මනම්පිටිය නිමල් ජයරත්න –
වයස අවුරුදු දාසයක පාසල් දැරියක් අවස්ථා කිහිපයකදීම ගුරු නිවාසයකට රැගෙන ගොස් දූෂණය කර ඇතැයි කියන සිද්ධියකට, දෙමාපියන් පිරිසක් කළ පැමිණිල්ලකට අනුව දිඹුලාගල අධ්යාපන කලාපයේ වැලිකන්ද අධ්යාපන කොට්ඨාසයේ ප්රසිද්ධ පාසලක ගණිත ගුරුවරයක් අද (22) අත්අඩංගුවට ගත් බව වැලිකන්ද පොලිසිය කියයි.
මෙලෙස අත්අඩංගුවට පත්ව ඇත්තේ අනුරාධපුරය සිට එම පාසලට ගණිතය විෂය ඉගැන්වීමට පැමිණි අවුරුදු 25 ක් පමණ වයසති අවිවාහක ගුරුවරයකු බව පරීක්ෂණ සිදුකරන වැලිකන්ද වැඩබලන පොලිස් ස්ථානාධිපති ප්රධාන පොලිස් පරීක්ෂක ප්රදීප් සෙනෙවිරත්න අප කළ විමසීමකදී පැවසීය.
එම විද්යාලයේ දෙමාපියන් සිව්දෙනකු විසින් ඊයේ ( 21) දුරකථන හඬ පටයක් සමග මේ පිළිබඳ පැමිණිල්ලක් ඉදිරිපත් කර තිබෙන බවද ස්ථානාධිපතිවරයා කීවේය.
අදාළ ගණිත ගුරුවරයා සමඟ, අවස්ථා කිහිපයකදී පැවති සම්බන්ධතාවය හා තමන්ට ගණිත ගුරුවරයාගෙන් දූෂණයට ලක් වූ අවස්ථාවන් පිළිබඳව දැරිය තම මිතුරිය සමග සංවාදයේ යෙදෙන දුරකථන හඬ පටයක් ද පැමිණිලි කළ දෙමාපියන් විසින් ලබා දී ඇති බවද පරීක්ෂණ සිදුකරන වැලිකන්ද පොලිසිය සඳහන් කරයි.
එම පාසල් සිසුවිය වැලිකන්ද ප්රාදේශීය රෝහලට ඇතුළත් කිරීමෙන් අනතුරුව අදාළ පරීක්ෂණ කටයුතු සිදුකිරීම සඳහා පොළොන්නරුව මහ රෝහලට මාරුකර යැවීමට කටයුතු කළ බව රෝහල් ප්රකාශකයෙකු අප කළ විමසීමකදී සඳහන් කළේය.
අදාළ ගණිත ගුරුවරයා අත්අඩංගුවට ගෙන දඩුවම් ලබා නොදුනහොත් මේ පිළිබඳව අග්රාමාත්යවරිය සහ දැනුවත් කළ යුතු සියලු අංශ දැනුවත් කරමින් ප්රදේශයේ දරුවන්ගේ ආරක්ෂාව වෙනුවෙන් කටයුතු කරන බවත්, ඉදිරියට ගුරුවරුන්ගෙන් එවැනි සිදුවීම් දරුවන්ට සිදු නොවීමට අවශ්ය නීති ක්රියාත්මක කරන ලෙසත් වැලිකන්ද පොලිසියට පැමිණි ඉදිරිපත් කෙරූ දෙමාපියෙකු වූ අප සමග පැවසීය.
මෙම සිද්ධිය පිළිබඳ පොළොන්නරුව ජ්යෙෂ්ඨ පොලිස් අධිකාරී නිශාන් ද සිල්වාගේ උපදෙස් මත වැලිකන්ද වැඩ බලන පොලිස් ස්ථානාධිපති ප්රධාන පොලිස් පරීක්ෂක ප්රදීප් සෙනෙවිරත ඇතුළු පොලිස් නිලධාරී කණ්ඩායමක් වැඩිදුර විමර්ශන සිදුකරයි.
