට පුනර්ජනනීය බලශක්ති ප්රභවයන් මගින් එක් කෙරෙන සමස්ත ධාරිතාව මෙ.වො 8783 දක්වා වැඩිකිරිමට ඉලක්ක කොට ඇති බැව් විදුලිබල මණ්ඩලයේ ප්රධාන ගණන්දිමේ නිලධාරිවරයා විගණනයට සඳහන් කොට ඇත.
ඒ සදහා දළ වශයෙන් (2024-2030) කාලය තුළදි ඩොලර් මිලියන 6110ක් පමණ ආයෝජනයක් සිදුකළ යුතුව ඇති බවත් එම ඉලක්කය සපුරාගැනීම සඳහා විදුලිබල අමාත්යංශය මගින් අවශ්ය ක්රියාමාර්ග ගනිමින් පවතින බව ගණන්දීමේ නිලධාරිවරයා සඳහන් කොට ඇත.
2023 වර්ෂය අවසන්වනවිට මෙරට සමස්ත විදුලි ධාරිතාවය වු මෙ.වො 4991කින් මෙ.වො 3167ක් පුනර්ජනනීය බලශක්ති ප්රභවයන් මගින් එක්කොට ඇති බවද විදුලිබල මණ්ඩලයේ ප්රධාන ගණන්දීමේ නිලධාරිවරයා විගණනයට සඳහන් කොට ඇත.
විදුලිබල හා බලශක්ති අමාත්යංශය සම්බන්ධයෙන් 2023 වර්ෂයට අදළාව නිකුත්කොට ඇති විගණන වාර්තාවේ මෙම තොරතුරු ඇතුළුත්ව ඇත.
